شه‌ره‌نيخا حزبان، مه‌يدانه‌ك گه‌رم، ناڤه‌روك سته‌وره…!ا
شه‌ره‌نيخا حزبان، مه‌يدانه‌ك گه‌رم، ناڤه‌روك سته‌وره…!ا
سالا 1961ز ئێكه‌مين شوره‌شا ملله‌تێ كورد ده‌ستپێ دكه‌تن، بسه‌روكاتيا مه‌لا مسته‌فايێ بارزانى و رابه‌ريا پارتى ديموكراتى كوردستان، ئه‌ڤ شوره‌شه ژ به‌رئه‌نجامێ كاودانه‌كێ ناڤخويى و عێراقى و هه‌رێمى هاته به‌رپا كرن، هه‌رچه‌نده بمن وه‌ره نه‌دبو هاتبايه كرن و ئه‌گه‌ر بابه‌تيانه و زانستيانه و ل گوره‌ى ئه‌خلاقييات و به‌رژه‌وه‌نديێن كوردى و عێرقى هه‌لسوكه‌ڤت و سياسه‌ت هاتبايه كرن، بمن وه‌ره ده‌ليڤێن باش هه‌بوون بو كوردا، خزمه‌تا باشترێ بو گه‌ل و وه‌لات و دوزا خوه كربايه، چونكى عه‌بدالكريم قاسم عێراقيه‌كێ موخلص بو، هه‌سته‌كا باش هه‌بويه بو خزمه‌تكرن و پێشدابرنا ژيان و پێكڤه‌ژيان و وه‌رارا وه‌لات پارێزيێ بره‌نگێ ته‌ڤايى، لێ بمن وه‌ره كورد، نه‌خاسم پارتى ديموكراتى كوردستان يان به‌شه‌ك ژ ڤێ پارتيێ كه‌ڤتنه بن كوژمێ ته‌يارێ عه‌شائير گه‌رى و خوپه‌رستى و سه‌رده‌ريه‌كا ئه‌قلمه‌ندى دگه‌ل ده‌ست و دارێ وى ده‌مى نه‌كر، هه‌رديسان ژى باوه‌ركر ژ پيلانگێريێن ئيرانێ، بنه‌خشه‌رێژيا ساڤاكێ…ل به‌رئه‌نجامێ گه‌له‌ك گوهورى دگه‌ل پيچه‌كێ، غه‌رائيز كرنه پێگوركێن باوه‌رى و ئه‌رناڤان، هوسان بێى كوخو ئاماده‌بكه‌ن، بهنده‌ك پلان و پێلانگێريێن ناڤخويى و عه‌شائير گێرى، ئه‌وا دگوتنێ شوره‌ش ده‌ستپێكر، راسته شوره‌شا ئه‌يلولێ ده‌ستكه‌ڤتێن مه‌زن هه‌بوون، دانپێدانێن دێروكى وبمافا گه‌لێ كوردى وه‌رگرتن، لێ زور تشتێ مه‌زن ژى ژ ده‌ست دا، ژ بلى كوشتن و بريندارى و زيندانيێن هاتن دانێ، پشكه‌كا زورا مه‌زنا ئاخا كوردستانێ هاته هندا كرن و ته‌عريب كرن، تشتێ هه‌رى مه‌زن و برينه‌كا ئازرى و بێ ده‌رمان دلاشێ كورد و كوردستانيان كر، هه‌ر لسالا1967 تاكو به‌ريا سالێن هه‌شتيان بسه‌دان هزار خه‌لكێ كورد و كوردستانى هاتنه ده‌رئێخستن ژ سه‌رمال و حالێ وان و ملك و ئه‌ملاكێن وان ژى هاتنه حجز كرن، بنه‌خاسمه‌يى ترێ ژ به‌غداد بتنێ ل سالا1967ز(67)شێت و حه‌فت هزار كورد ژبه‌غداد هاتنه ده‌ركرن، ل ده‌مه‌كى زێده‌ى نيڤا خه‌لكێ به‌غدا كوردێن فه‌يلى بوون، به‌غداد ل به‌ريا ئيسلامى و تاكو سه‌رده‌مێ خه‌ليفێن عه‌باسى، سێ پشكێن وان كوردێن فه‌يلى بوينه و يا ژ وێ ژى كه‌مباخترێ مال و مللكێ وان هاته ده‌سته‌سه‌ر كرن، وه‌كى ته‌به‌عييا ئيرانى به‌ردانه سه‌ر سنورێن ئيرانێ، بزورى ئاواره‌كرن، ل به‌رئه‌نجامێ ڤێ ژبلى ئه‌و خه‌لكه توشى زيانێن مادى و روحى بو، ته‌عريبه‌كا به‌رنامه‌كرى ل سه‌ر ئه‌ردى هاته په‌ياده‌كرن.
