بۆ باشور جهگره‌كێ ديموكراتيێ(به‌ديل ديمقراطى) بله‌ز گرنگه‌..!! ا

بۆ باشور جهگره‌كێ ديموكراتيێ(به‌ديل ديمقراطى) بله‌ز گرنگه‌..!!ا


بزاڤا سياسيا باشور سه‌د سالێن خه‌باتا خو بوراندن، (55)پينجى وپێنج سال خه‌باتا شورشگێرى، ب ده‌هان هزار شه‌هيد، بسه‌دان هزرار ئه‌نفالبوى و گرتى و به‌رزه‌بوى، بسه‌دان هزار ده‌ربه‌ده‌ر و بێ سه‌روشوين بۆى، كيماباران، ئه‌نفال كرنا فه‌يلى و بارزانيا، قوناغێن ئێك ل دويڤ ئێكێن ئه‌نفالێن ره‌ش….سالێن خه‌باتێ و هجره‌تێن مليونى و سه‌دهزارى….هيچ تشته‌ك نه‌مايه‌ ڤى ملله‌تى نه‌كرى، ئه‌وا لسه‌ر مللان پێتڤييه‌ بكه‌ن، ده‌هقاتى زێده‌تر كريه‌، چيا و چول و نه‌هال وده‌شت و گرێن ڤێ ئاخى، بقه‌ده‌ر بارانا ساله‌كێ خوينا خه‌لكێ وه‌لاتێ خو ڤه‌خاريه‌، لبن بنێ هه‌رداره‌ك و تراشه‌كا ڤى وه‌لاتى، گورێ شه‌هيده‌كى هه‌يه‌، بتنێ بهوسته‌كا ڤێ ئاخێ نه‌مايه‌، ئيلا بخوهوخوينا پێشمه‌رگان هاتيه‌ ئاڤدان، لێ ئه‌وا جهێ مخابنيێ، دێروكا ڤان سالان، تژيه‌ ژ كاره‌سات و شكه‌ستنان، شكه‌ستنا سالا1975ز، شكه‌ستنا سالا1988ز، كوچا مليونى ل سالا1991ز، شه‌رێن خوكوژيێن تژى مالوێرانى، كاره‌ساتێن تژى مالوێرانى، كاره‌ساتا شه‌نگارێ ….نه‌ياڤه‌شارتيه‌ ، ئه‌گه‌رێن ڤان هه‌مى شكه‌ستن و كاره‌ساتان، دكه‌ڤيتن سه‌رمللێن حزبێن ده‌ستهه‌لاتێ و سه‌رانێن ده‌ستهه‌لاتدارێن وان، چونكى ئه‌و هه‌رده‌م مژويلى پرسێن خويێن كه‌سوكينه‌، شوينا قوربانيا بۆ گه‌ل و وه‌لاتێ خۆبده‌ن، گه‌ل و وه‌لاتى گورى خو دكه‌ن، شوينا ژيانا خه‌لكێ خۆ خوش بكه‌ن، ل سه‌رخوين و خوها خه‌لكێ خۆ، خو زه‌نگين دكه‌ن و پاخلێن خۆ تژى دكه‌ن، شوينا زانست و په‌روه‌ردێ ل وه‌لاتێ خۆ پێشدا ببه‌ن، بنه‌مايكێن زانست و په‌روه‌ردێ وێران و كاڤل دكه‌ن، رۆژ بۆ رۆژێ ره‌وشا وه‌لاتى و هاوولاتيا لبن ده‌ستهه‌لاتا وان د هه‌مى ئاله‌كى دا، ژ خرابيێ به‌ره‌ڤ خرابترێ دچيتن، موچه‌ نينن، پرۆژه‌ و وه‌به‌رهێنان نينن، خاندن و په‌روه‌رده‌ به‌ره‌ڤ خرابى و وێرانيێيه‌، دزى وتالان به‌رده‌وامه‌، بن ديواركرنا سه‌رومالێ گشتى يابه‌رده‌وامه‌، حزبى كرنا كومه‌لگه‌هێ، عه‌شائيرى كرنا حزبێ، بنه‌مالى كرنا عه‌شيره‌تێ، شه‌خصه‌نه‌ كرنا