بورزگاربونه‌كا وژدانى….!!ا
دونيا دبزڤينه‌كا زور بله‌زدايه! نه‌خشه‌يێ گورينكاريێن رۆژهه‌لاتا ناڤين ل گوپيتكێ دايه، كوردستان لبن مه‌ستريا دوژمنكاريا مه‌زن هه‌ناسێ هه‌ل د كێشيتن! نه‌خشه‌رێگايه‌كێ كوردى، كوردستانى تاكه چاره‌سه‌ريه….!!ا
روژهه‌لاتا ناڤين گرنگيه‌كا دێروكى، شوينه‌وارى، كه‌لتورى، ئابورى…بنياتى هه‌يه بو هه‌مى دونيايێ، چ ل چاخێن كه‌ڤن يان ل سه‌رده‌مێ ئه‌م لێ دژين، كوردستان ژى دلێ روژهه‌لاتا ناڤينه و خودانێ خوه سه‌روچاوه‌يێن مروڤى، ئابورى، له‌شكه‌رى و ئه‌منى…هه‌مى ئاليه، بونا وێ هه‌رژ كه‌ڤن تاكو روژا نوكه، بويه مه‌يدانا شه‌ره‌نخ و لێكدانێن ناڤدونيايێ و هه‌ڤركيێن دێروكى و شارستانى لێ هه‌لدايه و بوخوه بويه ئاگر و به‌لا و بوخه‌لكى بويه حه‌وينك و سه‌رچاوه‌يێ ژيانێ و باشترين شاهدێن ئه‌ڤێ چه‌ندێ دێروك و شارستانيه‌تا وێ، وه‌كى قوديكه‌كا روناهيێ بويه‌ر و روپه‌لێن رويدانان سه‌روبنك دكه‌تن و ئاشكرا نيشا چاڤان دده‌تن، نوكه ژى بزڤين و رويدانێن دونيا و نه‌خاسم ژلايێ هێزێن مه‌زن و ده‌وله‌تێن ده‌ڤه‌رێ، ديمه‌نێن مه‌سترين رويدان و گه‌رم و گورترين سه‌رپێهاتى خودهه‌لاڤێژن و وێنێن خوه ديار و به‌لى دكه‌ن، بونا ڤێ گرنگه پێشهات و ديتن بهێنه مناقه‌شه و شروڤه‌كرن، نه‌خاسم ژلايێ شاره‌زا و پسپور و كه‌سانێن په‌يوه‌نديدار…ل گوره‌ى ديتنا خويا كێم، دێ بزاڤێ كه‌م رونڤه‌كرن و شروڤه‌كاريێن خوه ده‌مه ديار كرن، بوێ هيڤيێ خوينه‌وارێ خوشتڤى بابه‌تى زه‌نگين و به‌هره‌مه‌ند بكه‌تن…!!
١- بسه‌ر هه‌ره‌فته‌يا وه‌لاتى(كوردستانێ)دا، رويدان بله‌ز و ئالوزن
رۆژهه‌لاتا ناڤين لڤى سه‌رده‌مى هه‌م بويه‌جهێ به‌رژه‌وه‌نديێن ناڤده‌وله‌تى، هه‌م ژى بويه بنگه‌هێ شه‌ره‌نيخ و لێكدانێن ناڤنه‌ته‌وه‌يى و ناڤ ده‌وله‌تى، بگره‌گه دشه‌رێ ئازاديا عێراقێ دا و ژ سه‌ركار لادانا سه‌دام و ده‌ستهه‌لاتا حزبا به‌عس، هه‌ماهه‌نگى و هاريكاريه‌كا ناڤده‌وله‌تيا مه‌زن هه‌بويه پێترێ ژ(36)ده‌وله‌تا به‌شداريا شه‌رى كريه، ئه‌ڤ شه‌ره ئه‌گه‌ر بناڤ لادانا سه‌روكه‌كێ دكتاور و