ئه‌م نه‌به‌حسا ئاوايێن برێڤه‌چونا شوره‌شا ئه‌يلولێ دكه‌ين و نه‌ژى ڤه‌كولينێ ده‌ستكه‌ڤت و خه‌ساره‌تيان دكه‌ين…لێ بكورتى دێ تێروانيێن خوه ل بنه‌كوكێن خه‌ساره‌سا ڤێ شوره‌شێ ده‌ينه خوينده‌ڤانێن خوشتڤى، راسته شوره‌شێ پشكه‌كا زورا مه‌زنا ئه‌ردێ كوردستانێ بده‌ست خوڤه‌ئينا، هه‌رديسانێ سياسى و له‌شكه‌رى و ئيدارى و نه‌خاسم دوارێ خاندن و پێگه‌هاندنێ و ناسينا گه‌لێ كوردستان و ئێكه‌تى و تێكه‌لياندا، ده‌ستكه‌ڤتێن باش ژى هه‌بوين، لێ تشتێ هه‌رى خراب و نه‌رێنى ئه‌و بويه، شوره‌ش شوينا ل سه‌ر بنگه‌هێن زانستى(له‌شكه‌رى، ئيدارێ، سياسى، دبلوماسى…) بهێتن برێڤه‌برن و ئيداره كرن، ل سه‌ر بنگه‌هێن عه‌شائيرى و پاشكه‌ڤتى و شه‌خصه‌نه‌كرى هاته ئاڤاكرن و برێڤه‌برن، ئه‌وا دگوتنێ سه‌روكاتيا شوره‌شێ ياريه‌كا ناڤده‌وله‌تى و هه‌رێمى بويه، بويه ل ده‌مێ صه‌دام حوسێن و مه‌حه‌مه‌د ره‌زا په‌هله‌وى، شاهێ ئيرنێ، بده‌ستكاتيا هه‌وارى بومه‌ديه‌ن ل جه‌زائيرى، په‌يمان ل سه‌ر كرى و راگه‌هاندى…ئه‌ڤ شوره‌شه وه‌كى ئاڤاهيه‌كێ هه‌رفوك بسركدا هات و بو ئاشبه‌تلى، ئه‌و ئاماده‌كاريا پارتى ل سالا1946 رێكخستن بو كرى و ل سالا1961 شوره‌ش بوكرى ل سالا1975 ل ئێك ده‌م و بئێك بريار دوماهيك پێهات و ئه‌ڤه باشترين به‌رئه‌نجامێ وێ شه‌خصه‌نێ و كه‌ڤنه شوپيێ بويا مه ئيشاره‌ت بو كرى، واته بارێ شوره‌شێ ژ پندا خوراگريێ ده‌ركه‌ڤت و ئاشبه‌تالى بوجهگر!
ئه‌ڤ شكه‌ستنه نه‌هه‌ر شكه‌ستنه‌كا له‌شكه‌رى و سياسى و ئيدارى بو، به‌لكى شكه‌ستنه‌كا گشتگير و جه‌رگ بر بو، نه‌خاسم دهێلا نه‌ته‌وه‌يى، ده‌رونى، هزرى و تێكشكاندنا كه‌سايه‌تيا مروڤێ كورد و كوردستانى دا…لێ بمن وه‌ره، ئه‌ڤێ شكه‌ستنێ ده‌رگه‌هه‌كێ نوى ڤه‌كربو گه‌ل و ل هه‌مبه‌رى دوزا كورد و كوردستانى و به‌لكى بو عێراقيان ژى بره‌نگه‌كێ گشتگيرى…واته ده‌رفه‌ت هاته خوش كرن، كه‌سايه‌تى و ئاليێن سياسى، ده‌رڤه‌ى رابه‌ريا پارتى و سه‌ركێشيا بارزانى، ل سه‌ر بنگه‌ه و رێگه‌چاره‌سه‌ريێن نوى خه‌باتا خويا سياسى، جه‌ماوه‌رى، له‌شكه‌رى، رێكخستنى…بنياتى بودانن و ده‌ست پێ بكه‌ن…وه‌كى پارتيا سوشيالست برابه‌ريا، كه‌سايه‌تيێ سياسى(سالح يوسڤى)، پوله‌كا گه‌نجان كوردى(پاسوك) دامه‌زراند، ئێكه‌تيا نيشتيمانى برابه‌ريا (مام جلال) ژ سێ پێكهاته‌يێن سوسيه‌ل نيشتيمانى ( كومه‌له، شوره‌ش، خه‌تێ پان..)، پاشى به‌راهيكێن شوره‌شگێرێن حزبا شويعيا عێراقى، حزب الدعوه و هنده‌ك رێكخستن و ته‌ياراتێ كوردى و ئيسلامى وه‌كى (بزاڤا ئيسلامى) و(انصار حزب الدعوه الائيسلاميه)…!