بنه‌مالێ، كومكرنا هه‌ر پرسه‌كێ دده‌سته‌كێ نه‌زان و بزهنيه‌ته‌كا گه‌نى و گه‌نده‌ل، هه‌رتشت لڤى وه‌لاتى ئێكسپار و بێ ئه‌رك كريه‌، ده‌ستهه‌لاتا لناڤا ده‌ستێ جووت حزباتيێ، بۆيه‌ وه‌بايه‌كا بڤه‌گر، خه‌ريكه‌ هه‌مى پارت و سازى و يه‌كێن ئيدارى(حكومى و مه‌ده‌نى)، بته‌مامى بكه‌ڤن ناڤا فه‌ساده‌كا ئابۆرى و ئيدارى و مالى و تاكو ئه‌خلاقى….يا ئاشكرايه‌ ژى د(25)بيست و پێنج سالێن ده‌ستهه‌لاتێ دا، هه‌رتشت ژ خرابيێ به‌ره‌ڤ خرابترێ دچيتن، ده‌ستهه‌لاتا لناڤا گه‌نده‌لى و تالان و وێرانكرنێ، خه‌ريكه‌ هه‌مى بنه‌مايكێن نه‌توايه‌تى و نيشتيمانى و مروڤايه‌تى و ئه‌خلاقى، بته‌مامى ژ ده‌ست ببه‌تن و ببيتن ده‌ستهه‌لاته‌كا دكتاتورا گه‌نده‌لا مافياوى و تاكو ببيتن ده‌ستهه‌لاته‌كا جاش ئه‌قليمى، ته‌ماشا بكه‌ن، شوينا پشته‌ڤانيا گه‌ل و ملله‌تێ خو بكه‌ن و پرسێن ديموكراتى و بهايێن مروڤايه‌تى پێشدا ببه‌ن و سه‌ربێخن، كوردستان كريه‌ مه‌يدانه‌كا ڤه‌كرى بۆ دام و ده‌زگه‌هێن ئه‌قليمى، بده‌هان دام و ده‌زگه‌هێن ئه‌منى و جاسوسيێن ناڤده‌وله‌تى و ئه‌قليمى، وه‌لات كريه‌ كوزه‌كا بێ په‌رجان و وه‌لاته‌كێ تورى كرى ، رۆژ بۆ رۆژێ كه‌ساتيا مروڤێ كورد و كوردستانى دهێتن شكاند و بهايێن ديموكراتى دهێنه‌ چنه‌كرن، ئه‌رێ گه‌لا وه‌لاته‌ك بڤان پارت و بڤێ ئيداره‌يا گه‌نى و رزى، بڤان هزرێن دووئالى و پاشڤه‌رۆى، كه‌نگى وه‌لات پاراستيه‌، كه‌نگى ژيان هه‌يه‌، كه‌نگى مروڤاتى هه‌يه‌، كه‌نگى ماف و ئازادى هه‌نه‌، دكولاتيا سالێن بۆرى دا سه‌روبه‌رێ دادوه‌رى و عه‌داله‌تا جڤاكى كويله‌ و وێرانه‌يه‌، دام و ده‌زگه‌هێن ده‌ستهه‌لاتێ دهه‌لوه‌شان و كه‌ڤتنه‌كا حه‌تمى دانه‌، ره‌وشا له‌شكه‌رى، كريزا پێشمه‌رگه‌ى، ژ خرابيێ به‌ره‌ڤ خرابترێ دچيتن، دام و ده‌زگه‌هێن ئه‌منى شه‌خصه‌نه‌ و ئاليگرن، جڤاكێ مه‌ده‌نى، رێكخراوێن مافێ مروڤ و مه‌ده‌نى بته‌مامى هاتينه‌ حزبى و شه‌خصه‌نه‌كرن، ئه‌ڤ وه‌لاتێ كانيا زێرێ ره‌ش و به‌هشتا تژى سه‌روه‌ت و سامانێن سه‌ر ئه‌ردى و بن ئه‌ردى، شوينا بۆ خوشحاليا خه‌لكى بهێتن بكار ئيناندن، بۆ خرابكرن و وێرانكرنا ره‌وشا وه‌لاتى دهێنه‌ بكارئيناندن، بۆ زه‌نگين كرنا كه‌سێن خوپه‌رست و نيشتيمان