ده‌ستهه‌لاته‌كا خوينرێژ بيتن، بونا ئازاديا گه‌له‌ك و وه‌لاته‌كێ، لێ دناڤه‌روك دا، ده‌ستپێكه‌ك بويه، بو ڤه‌كرنا رێكه‌ك و رێگه‌چاره‌سه‌ريه‌كا دى، بو نه‌خشه‌يه‌كێ به‌رژه‌وه‌ندخازێ ناڤده‌وله‌تى و هه‌رێمى، بونا هه‌لشكافتنا ده‌ڤه‌ره‌كێ و ديزاينكرنه‌كا دى بويه، بونا سه‌ره‌ژنوى رێ وشوێنه‌كێ گونجايى بهێتن خه‌لق كرن و ئاماده‌سازى بو بهێنه كرن، روژهه‌لاتا ناڤين و كوردستان ، ب نه‌خشه‌يه‌كێ دى و سه‌رژنوى ديزاين كرنا ده‌ڤه‌رێ، بونا به‌رژه‌وه‌نديێن دويرمه‌دا بهێنه بنيات كرن و خێروخێرات بهێنه پشك پشك كرن و ئه‌ڤ پشكه بهێنه گه‌رنتى كرن، چونكى هێزێن ناڤده‌وله‌تى هه‌ر بو ژناڤبرنا سه‌دامى و رژێما وى نه‌هاتبوون، به‌لكى هاتبون تاكو ئه‌وێ بزڤرينن يا نه‌خشه‌يێ سايكس- بيكو و به‌رئه‌نجامێ شه‌رێ جيهانى يێ(ئێك و دوويێ) نه‌شياى ل گوره‌يى به‌رژه‌وه‌نديێن وان دابين و گه‌ره‌نتى بكه‌تن.
گرنگه ژى ئه‌م ڤان زنجيره رويدان و سه‌رپێهاتيان باش بخوينين، باش شروڤه‌بكه‌ين و خاندنێن زانستى و لوجيكى بو بكه‌ين، رويدانێن(11)سبتێمبه‌رێ ل ئه‌مريكا، گره‌ڤا ته‌ڤگه‌را تاليبان، ئوسامه بن لادن و ئه‌يمه‌ن زه‌واهرى و ته‌ڤگه‌را(القاعيده)، بويه‌رێن كه‌شمير و ئوكرانيا، حزبالله و حه‌ماس، ستراتيژيه‌تا پان ئه‌ردوگانيزم و تيروراداعش(كريزو گرێدانێن وان يێن ستراتيژيك هنه)، جه‌بهه‌ت النوسره‌و فيدايێن زه‌نكى و به‌ره‌يێ تيرورستيێ بناڤ(به‌ره‌يێ رزگارى ل روژئاڤايێ ئاڤا فوراتێ)، گروپ و ته‌ڤگه‌رێن ئيسلامى ل سوريێ و ل عێراقێ بره‌نگه‌كێ گشتى…تيرورا ترسناكا هه‌ى دژى مروڤى، دژى وه‌لاتپارێزيێ، دژى شوناس و دژى شوينه‌وار و كه‌لتورێ ده‌ڤه‌رێ و بنه‌خاسمه‌يى دژى خه‌لك و هه‌بونا كوردستانيان…گرنگيا هێلا ستراتيژيا ئابورى و ئه‌منى(نه‌فت، غاز، هێزا سامانى..)، ژ خه‌ليجێ عه‌ره‌بى بو ده‌ريا سپى ناڤه‌راست، ديسان ژئاسيا روژهه‌لات(ئێكه‌تيا سوڤيه‌تا به‌رێ) بو ده‌ريا سپى…ديسان به‌روڤاژيا وێ..په‌ياده‌كرنا خومالى كرنا رێكا بازرگانيه‌كا سودمه‌ندا كه‌ل و په‌لێن ئه‌مريكى و ئه‌وروپى بو روژهه‌لاتا ناڤين…ئه‌ڤ مژاره زور گرنگ و بهادار بهێنه خاندن و شروڤه كرن..