ديار بو ژى(ينك) به‌رئه‌نجامێ بزاڤ و تێكوشانه‌كا هه‌رى مه‌زنا(مام جلال) بويه، دگه‌ل ده‌سته‌يه‌كا كادرو روشنفكرێن كوردستانى، وه‌كى ناوشێروان مسته‌فا، عومه‌ر شێخ موس، عادل موراد، فوئاد مه‌عسوم، عمر سيد على، فه‌ره‌يدون عبالقادر…گه‌له‌ك به‌رێزێن دى( دخازم لمن نه‌گرن، گه‌ر من ناڤێن وان نه‌زانيبيتن، چ مه‌ره‌مێن خراب ژى لپشت ڤى بابه‌تى نينن…ته‌نها ده‌رگه‌ه قوتانه‌كه و به‌س…)، ره‌حمه‌تى(عادل موراد) جاره‌كێ، ئه‌م بوينه مێهڤانێن وى، ئه‌ز بوم دگه‌ل هه‌ڤال(سيروان سه‌عيد)، ل وى ده‌ه‌مى مه به‌ره‌يه‌ك دروست كربو بناڤێ(به‌ره‌ى ديموكراتى گه‌ل)، بو ڤه‌كرنا باره‌گايى ئه‌م چوينه ده‌ڤ و دانه‌يه‌كا پروژه‌ى ژى مه بو بربوو، ره‌حمه‌تى (عادل مراد) بره‌نگه‌كێ نه‌چاڤه‌رێكى كه‌يفخوشيا خو ديار كر و دوپات كر و گووت ئه‌ز بهه‌مى شيان هه‌ڤكارم دگه‌ل هه‌وه‌دا، هه‌رديسان گووت بڤێ هه‌لكه‌ڤتێ من دڤێتن راستيه‌كێ بو هه‌وه ببێژم…گوت ل ده‌مێ ئێكه‌مين كومبون مه كرى بسه‌روكاتيا مام جه‌لال، بو دروست كرنا ئێكه‌تى نيشتيمانى، گوت ئه‌م ل سوريێ بوين و ئه‌م (8)هه‌شت كه‌س بوين، ديسان گوت ماجه‌لال بابه‌ت ڤه‌كر و روهونكرنێن خوه دان، داخازى كر و گوت ره‌ئيێن خو بده‌ن من، كانێ ئه‌م چ ناڤ ل حزبا خو بكه‌ين…ئينا گووت من گوتێ ئه‌م دێ ناڤێ وێ كه‌ين(به‌ره‌ى ديموكراسى گه‌ل)، گووت (ناوشێروان مسته‌فا) ره‌حمه‌ت لێبن، ئێكسه‌ر گووت نا ئه‌م ڤى ناڤى لێ ناكه‌ين، چونكى ئه‌ڤه ناڤێ حزبا(نائيف حه‌واتمێيه)، ل ده‌مێ ئه‌م براگه‌هينين، دێ نه‌يار و هه‌ڤركێن مه ناڤێ ديڤه‌لانكيێ داننه سه‌رمه، پاشى پروژه‌يه‌كێ نڤێسى ژ پاخلا خو ده‌رئينا و گووت، ئه‌م دێ ناڤى كه‌ين(يه‌كێتى نيشتيمانى كوردستان) ناڤه‌كێ باش و گشتگيره و نابيتن كوپى و چاڤلێكرن، بوچ لايه‌نه‌كى ژى، هه‌رديسان گووت ئه‌ڤه ره‌ش نڤێس من نڤێسيه و دا ده‌ستێ مام جه‌لى و هوسا بريار هاته وه‌رگرتن، ئه‌م (ينك)دروست بكه‌ين…كه‌واته هاتن و چوون بو دامه‌زراندنا(ينك) ژ شه‌خصێ(مام جه‌لالى) بويه دگه‌ل كوما هه‌ڤالێن وى، لێ ناڤ و پروژه ژ پێشنيار و وه‌شانا نه‌مر(ناوشێروان)