فروش دهێنه‌ بكار ئيناندن، سه‌روه‌ت و سامانێ وه‌لاتێ مه‌، نه‌يارێن وه‌لاتێ مه‌ پێ دهێن زه‌نگي كرن، وه‌لاتێ مه‌ پێ دهێتن خرابكرن، خه‌لكێ مه‌ پێ دهێتن كوشتن و قه‌تل و عام كرن، وه‌لات يێ وێران دبيتن، ها چ نه‌مايه‌ دێ برس ل ڤى وه‌لاتى به‌لاڤ بيتن، ئه‌و وه‌لاتێ به‌هشتا سه‌ردونيا يێ، يا بوخه‌لكێ خو دبيتن دوزه‌خ، بسه‌دان وبهه‌زاران خه‌لكێ ڤى وه‌لاتى، يێ وه‌لاتێ خو بجهدهێليتن و به‌ره‌ڤ هه‌نده‌رانێ دچيتن، ل سه‌ر سنوران دبنه‌ خارنا گورگ و ده‌هبان، لوغمه‌ و (تى ئێن تى) يێ لاشێن وان پارچه‌ پارچه‌ دكه‌ن، ده‌ريا هارا ئيجه‌ رۆژێ بده‌هان لاشێن گه‌نج و لاوێن مه‌ دادعويريتن و هندا دكه‌تن، دئاليێ دى دا ده‌ستهه‌لات و سه‌رێن ده‌ستهه‌لاتێ، به‌رده‌وامن ل سه‌ر ده‌هودورا خۆ، خه‌لكێ خو بكوشتن دده‌ن و خوپێ زه‌نگين دكه‌ن و رۆژانه‌ بهه‌زاره‌ها گه‌ريانێن مه‌كوكى، سه‌يرانێن وه‌لاتێن بيانى، رابوراندن و به‌زم و له‌زه‌تێ دگه‌ل سوزانيێن تورك و عه‌ره‌ب و فارسى دكه‌ن و بمليونان دولارێ به‌رهه‌مێ خوهوخوينا پێشمه‌رگه‌ و خه‌لكێ مه‌يێ كورد و كورستان په‌روه‌، بسه‌رێ كچ و ژنێن ده‌همه‌نپسدا وه‌ردكه‌ن…بن ده‌ستيا وه‌لاتى، برسيكرنا خه‌لكى، كوشتن و مرنا خه‌لكێ وه‌لات په‌روه‌ر، ل ده‌ڤ وان نه‌پرسه‌ و نه‌خه‌مه‌…..له‌ومانێ، گه‌لێ مه‌يێ كورد و كوردستانى په‌روه‌ر، گه‌لێ مه‌يێ ئازا و ماف په‌روه‌ر، گه‌لێ مه‌يێ بشه‌ره‌ف و بئه‌خلاق…گه‌ره‌كه‌ ل خو، خودان ده‌ركه‌ڤيتن، پرسێ ل ماف و ئازاديێن خو بكه‌تن، خوبده‌ن ئێك و ئێكه‌تيا خۆ درۆست بكه‌ن، سازيێن خويێن سياسى بساخله‌مى، برون و زه‌لالى دروست بكه‌ن، بهزره‌كا ديموكراتى، بروحه‌كا تژى به‌رخودان، بچالاكيێن تژى جه‌ساره‌ت‌، به‌ديله‌كێ ديموكراتى دروست بكه‌ن، ته‌ڤگه‌ره‌كا بۆێره‌ك و تژى جوش و چالاكى دروست بكه‌ن، ببن خودان به‌رنامه‌ و پرۆگرامێن زه‌لال و ساخله‌م، بساخله‌مى و بروحه‌كا تژى فيداكارى بكه‌ڤن خه‌بات و به‌رخودانه‌كا تژى جه‌ساره‌ت…ده‌م بله‌زه‌، ده‌م دچيتن و خو لمه‌ ناگريتن، دڤێتن هه‌رچ زويه‌ گه‌ل سازيێن خويێن سياسى، بساخله‌مى ئاماده‌ بكه‌تن و دڤێتن گه‌ل و حه‌ره‌كا خه‌لكێ كوردستانێ ببيتن خودان پرۆژه‌، ل ده‌مێ دبێژين