نه‌خسم بريارا پايته‌ختبونا(قودسێ) وه‌كى پايته‌ختێ ده‌وله‌تا ئيسرائيلى، ئێكگرتنا بلنداهيێن جولان دگه‌ل ئاخا ده‌وله‌تا ئيسرائيل، ل ده‌مێ بێتن بباوه‌رم هنده‌ك ده‌ڤه‌رێن دى ژى دێ هێنه سه‌ر ئاخا ئيسرائيل…ئه‌ڤه خاله‌كا جه‌وهه‌ريه و دڤێتن كورد و كوردستانى بگرنگيه‌كا زورا مه‌زن لێ نێرين و خاندنێ بو بكه‌ن و گه‌لك ل سه‌ر براوه‌ستن…نه‌خاسم بلنداهيێن جولان ستراتيژيه‌ته‌كا زورا مه‌زن هه‌يه، ئه‌و ئاخ و مه‌نزلگه‌ها كوران(جانپولا)بوينه، دێروكا وان، خوجهێن وێ سياره‌كوردێن بجه‌رگ و خودان مالباتى بوين…گه‌لا ئه‌ڤه هه‌له‌كه بو به‌رفرهه‌بونا ده‌وله‌تا ئيسرائيليا جوهونشين يان ژى كورد و كوردستانيان ژى پشك و شه‌نصه‌كێ وان تێدا هه‌يه….!!ا
بنگه‌هێ كلتور و روشمبيريێ(بابيلون) ل ئيسرائيل، كو ل سه‌رناڤێ ئيمپراتوريه‌ت(بابل)هاتيه داناندن و ئاڤاكرن، زێده‌ى(250000)دوسه‌دوپێنجى هزار جوهيێن(عێراقى) ل وێره عێراقه‌كا نوى ئاڤا دكه‌ن، گه‌لا ئه‌ڤ عێراقه بو كێيه، كى مفادارێ ئێكێيه! عێراقى يان ژى جوهى و ئيسرائيلا مه‌زن، ئه‌ڤێ ژى راڤه‌كرن و شروڤه‌كاريێن زور پێ دڤێن…!!ا
٢. كوردستان زورا گرنگه، نه‌خشه‌رێگايا سايك- بيكو نه‌مايه، گورينكاريێن مه‌زن و هه‌لگرێ بيڤه‌له‌رزه‌كا هه‌رى بترس چاڤه‌رێنه..!
ئه‌گه‌ر ئه‌م هويرنێرينه‌كێ ل كوگايێن نه‌خشه‌سازيێن ناڤده‌وله‌تى بكه‌ين، دێ بينين نه‌خشه و نه‌خشه‌سازيێن هه‌رى زور هه‌نه و بزاڤێن زور ژى هه‌نه ئه‌ڤ نه‌خشه‌يه ل سه‌ر ئاخێ بهێنه داناندن و بنه‌جهى كرن…هه‌رى بالكێش ئه‌وه، ده‌وله‌تێن عه‌ره‌بى، ئيرانى، توركى…كو داگيركه‌رێن سه‌ركينه ل سه‌ر ده‌ڤه‌رێ و هه‌م ژى سه‌ركێشيا تيرورا ئيسلامى دكه‌ن و به‌رژه‌وه‌ندێن خوه يێن نه‌ته‌وه‌يى دئاڤاهيێ ئيسلامێ دا ئاڤاكرنه و ئبسلام هه‌م كريه مللكێ خوه هه‌م ژى تيرورا ده‌ڤه‌رێ پێ دكه‌ن..ژبه‌رهندێ ئه‌ڤان سێ ده‌وله‌ت نه‌توه‌يه لبه‌رگورينێنه و ئه‌و تێكدانا هه‌يى ژى بده‌ست و هزرێن وانان دهێتن په‌ياده‌كرن..