وه‌كى مه ل ده‌ستپێكێ گوتى ئه‌م دێروكێ نانڤێسين، لێ ئه‌م ديتن و بوچونێن خوه ل سه‌رهنده‌ك ديمه‌ن و بويه‌رێن دێروكێ دده‌ينه ئاشكرا كرن، ل ده‌ستپێكا شوره‌شا گولانێ و نه‌خاسم پشتى له‌شكه‌رێ عێراقێ هاتيه دابه‌شكرن، ل سه‌رانسه‌رى كوردستانێ و سنور گريتن و بنكه و باره‌گايێن خو يێن له‌شكه‌رى دامه‌زراندين، ئێكسه‌ر ده‌ست بگه‌رهان و پشكنينان كرن، ل بيرا منه ل ده‌مێ بو ئێكه‌مين جار باره‌گايه‌كێ له‌شكه‌رێ عێراقێ ل ده‌شتا باتيفا( ل گوندێ مه) هاتيه دامه‌زراندن، چار ره‌بيه ل سه‌رێ نزارێ باتيف ده‌يناندن، سێ ره‌بيه‌ژێ ل ده‌ردورێ گوندى داناندن، سريه‌كا خو ژى ل گوندێ راڤينان دانا، روژا پاشترێ ده‌ست بده‌ركه‌ڤتن و پشكنينان كر، ل وى ده‌مى سه‌رێ بهارێ بو خه‌لكى دورينێن گيايى بو مشتا په‌ز و حه‌يوانێ خوه دكرن، ل وى ده‌مى پشكا هه‌رى زورا زه‌لامان خاك(جلێن پێشمه‌رگه)ى دبه‌ربوون، ل ده‌مێ دهاتن ته‌فتيش كرن، هه‌ركه‌سێ جلێن وى سه‌رملك هه‌بانه، يان شوينا ره‌خت و قاويشان ل سه‌ر مللان هه‌بايه، ددانه به‌رشلاقان و سه‌رمللكێن وان دبرين و سڤكاتى پێ دكر، روژا پاشترێ ژ ده‌ڤه‌را به‌روارى بالا نێزيكى(140)سه‌دوچل كه‌سان ره‌ڤين و خودا چيا و هنده‌ك ژ وان چونه‌باكور(توركيا) ده‌ڤ كه‌س و كارێن خوه، هه‌رديسان ل ده‌ڤه‌رێن سلێمانى و هه‌ولێرى ژى ئه‌ڤ كرياره هاتنه كرن و گه‌لك خه‌لكێ وان ده‌ڤه‌ران ژى خودانه چيا و هوسان مه‌فارزێن چه‌كدارى و بنه‌مايكێن يه‌كه‌يێن(پێشمه‌رگه‌ى) هاتنه دروست كرن، پاشى ده‌ست بچالاكيێن له‌شكه‌رى هاته كرن، هوسانێ بنواشه‌يێ شوره‌شه‌كا دى، بناڤێ شوره‌شا گولانێ هاته ئاڤاكرن.
گولان
گولان هه‌يڤا بهارێ….شين و شادى، ژێ دهێن خارێ
شوره‌شا نوى سه‌رهلدا… نه‌خشێ ئاوات و هيڤيا
پێشمه‌رگه‌ى هلدا چيا…شوره‌ش به‌لاڤ بوو، ل خر جيها
گه‌لێ مه، گه‌له‌ك ئازايه…له‌شكه‌ره‌ك په‌يت و لپيايه
مه هه‌ميان مللدانه ئێك…رێزێن خو باش كرنه ئێك
دێروكه‌ك نوى، مه ده‌ستپێكر…شوره‌شه‌ك خورت مه ژێ چێكر
يا مه ل به‌ربو، نويهاتى بوو…سه‌ركێشيه‌ك، بهوستاكارى
مه نه دزانى شوره‌ش ده‌رده…كه‌مينه و بوسه‌يه، لبه‌ر مه
كوردا هه‌ميان خو كربو ئێك…سه‌ركێشيه‌ك نه‌ساخ و به‌رپێك
ڤان سه‌ر كردان، ئه‌م حه‌لاندين…خوپه‌رێسێن كفش و قرێژى
ئه‌ڤ سه‌ركرده نه‌درێبه‌رن…دز و حيزن، خر دوو سه‌رن
وان دل و مێلاك، لمه حه‌لاند…توڤێ دوژمنكاريێ، لناڤ مه چاند
هه‌ى هاوار شوره‌ش نه‌وايه….كوردينى، قه‌د نه‌هوسايه
وه‌ك دوژمنان يێ دنرن…سه‌رێ ملان ل ئێك دوو دگرن
ل به‌ر دوژمن رويس و موعيزن… بو مه ژى، گورێن ده‌ڤ خوينن
هه‌رده‌م سه‌رێن رێكان دگرن….ئێك و دوو، ژێك دچر چرن