پرۆژه‌، يانى پرۆژێن ديمكراسى و بزانين و زانسته‌كا ساخله‌م و سه‌رده‌م، بروحه‌كا ديموكراتى، بهه‌يه‌ژانه‌كا تژى بزاڤ و خوگورى كرن، ئه‌م هه‌مى بكه‌ڤين خه‌باتێ، ئاماده‌ى قوربانى دانێ بين، به‌لێ دڤێتن ئه‌م هه‌مى ئاماده‌بين قوربانيا بده‌ين، بۆ وه‌لاتێ خو، بو خه‌لكێ خو، بۆ مروڤاتيێ، بۆ كورد و بۆ كورستانه‌كا خودان ساخله‌مى و خودان بهايێن خو يێن مادى و مروڤايه‌تى، خو گورى كرن، بۆ وه‌لاتى، بۆ ساخ كرنا كه‌ساتيا مروڤێ كورد و كورستانى، ئه‌ركه‌كێ نه‌ته‌وه‌يى، دينى، نيشتيمانى، مروڤايه‌تى و تاكو ئه‌خلاقيه‌….مروڤێ كورد و كوردستانى، مروڤه‌كێ بهێز و ساخله‌مبه‌، سه‌ران و ده‌ستهه‌لاتدارێن كه‌ڤتى و گه‌نده‌ل، كه‌ساتيا وان هێزا وان، دناڤا واندا هندا و چونه‌ كريه‌، ئه‌ركه‌ ل سه‌ر مه‌ ئه‌م بجه‌ساره‌ت، رۆيبرۆى هه‌مى ئاسته‌نگيان ببين، ته‌نگاڤيان راكه‌ين، تاكى كورد و كوردستانى، بكه‌ين خودان كه‌ساتيا وى يا هشيار و تژى جه‌ساره‌ت، خه‌بات فه‌رو گرنگه‌، خه‌باته‌كا ساخله‌م و تژى قوربانى مه‌ پێ مه‌به‌سته‌، ئێدى كويلاتى به‌سه‌، ياسا شكێنى به‌سه‌، مه‌ وه‌لاته‌كێ ئازاد و بماف و ئه‌ركێن ژ هه‌ژى دڤێتن، وه‌لاته‌كێ ئازاد و ديموكراتى، ده‌وله‌تا ياسايێ و روحا يه‌كسانى و دادڤانيا ئابورى جڤاكى، سياسى، مه‌ پێ مه‌به‌سته‌، له‌شكه‌ره‌كێ يه‌كگرتى و نيشتيمانى، ئاسايشه‌كا نيشتيمانى مه‌ پێ مه‌به‌سته‌…بۆ داديێ، بۆ بجهكرنا ياسايێ، بۆ سه‌روه‌رى كرنا وه‌لاتى، بۆ بهێز كرنا رۆحا هاولاتيى بونه‌كا تژى حه‌ز ژێ كرن، مه‌ پێ مه‌به‌ست و ئه‌رمانج هه‌نه‌…ئه‌ڤجار بلا كه‌لهێن دكتاتوريه‌تێ، ده‌ستهه‌لاتا گه‌نده‌ل و مافيا وى و دزى و تالانچى، جاش ئه‌قليمه‌يه‌ت…بلا بدوميك بێن و جهگره‌كێ ديموكراتى و ساخله‌م جهێ وان بگريتن، تاكو ماف و ئازادى و روحا ديموكراتيزه‌كرنێ و ئه‌رك و مافێن هاوولاتى بونێ ل ڤى وه‌لاتى دپاراستى و گه‌ره‌نتى كرى بن، ئه‌م ژى وه‌كى گه‌لێن ده‌ڤه‌رێ و دونيايێ ببن خودان ستاتو، خودان ده‌ستهه‌لاتا خويا ساخله‌م و ديموكراتى و شه‌فاف…ل دوماهيكى هه‌ربژيتن جهگره‌كێ ديموكراتى و زامنێ ماف و ئازاديێن ڤى خه‌لكى و ڤى وه‌لاتى.

اكرم خالد عبدالكريم(سيد اكرم)/دهوك
3 / 3 / 2016