بونا ڤێ نه‌خشه‌يێ گورانكاريێن وان، هه‌م دئاليێ ئايديوجى و هه‌م ژى دنه‌خه‌شه‌يێ جوگرافى دا، ئاشكرا كار تێدا دهێتن خويا كرن…لڤێره تشتێ هه‌رى روهن و ئاشكرا، ب به‌ر هه‌ستێن مه دكه‌ڤيتن، ئه‌ڤ سێ ده‌وله‌ت نه‌ته‌وه‌يه هه‌ره‌شه‌نه بو سه‌ر ده‌ڤه‌را روژهه‌لاتا ناڤين، هه‌رديسان هه‌ره‌شه‌نه بو سه‌ر به‌رژه‌وه‌نديێن ناڤده‌وله‌تى…لێ گه‌لێ چارن(گه‌لێ كورد + كوردستانى) گه‌له‌كێ ئاشتيخواز و مافداره، دستراتيژيه‌تا ناڤده‌وله‌تى دا، نه‌يار نه‌يار نينه و ده‌رفه‌ت بوهه‌يه ماف و ئازاديێن خوه بكاربينيتن…چونكى نه‌خه‌ته‌ره(بڤه‌نينه) لبه‌ر بجهكرنا به‌رژه‌وه‌نديێن ناڤده‌وله‌تى و ده‌رفه‌تا وێ ژى هه‌يه هه‌م به‌رژه‌وه‌نديێن خوه بپارێزن و هه‌م ژى به‌رژه‌وه‌نديێن ناڤده‌وله‌تى بپارێزن، ئه‌و ژى يا راسته ده‌ڤه‌را روژهه‌لاتا ناڤين(بنه‌خاسمه‌يه كوردستان) گرنگيه‌كا زورا ستراتيژيا ئابورى و ژيوارى هه‌يه، كوردستان ئه‌و وه‌لاته يێ خه‌ليجێ عه‌ره‌بى دگه‌ل ده‌ريا سپى پێكڤه گرێده‌تن، هه‌رديسانێ ئاسيا ناڤين و ده‌ريا سپى ديسان پێكڤه گرێده‌تن، ئه‌ڤه پێكڤه‌گرێدانه‌كا زورا گرنگه و كورد و هێزێن كوردستانى دكارن ببنه تاكه ئه‌گه‌ر بو پاراستنا ڤان هه‌مى پارسه‌نگ و به‌رژه‌وه‌نديان.
كوردستان وه‌لاته‌كێ زه‌نگينه، ژئاليێ ئابورى و مروڤى و گه‌له‌ك ئاليێن دى، ديسان ژئاليێ فرهه‌تيا (نه‌ته‌وه‌يى، دينى، مه‌زهه‌بى…)زه‌نگين و هه‌مى ره‌نگييه، ئه‌ڤ پرانيا خه‌لكێ ل كوردستانێ ژى دژيتن، گرێدانێن نڤشى، دينى، مروڤايه‌تى دگه‌لك دا هه‌يه، وه‌لات ژى وه‌لاته‌كێ هه‌ڤپشكه و به‌رژه‌ونديدى ژى هه‌م هه‌ڤپشكن و هه‌م ژى تێكئالزى و پێكڤه‌يينه! بوناڤێ ژى سه‌رنجه‌كا ناڤنه‌ته‌وه‌يى و فره‌ئالى هه‌يه، ژبه‌رهندێ ئه‌ڤ فره‌ئاليه‌يه، وێ دخازيتن هه‌ڤكاريه‌ك و پێكڤه‌كاركرنه‌كا هه‌مى ئاليى و هه‌ڤپشك هه‌بيتن، ئه‌گه‌ر نه‌ء! نه‌وه‌لات دهێتن رزگار كرن و نه‌ژى پێكڤه‌ژيانا مروڤى و ئاڤاكرنا ژيانا وه‌ك هه‌ڤى بنه‌جهدبيتن…!!ا