هه‌ى نه ئافه‌رين، سه‌ركرێن مه…ستويێ وه بشكێن، رێبه‌رێن مه
وه وه‌لات دا، داگير كرن….كورد ژێك كرن، ل هه‌ر درا
ئێك روژێ، ئه‌م سه‌ركه‌ڤتينه…روژا دى، شكه‌ستى و برسينه
دێروكا خو، قه‌د ناخوينن…بهزرا گه‌نى و كه‌رب و كينه
شوپا وه، زور بێ رامانه… رێكه‌كا، بكه‌ڤتن و ژانه
سه‌د ساله، دكه‌ين خه‌باتێ… شوره‌شه‌ك، بشكه‌ستن و كه‌ڤتن
مێرێ مێرخاس، لناڤ وه‌نينه…رێبه‌رێن رزى و كه‌ڤتينه
گه‌ل جاره‌ك دى، رابيت سه‌رپيا….خر گوندى دگه‌ل باژێريان
به‌رنامه‌ك باش، هوين بخو ژچێكه‌ن…رێكا خو، زه‌لال به‌يان كه‌ن
گه‌لێ كورد و كوردستانى…..به‌هدينى و پاش سورانى
لرو و كه‌لهور و گورانى…شه‌ڤ و روژان، هوين بكه‌نه ئێك
ئاخا خو، ڤێتن رزگار كه‌ين….گه‌له‌ك ئازا، باش ئاڤا كه‌ين
ئازاديا هزرو بيران….نان و ئاڤ، پاشى لپاش وان
ئه‌وا مه گوهلێ بوو، بومه دهاته ڤه‌گێران، شوره‌شا گولانێ، بشوپ رێڤه‌به‌ريه‌كا نوى هاتيه بينا و ئاڤا كرن، سه‌ركردايه‌تيه‌كا كاتى، برێبه‌ره‌كێ نويهاتى، راسته خارى و خه‌له‌تى زور هه‌بون، ل ڤێره موختاره‌ك بێ دادگه‌ه بدار ڤه دكر، ل وێرهاهه‌نێ هنده‌كێن دى دهاتن شه‌لاندن و به‌رزه‌كرن، ژ بلى به‌رتيل و ره‌شوه و وه‌رگرتنا يارمه‌تى و ئابونان بناڤێ شوره‌ش و بو پشته‌ڤانيا پێشمه‌رگه‌ى…ئه‌ڤێ ژى چه‌ند راستى و نه راستى تێدا هه‌بوون، لێ وێ ژى هنده‌ك رێك و پنى كرن، بو دهاتن كرن…لێ پشتى كونگرێ (9)نه‌هيێ يێ پارتى، ئێدى رێ و رێبه‌رى بونه تاس و حه‌مامه‌كا دى، بو په‌رێ وه‌كى به‌رێ…. ل ده‌مه‌كى مستويى ژنخالا خو ره‌ڤاند، بره ده‌ڤ مه‌لايى دا بو ماره بكه‌تن…مه‌لايى گوتێ كورا مستا ما ئه‌ڤه نه‌ژن خالا ته‌يه ! لمالا خالێ، تود خوى و ڤه‌دخويى! تو نه ڤه‌حه‌ويايێ وى بوى! ديسان گوتێ به‌لێ…ئێ گوتێ مستا ئه‌ڤه چێنابيتن! مستوى گوتێ مه‌لا چێكه! ئه‌ز دبه‌ختێ ته‌مه چێكه! مه‌لايى ديسان گوتێ مستا شه‌رع قه‌بيل ناكه‌تن! ناهێتن مه‌هر كرن، ديسان مستويى گوتێ، مه‌لا، هه‌ى مال ئاڤا دێ رێكه‌كێ ببينه و چێكه! ئه‌رێ مه‌لا بوچى دشيڤكێ دا چێبو، ل وێره دروست بو، مه شولا خويا دگه‌لك دا كرى! ئه‌رێ مه‌لايێ من، هه‌ى رحا من بو چى ل ده‌ڤ ته چێنابيتن! ماتويى به‌خيلى، دێ توژى رێكه‌كێ بو مه ببينه! من و ژنخالێ ژ ڤێ موشكيلێ ده‌رباز بكه! ولاهى مه‌لايى چێنه‌كر! ئينا خارزا و ژن خال هه‌ردووك هاتن كوشتن…!!