بونا هه‌رئاليه‌كێ ناڤنه‌ته‌وه‌يى و هه‌رێمى بكاريتن به‌رژه‌وه‌نديێن خوه ل گوره‌ى خوه ئاڤا بكه‌تن…هه‌رئێك ژوان ل گوره‌ى خوه مايتێكرنا خوه ل گوره‌ى خوه دكه‌تن…ئيران بهه‌مى هێزا خوه يا ئه‌منى و له‌شكه‌رى و ئابورى مايتێكرنا خوه دكه‌تن و كاتێكرنا خوه ژى هه‌يه، عێراق تاكو راده‌يه‌كێ زور ئێخستيه بن هه‌ژمونا خوه، نه‌خاسم هێزێن(حه‌شدا شه‌عبى) و هنده‌ك هێز و لايه‌نێن دى، بوخوه كرنه چادره‌ك و پاراستنا خوه پێ دكه‌تن، بگره ل باشور، ژ شنگار و سنورێ ئيبراهيم خه‌ليل تاكو دگه‌هيتن خانه‌قين و حاجى ئومه‌ران هێز و هه‌ژمونا وێ هه‌يه…توركيا دئاليێ له‌شكه‌رى و ئابورى و دبلوماسى و زور ئاليێن دى دا، هێزه‌كا وان يازور هه‌يه( بگره بده‌هان و به‌لكى بسه‌دان بنگه‌هێن له‌شكه‌رى، تيمێن ژانده‌ردرمه‌رى هه‌نه و باشور لبن هه‌ژمونگه‌ريا خوه‌دا خه‌ندقانديه و نه‌فه‌سا وێ وه‌رپێچايه ناڤا ده‌ستێ خوه و تاكو راده‌يه‌كى ده‌ستهه‌ڤسار كريه…هێزێن دى يێن ناڤده‌وله‌تى و بنه‌خاسمه‌يى(ئه‌مريكا، روسيا، ئه‌وروپا، صين، ئيسرائيل…) بره‌نگه‌كى ژ ره‌نگان كارتێكرن و هه‌ژمونگه‌ريا وان بخورتى هه‌يه….لێ ديسان ده‌رفه‌تێن مه‌زن ل به‌ر كوردا، لبه‌ر كوردستانيان هه‌نه، خزمه‌تا خوه بكه‌ن، دوزا خوه پێش بێخن، هه‌بونا خوه بنيات و ئاڤه‌دان بكه‌ن…لێ تشتێ هه‌رى جهێ مخابنى و گومانێ ئه‌وه هێزێن كوردستانى و نه‌خاسم لباشور دناڤا سياسه‌ته‌كا نه‌به‌رئاقل و نه‌لوجيكى و نه‌كه‌دوارى دا ژيانێ دكه‌ن، بشاشى سياسه‌تێ دكه‌ن، به‌رژوه‌وه‌نديێن گه‌ل و وه‌لات راپێچاينه ناڤا كولاتيا به‌رژه‌وه‌ندێن كه‌سان و بنه‌مالان، كه‌ڤتينه ناڤا شه‌رنيخ و هه‌ڤركاتيه‌كا نه‌ره‌وا و نه‌مه‌نتيقى…بويه سياسه‌ته‌كا سه‌قه‌ت، ئيداره‌دانه‌كا گه‌نده‌ل، حوكمرانيه‌كا ژبه‌ره‌ڤ پێشڤه بو پاشدا دهێن برێڤه‌برن، سه‌ركه‌ڤتن بوينه دوراندن، شانازى ژى بوينه شه‌رم و خه‌ساره‌تى و ملله‌ت و وه‌لات كه‌ڤتيه به‌ر ده‌ڤێ ره‌ڤده‌گور و حه‌فتيارێن هار و برسى و روژ بو روژێ هه‌لامه‌تێ ترسێ و برسێ زێده‌تر راپێچايه ناڤا ته‌هليكه و مه‌ترسيه‌كا مه‌زنتر و وێرانه‌يترێ…بويه ولات، گه‌ل رزگاربونا وان پێتڤى نه‌خشه و رێگه‌چاره‌سه‌ريێن بله‌ز و تێر و تژيه.
٣- كورد و نه‌خشه رێگايه‌كا كوردستانى
كورد دبارو زروفێن دێروكى و ناله‌باردا توشى شكه‌ستن و لێدانێ بويه، كوردستان ديسان دكاودانه‌كێ ناڤنه‌ته‌وه‌يى دا هاتيه دابه‌ش كرن و توشى پارچه‌پارچه‌بونه‌كا نه‌ره‌وا و نه‌دادپه‌روه‌رى بويه، ئه‌و كاودان زور دژوار بوينه، دوژمنكاريه‌كا زورا مه‌زن ل سه‌ر گه‌ل و وه‌لاتى هاتيه برێڤه‌برن، ئه‌ڤ دابه‌شبونه نه‌بتنێ دابه‌ش بونا ئاخێ و نه‌ته‌وێ بويه، به‌لكى دابه‌شبونه‌كا دينى، مه‌زهه‌بى، كه‌لتورى، زمانه‌وانى، ئه‌خلاقى و ناڤ و ئه‌رناڤى ژى بويه، سياسه‌تا په‌رتكه و به‌لاڤ بكه هاتيه په‌ياده‌كرن، سياسه‌تا قركرنا نڤشى هاتيه په‌ياده‌كرن…بويه برينێن مه‌زن، ئێش و ئازارێن مه‌زن و خه‌تمى كه‌ڤتينه ناڤا جه‌سته‌يێ كورد و كوردستانيان… هه‌رديسان ئه‌و كاودان، ئه‌و كاريگه‌رى، ئه‌و دوژمنكاريا كولاتيا سالان هه‌يه و به‌رده‌وامه، نه‌خاسم دڤى چه‌رخى دا، كو دبێژينێ چه‌رخێ پێشكه‌ڤتنێ، چه‌رخێ ئه‌نترنێت و ئێك گونداتيێ….ئالاڤ و وه‌سائيلێن دوژمنكاريه‌ك دى ل سه‌ر گه‌ل و وه‌لاتێ مه ژى ديسان دووباره‌يى و چه‌نديجارى بوينه، هه‌ردچيتن ژى خه‌ته‌ر و بڤاتيا وان زێده و كاريگه‌ر ترێ دبيتن…بويه گه‌لێ مه، ئاخا مه، پێتڤى رزگاريێ نه، رزگارى ژى نابيتن، ئيلا بمه‌رجێ ئاماده‌كرنا رێگه‌چاره‌سه‌رى و گرتهنه‌به‌را پێره‌هه‌كێ گونجايى…ئه‌و رێك و چاره‌سه‌ريێن دبينم گونجاينه بو خه‌باتا ڤێ قوناخێ، بو رزگارى و ده‌سته‌به‌ريا ماف و ئازاديێن خه‌لك و وه‌لاتى، بكورتى دناڤا ڤان خالان دا دبينم:-
ا. كوردستان چار پارچه‌يه، ژبلى پارچا پێنجا…لێ نوكه باشور بويه سه‌نته‌رێ سياسه‌ت و پياده‌كرنا ماف و ئه‌ركێن مروڤێ كورد و كوردستنى، چونكى هه‌رێمه‌كا ره‌نگه خوسه‌ر هه‌يه…بويه دهێتن خاست پارت و سياسه‌تمه‌دارێن باشورى، خوژشكه‌ستنا خوه رزگار بكه‌ن، ده‌ست ژگه‌نده‌ليێ و جاسوسيه‌ت و دووسه‌رى و سێ سه‌ريێ به‌رده‌ن و خوه رزگار بكه‌ن، پروسه‌يه‌كا چاكساسى و پاكسازيێ( ژ سه‌رى بو بنى) په‌ياده‌بكه‌ن، خوسه‌راست بكه‌ن ژ غش و فه‌سادا ئيدارى، ئه‌قلێ ناڤ و ناڤه‌روكا خوه باش بشون، سياسه‌ته‌كا زانستى و وژدانى پياده‌بكه‌ن و بده‌نه مه‌شاندن، ئه‌و ئيداره‌يا دهێتن كرن، چ بو ئيداره‌دانه‌كا هه‌رێمى يان بو ده‌وله‌تێ بيتن…گه‌ره‌كه خوه سه‌ر راست بكه‌ن، تايبه‌تمه‌نديا خوه ئاڤا بكه‌ن، ل مالێ ماداريێ بكه‌ن، ل عه‌شائيريێ عه‌شيره‌تگه‌رايى، ل ئيدرێ ئيداره‌دانه‌كا ساخله‌م، لناڤا باره‌گايێ حزبى حزبايه‌تى، لناڤا دائيره‌يا له‌شكه‌رى و ئه‌منى ته‌ناهيا وه‌لاتى و پارساستنا هاولاتيبونێ بهێتن په‌ياده‌كرن، لناڤا دادگه‌هێ ياسا بتنێ سه‌روه‌ر بيتن، هه‌مى مايتێكرنێ كه‌سى و حزبى بته‌مامى بهێن پشت گوههاڤێتن، دبلوماسيه‌ته‌كا زانستى و ئاليسه‌نگ، جڤاكه‌كێ ساخله‌م و جڤاكناسيه‌كا سڤيل و ساخله‌م..په‌يوه‌نديێن كورد و كوردستانيان ل سه‌ر بنگه‌هێن به‌رژه‌وه‌نديێن هه‌ڤپشك و هه‌مى ئالى بهێنه دروست كرن و ره‌چاو كرن.