دگه‌ل كوشتنا خارزا و ژن خالێ، شوره‌شا گولانێ ژى هاته كوشتن!! ئه‌و بو سامى شه‌نگارى و ده‌ستيه‌كا سه‌روكاتيا كاتى، جلێن خوه ل مللێ خوه كرن، به‌ره‌ڤ سوريێ و بو دامه‌زرندنا پارتى گه‌ل!! پارتى ديموكراتى كوردستان، دكونگرێ نه‌هێ دا ئينشقاق كه‌ڤتێ، پارتيه‌كا كه‌ڤنار و پارتيه‌كا نوى هاتى، ژێ هاتن دروست كرن، يانى جاره‌كا دى ژێكڤه‌بوون و نويى ئاڤابونا شه‌ره‌كێ نويى و خه‌باته‌كا پرى خوين، پرى گرتن و بدار ڤه‌كرن…كه‌را نه‌مره تاكو كيڤار شين دبن..!!
ئه‌گه‌ر ئه‌ز يێ خه‌له‌ت نه‌بم! سالا 1981 بو، سه‌لمانێ برايێ من، هاتبو بريندار كرن، ئه‌و ده‌مه‌ك بو دهاته چاره‌سه‌ر كرن، ئه‌ز و ئيسف هه‌دێنه‌يى چوين دا سه‌ردا وان بكه‌ين، ئه‌م گه‌هشتينێ و دگه‌ل واندا ده‌ربازى جادا(زاخو، كانيماسێ)بوين، لوى ده‌مى دگوتنێ پشت جادێ يان ده‌ڤه‌را رزگار كرى، ل گوندێ هه‌دێنه هێزێن پارتى و تايبه‌تى يێن بسه‌ر ليژنا ناوچا ئامێديێ، ل وێره خرڤه دبون، نێزيكى(12)دوازده هێزا(رێكخراوا)، پێشمه‌رگێ وان ل وان ده‌ردوران خرڤه‌دبون و لواران به‌لاڤ دبون، گه‌له‌ك به‌رپرسێن وان هاتن لايێ مه، ئه‌م دگه‌لك دا روينشتين، گه‌له‌ك بابه‌ت هاتن گفتو گو كرن، مه داخاز ژێ كر شه‌رى نه‌كه‌ن، بلا براكوژى دروست نه‌بيتن! بلا ده‌رفه‌ت هه‌بيتن هێزێن نوى و بير و هزرێن نوى بهێن مه‌يدانێ و خه‌بات بلا بهێتن ره‌نگا و ره‌نگ كرن، پشكا هه‌رى زورا وان دگه‌ل مه‌دا هه‌ڤرابوون، هه‌تا ديار بو هنده‌ك ژ وان به‌رپرسا دگه‌ل جه‌ماعه‌تێن سامى دا، ژێربه‌ژێر كار دكرن….بهه‌رحال شه‌ر دروست بو، جه‌ماعه‌تێن سامى شكه‌ستن و پارتى سه‌ركه‌ڤتن!
لێ پشتى به‌ره‌يێ (جود) و به‌ره‌يێ (جه‌وقه‌ت) دروست بوين! ل سالا1986پێكهاتنه هاته كرن و جاره‌كا دى ده‌رفه‌ت دروست بون، حزبێن كوردى لباشور پێكڤه كار بكه‌ن، ل به‌هدينان ژبلى هێزێن پارتى، هێزێن(يتك)و هێزێن(پارتى گه‌ل)ژى هاتن و پێكڤه كه‌ڤتنه كار و چالاكييان، گرنگترين چالاكى، گرتنا فه‌وجا سوتكى، گرتنا كانيماسێ، گرتنا فه‌وجا ئيسڤكا، گرتنا فه‌وجا دێمكا، گرتنا مه‌تارا بامه‌رنێ…واته خه‌بات و پێكڤه كار كرن، بره‌نگه‌كى ژ ره‌نگان پێشكه‌ڤتن و سه‌ركه‌ڤتن دگه‌ل خودا ئيناندن، ئه‌و ژى چه‌ندين ئه‌گه‌ر هه‌بوون، گرنگترينێ وان، شه‌رێ هه‌شت ساليێ ئيران – عێراق بويه!