ب- كونگره‌يه‌ك، كوم جڤينه‌ك، په‌رله‌مانه‌ك، يان هه‌رته‌ڤگه‌ره‌كا دى بهێتن ئاڤاكرن، ئه‌ڤ گرێده‌نه دڤێتن هه‌مى پارچێن كوردستانێ، هه‌مى ئاليێن گه‌ل و ملله‌ت، چ لناڤ خوه‌يا وه‌لاتى يان ل ده‌رڤه و ل ئاواره‌بونێ…ئه‌و كوم جڤين بهێتن دروست كرن، يا هه‌مى كورد( بهه‌مى پێكهاته‌يه‌يێ خوه‌يێ سياسى و جڤاكى دناڤ دا جهدگريتن)، هه‌مى ئاليێن دينى و نه‌ته‌وه‌يى و مه‌زهه‌بى و سياسيێن خه‌لكێ كوردستانێ، بره‌نگه‌كێ ئاره‌زومه‌ندانه و ل گوره‌ى پروژه‌يه‌كێ گشت گيرى تێدا به‌شداريێ بكه‌ن و پێكڤه بكارن به‌ره‌ژه‌وه‌ندى و شوپێن خوه يێن نه‌ته‌وه‌يى، دينى، مه‌زهه‌بى، سياسى، جڤاكى…دناڤێ دا هه‌م جهبگرن و هه‌م ژى پاراستنا خوه تێدا بكه‌ن.
ت- دروست كرنا دو جڤاتان، جڤاتا پاراستنا له‌شكه‌رى و ئه‌منى و جڤاتا دبلوماسى و به‌رژه‌وه‌نديێن هه‌ڤپشكێن په‌يوه‌نديێن ده‌رڤه‌يى و ناڤخوه‌يى..ديسان دناڤا ڤان جڤاتان ژى… گه‌ره‌كه هه‌مى پێكهاته‌يێ كورد و كوردستانى جهدناڤدا بگريتن و ديسان بكارن بزاڤێن خوه‌يێن گه‌لى ژى بئاوايه‌كێ سڤيل و ديموكراسى په‌ياده و مماره‌سه بكه‌ن.
پ- ئابورى وه‌به‌رهێنانه‌كا زانستى و پشتگير بو هه‌مى ئاليان بێ هه‌ڤرك و بێ هيچ جوداكايه‌ك، بنه‌بر كرنا قورغكارى و ماتێكرنێن نه‌دروست، ئاڤاكرنا ژێرخانه‌يا وه‌لاتى و نه‌خاسم په‌ره‌پێدانا كه‌رتێ كشتوكالى و مه‌رداريێ، بكارئێخستنا كه‌رتێ كه‌شتوگوزارى و پيشه‌سازى و بيناسازى كرنه‌يه‌كا نمونه‌يى…دروست كرنا رێك وپر و به‌نداناڤا و پروژێن كاره‌با نيشتيمانى و كێمكرنا بهايان ل سه‌ر هاوولاتى، نه‌خاسم بهايێن باجا ده‌رامه‌تى و ئه‌رزانكرنا بهايێ( كاره‌بێ، ئاڤێ، بانزينێ، نانى….)، ڤه‌كرنا ده‌رفه‌تێن كارى و خومالى كرنا ته‌ندروستيا هاوولاتى و بته‌ندروستيه‌كا باش و ئازاديا بازارى ببه‌رچاڤگرتنا به‌رژه‌وه‌نديا هاوولاتى و هه‌مى ره‌نگێن جوداكارى و قورغكرنێ ژ ره‌هوريشالان بهێنه كێشان و ده‌ركرن…كه‌سێ مناسب ل جهێ مناسب بهێتن داناندن و دامه‌زراند، ده‌زگايێن چاڤدێريا مالى و دارايى و ئابورى…نه‌خاسم راگه‌هاندنا ئازاد بته‌مامى بهێنه پشتگيرى و تايبه‌تمه‌ندى كرن، تاكو بكارن بنه ده‌ستهه‌لات و ئيداره بكه‌ڤيتن بن فشار و بن رێسا و ياسايێن داده‌ڤانى و وژدانى.
٤- دوماهيك خال، وه‌سان دبينم، دينه‌مويا گورانكاريان ل باشوره، به‌رپرسياريى ژى ديسان گشتيه لێ پشكا هه‌رى مه‌زن ديسان لباشوره، لباشور ژى گه‌له‌ك نه‌ته‌وه و دين و مه‌زهه‌ب و ئاليێن سياسى جڤاكى…هه‌نه، لێ ل گوره‌ى ديتنا من ديسان به‌رپرسياره‌تا دێروكى، ئه‌خلاقى، سياسى، جڤاكى، بره‌نگه‌كێ سه‌ركى دكه‌ڤيتن سه‌ر سێ ئاليان(( ئاليێ ئێكێ پارتى و لايه‌نگرێن رێكا مه‌لا مسته‌فا بارزانى، ئاليێ دووێ ته‌ڤگه‌را ئازادى و ئاليگرێن عه‌بدولا ئوجولان، ئاليێ سيێ يه‌كێتي نيشتيمانى و ئاليگرێن(ماجلال و ناوشێروان مسته‌فا)…ئه‌گه‌ر ئه‌ڤه ل سه‌ر ئاليه‌ته‌كا گونجاى، ل سه‌ر به‌ركه‌ڤته‌يه‌كا نيشتيمانى رێك بكه‌ڤن، بمن وه‌ره هه‌مى ئاليێن دى، دێ دهاريكار و هه‌ماهه‌نگ بن…هه‌رديسانێ هه‌مى ئاليێن ناڤده‌وله‌تى(ئه‌مريكا، روسيا، ئه‌وروپا…)دێ رێزێ لێ گرن و دگه‌ل دا دهاريكار بن، ل وى ده‌مى هێزێن هه‌رێمى ژى و نه‌خاسم ده‌وله‌تێن ( عه‌ره‌بى، توركيا، ئيران) دێ مه‌جبور بن خو دگه‌ل ره‌وشا كوردستانيان گونجينن..ل وى ده‌مى بياڤێ ده‌وله‌تبونێ، بياڤێ ئێكگرتنا چارپارچه‌يان يان خوگونجاندنا وان پارچێن هه‌يى، دێ بره‌نگه‌كێ باش په‌يدا بن و ره‌وش ئێدى دێ هێدى هێدى سروشتى بيتن و خوگونجاندن ژى دێ په‌يدا بيتن.
مايه بێژين كوردا، خه‌لكێ كوردستانێ چه‌ند به‌رژه‌وه‌ندى هه‌يه دگه‌ل عه‌ره‌با، هندى وێ به‌رژه‌وه‌ندى هه‌نه دگه‌ل هه‌رئێكێ ژ تورك و فارسان(مه‌ره‌م ده‌وله‌تێن وان)، بويه هه‌مى رێڤه‌چوونه‌ك، هه‌مى نه‌خشه و پلانه‌ك پێتڤيه ل سه‌ر بنياته‌كێ ساخله‌م و ل گوره‌ى به‌رژه‌وه‌نديێن ئاليسه‌نگ بهێنه پياده و بينا كرن، بهشمه‌نديا زانستى، بئيداره‌دانه‌كا خه‌لاقى، بێ غش و عيله‌ت، بده‌ست و داره‌كێ شاره‌زا و ساخله‌م، بئنيه‌ته‌كا مروڤايه‌تى و بوژدانه‌كا ناڤ و ناڤه‌روكى، هه‌رتشت سه‌ر راست و بنه‌جهو دروست دبيتن.