پشتى خومه‌ينى كاسێ ژه‌هرێ ڤه‌خارى و دگه‌ل عێراقێ پێك هاتى، عێراقێ هێزێن خوه ژ به‌ره‌يێ ئيرانێ كێم كرن، نه‌خشه‌يێ ئه‌نفال كرنا كوردستانێ ده‌ست پێكرن، پشتى قوناغێن ئه‌نفال و كيميا بارانا سه‌ركوردستانێ و نه‌خاسم ل هه‌له‌بچه، هاتيه په‌ياده‌كرن، شوره‌شا گولانێ بته‌مامى شكه‌ستن خار، هنده‌كا دگوتنێ شكه‌ستنا له‌شكه‌رى، لێ ئه‌وا راست و دروست، ئه‌ڤ شكه‌ستنه، شكه‌ستنه‌ك و كاره‌ساته‌كا مروڤى و سياسى و پاشى له‌شكه‌رى بو! ئه‌گه‌رێ هه‌رى سه‌ره‌كى، ژ نه‌زاين و خه‌مسارى… نه‌خاندنا سياسى و لوجيكى بو! خه‌لكى دكره گازى و هه‌وار و دگوتن بابو صه‌دام، دێ هێرشێ كه‌ڤتن سه‌ركوردان و ئه‌نفال دێ دروست بن! لێ سه‌روك و سه‌ركردێ شوره‌شێ دگوت! چ راستى بونينن، مورتاح بن، ئه‌گه‌ر هوين نه‌وێرن، دا هێزه‌كێ، وه‌كى جهگر ل شوينا هه‌وه بشينم!
ل به‌رئه‌نجامى(183000)سه‌دوهه‌شتێ و سێ هزار خه‌لك ئه‌نفال و بێ سه‌رو بێ شوين بوون، بسه‌دان هزار خه‌لكێ ده‌ڤه‌رێن رزگار كرى په‌نابه‌رى ئيران و توركيا بو! ده‌ڤه‌ر بئێكجاره‌كى ژ پێشمه‌رگه‌ى هاته خالى كرن، چه‌نده‌ك پێشمه‌رگێن كێم نه‌بن، خونه‌په‌نى كرن، ل خالێن سه‌رسنوى و ئه‌و ژى نه‌بمرن و نه‌ژى بژين!
هوسان بو جارا دووێ شوره‌شا كوردى، كه‌ڤته ناڤا شكه‌ستنه‌كا مه‌زنا بێ ناڤبر، هه‌ر بده‌ستێن وان قه‌ساب و وان سه‌ربرا، دوو باره سه‌رێ كوردان هاته برين! تشتێ ژ وێ خرابتر و وێرانتر، ل شوينا ئه‌ڤ سه‌ركرده‌يه بهێن ده‌ركرن و بدار ڤه كرن، جاره‌كا دى سوارێ شه‌پولێ بزاڤا ئازاديخوازيا گه‌لێ كوردى بون و گه‌ميا كوردان ژ مرنه‌كێ به‌ره‌ڤ مرنه‌كا خرابتر و وێرانترێ هاژوت و كه‌ڤتنه ركابه‌ريا سه‌ركێشيێ، نه ژخ و شه‌رم كرن و نه‌ژى خو گونه‌هبار ديتن!
سه‌ركێشن، شوره‌شگێرن
سه‌ركێشن، شوره‌شگێرن…ل پێشيا خو نا نێرن
وان گه‌لێ خوه، سه‌رژێكر…ده‌ربه‌ده‌ر، ئاواره كر
ڤان سه‌ركێشێن خوليسه‌ر….ئه‌و بێ ره‌حمن، نه‌به‌شه‌ر
دوژمنكارى زێده كر… گه‌ل كره، ئه‌هلێ پارى
ئه‌و بخو دزێن موغلاجى…ژ شه‌ره‌فا خو دشويشتينه
سه‌رێ وان تژى كايه … ل ده‌ڤ وان شوره‌ش وه‌هايه
باوه‌ر يا وان چ نينه… خوليسه‌ران، دبرسينه
پول پول گه‌لێ مه دكوژن… چاڤێن وان هه‌رد گرتينه
هه‌ر ل سه‌ر رێكه‌ك خارن… بێ وژدانێن كه‌دخورن
ژ روبيشتێ كورد نينن… چ مێر لناڤا وان نينن
سه‌ر شورێن پاته‌خوه‌رن…ژ گه‌لێ خوه‌يى ڤه‌ده‌رن
ئه‌وان توڤێ كوردا شويشت…بێ پشت كرن راو رويت
هه‌ر ده‌م كارێ وان ئه‌وه… ژبو دوژمنان دبه‌ده‌ون
گه‌لێ كوردان هشيار بن… هه‌مى رابن سه‌رپيان
ڤان بێ شه‌رمان ده‌ربكه‌ن… توڤێ وان ريشه كێش كه‌ن
فايدێ مه، دوان دا نينه… دوژمنان، بو مه دئينن
نه‌يارتيێ دچينن … دوژمناتيێ دچينن
پشتى ڤێ شكه‌ستنێ، راسته ل ڤێره و وێراهه‌نێ، ده‌نگه ده‌نگه‌ك هه‌بو، هنده‌ك جاران ته‌ق و توقه‌ك ژى هه‌بو! لێ ئه‌وا دبێژنێ شوره‌ش و به‌رده‌واميا شوره‌شێ، دره‌وه‌ك بو، چ ژبو نه‌بو! تاكو عێراق كه‌ڤتيه كوێتێ و كوێت داگير كرى، ئێدى كومه‌لگه‌هێ ده‌وله‌تى رابو سه‌ر خو، توفانه‌ك ل سه‌ر سه‌دامى و رژێما وى راكر، كاودان خوشكرن، سه‌رهه‌لدانێن شيعان لباشور و ل ناڤه‌ندا عێراقێ ره‌نگڤه‌دان و ده‌نگڤه‌دانێ خوه هه‌بيتن..ژ نوى و جاره‌كا حزبێن كوردى، په‌نابه‌رێن كوردى ژى رابونه سه‌رخوه، تڤه‌نگ و سمينوفێن خوه ل سه‌ر مللێن خوه داندن، عێراق تولكيڤه ئه‌ڤه ئه‌م هاتين، ئه‌ڤێ سه‌رهلدانێ دوو مفا بو وان هه‌بون، يائێكێ سێڤ چنين ژ به‌لا وان ڤه‌بوو! يا دووێ هاتنه سه‌ر كاسكا زه‌رك! په‌رێ وه‌ك به‌رێ هه‌يدا كه‌له‌پويرى و تالان كرن و دزى بونه عورف و عه‌ده‌ت!
راسته به‌رهه‌مێ ئه‌ڤێ سه‌رهه‌لدانا جه‌ماوه‌رى، رزاگار كرنا چار پارێزگه‌هێن كوردى(سلێمانى، هه‌ولێر، دهوك، كه‌ركوك) بوون، لێ دئاله‌كى دا، ئازاد كرنا باژێرێ نه‌فتيێ كه‌ركوكێ پلانێن ناڤده‌وله‌تى گوهارتن و سه‌ره و ژێر كرن، دئاليێ دى دا، سياسه‌تێ سه‌رهشكى و دزين و تالان كرنێ، سه‌رێ سه‌رهه‌لدانا دێروكيا سالا1991ز خار، سه‌ركه‌ڤتن بو كوچا مليونى!!
واته دوو شكه‌ستن بونه سێ شكه‌ستن، لێ بريارا نه‌ته‌وه‌يێن ئێكگرتى(656)، خليانا ڤێ شكه‌ستنێ پيچه‌ك ڤه‌گرت و جه‌براند، بريارا پاراستنا هێلێن ته‌ناهيێ، هاته راگه‌هاندن و ئێدى ئه‌ڤ ره‌ڤا مه‌زن! جاره‌كا دى بخو كره شانازى و پێگوتن و مه‌دحو سه‌نا پێ كرن! زێره‌ڤان كوڤلى هه‌رده‌م دگوت:- ژنا قه‌حبه، بتنێ زه‌حمه‌تا وێ گانا ئێكێيه! يا دووێ و سيێ و دسه‌ردا، شه‌رم ناكه‌تن و لنگێن وێ هه‌رده‌م لبانه! ئه‌ڤان سه‌ركێشێن مه‌ژى، قوتابيێن خاندنگه‌ها شكه‌ستن و فهێتيان بوون، باش هاتبونه په‌روه‌رده كرن ل سه‌ر بێ ناڤى و شكه‌ستنان! له‌ومان سيارى كورسكێ بون و قونا خودا بايى و سيارى وه‌لات و ملله‌تێ خوه بوون!
ملله‌ت ژى هند بونه په‌زێ مه‌خه‌لێ و هنده‌ك ژى بونه شوپدارێن وان و زك و بن زكێن وان ڤه‌مالين و دامالين، يێن دزانى و خونه‌دايه مه‌خه‌لاوان، رێكا ئازدى و هزروبير و مێرخاسيێ بو خو هه‌لبژاتى، خه‌لاتێ وان بونه گرتن، كوشتن، به‌رزه‌كرن، يان ژى هاتنه شكادن و چنه‌كرن!
هايى وه‌لاتا…هات و باتا…بێ خودانا…كه‌سه‌ك لتانا ته‌نه‌هاتا…كارێ ته بويه ترس و ره‌ڤ…تالان دبى..وێران دبى…كه‌نگى روژا ته دێ هه‌لێت…يان دێ هێتن يان ناهێتن… هاى وه‌لاتا…هايى وه‌لاتا…..
