برينا ئه‌ردوگانيزمێ بقوروليته‌يا قه‌نيل تيمار نابيتن…!!٠

اكرم خالد عبدالكريم/سيد اكرم/دهوك

ئه‌ردوگان ژ روبيشته‌ و به‌رباكه‌كێ شێل و بێل سوارى كورسيه‌كا سه‌خته‌بو! جار ميربو جاران ژى فه‌قير، دناڤ و ناڤه‌روكا خوه‌دا، ئيخوانيه‌كێ برسى و ته‌ماعێ كورسيكه‌كا غه‌دار و پاش گه‌نار بوو! دخوه‌دا هه‌لامه‌تێ غازييه‌كێ مه‌نغولى و هه‌لگرێ ئالايێ خيلافه‌تا ئوسمانلى و تورانيه‌ت په‌رست بو! سه‌رێ وى شه‌ما بو، بو ده‌ستهه‌لاتێ خوه‌ دسوت و بو پاره‌ و سه‌رومالێ گشتى، رۆژێ چار ركعه‌ت نڤێژ دكرن، بو دسه‌ردابرنێ رۆڤيه‌كێ فێلباز و بو كورسيكێ هرچه‌كێ نه‌لڤ بوو! خودبێن وى، ل سه‌ر مافێ مروڤ و ديموكراسيه‌ت و ئازادي و دادوه‌ريا جڤاكى و ئابورى بوون، كريارێن وى وه‌حشه‌گه‌ريه‌كا گورگانه‌ بوو، هه‌رده‌م دچوو، وى ده‌ستهه‌لاتا خوه‌يا كه‌سى و بنه‌مالى موكوم دكر و سسته‌مێ ده‌وله‌تێ به‌رته‌نگ و سڤك دكر، سازى و دام و ده‌زگه‌هێن سڤيل و مه‌ده‌نى، ره‌ڤده‌كا حه‌فتيارێن برسى به‌ردانێ، هه‌ر روژ بده‌هان و بگره‌ بسه‌دان سازيێن سڤيل و ده‌زگه‌هێن راگه‌هندكاريێن مه‌ده‌نى داد ئێخستن و كه‌ساتى و سياسيێن ئازاد و وێره‌ك زيندان دكرن، بسه‌دان هزار كه‌ساتيێن به‌رهنگار ئێخستن ناڤا زيندانان و ب سه‌دان هزارێن دى ژ سه‌ركارى ده‌ركرن و مالباتێن وان بێ مه‌عاش و بێ كار هێلان، بهه‌زاره‌ها كه‌ساتيێن دى ژ زولم و غه‌زه‌با وى ره‌ڤين و ده‌ربه‌ده‌رى ئه‌وروپا و دونيا ده‌رڤه‌يى بوون، بهندێ ژى نه‌راوه‌ستيا، بسه‌دان رێكخستنێن تيرورستى مه‌شق و پرچه‌ك كرن و به‌رده‌نا ناڤا وه‌لاتێن ده‌روجيرانێن خوه‌ وه‌كى(عێراق، سوريا، ليبيا، يه‌مه‌ن…)، ئه‌ردوغان بو سولتانێ تيرورێ و ده‌ستهه‌لاتا وى بو خودان كه‌رى و جه‌له‌بێن رێكخستنێن تێرم داعشى…غه‌زه‌ب و ئاگرێ زولما وى ل زور ده‌وله‌ت و جهێن جيهانى ئالزى و ئاريا، نه‌خاسم ل عێراق، سوريه‌، ليبيا، يه‌مه‌ن و بده‌هان جهێن دى، خه‌ونا وى يا ساخ كرنا زه‌لامێ مريێ سولتانێ عوسمانلى و خيلافه‌تا ئيسلامى، وه‌كى شه‌واته‌كێ به‌ربويه‌ ده‌روجيرانێن وى…ژئه‌نجامێ ڤان كار و كريارێن وان، يێن نه‌مروڤايه‌تى، ده‌ستهه‌لاتا ئه‌ردوگانى توشى ئارێشێن سياسى و ئابورى و له‌شكه‌رى بويه‌ دگه‌ل زوربه‌يا ده‌وله‌تێن جيهانێ، نه‌خاسم دگه‌ل ئه‌وروپا بگشتى، دگه‌ل ئه‌مريكا، روسيا، ئيتاليا، يونان، وه‌لاتێن عه‌ره‌بى بگشتى…ژبلى وێ لناڤ خوه‌يا توركيا ژبلى ئارێشێن وى دگه‌ل كوردان، دگه‌ل جه‌ماعه‌تێن فه‌تحولاهى و عه‌دنان ئوكتايى…توشى شكستنه‌كا سياسى و ئيدارى و ئابوريا مه‌زن بويه‌، ليرێ توركيا ب بره‌كا زور دابه‌زيه‌ و بازارێ وان زور كێم بويه‌، ل دوماهيك هه‌لبژارتنێن به‌له‌ديان، رێژه‌يا ده‌نگێن وان زور دابه‌زيه‌ و ل هه‌رئێكێ ژباژێرێ(ئه‌نقه‌ره‌، سته‌مبول، ئه‌زمير، ئه‌ده‌نه‌، مێرسين…)، توشى شكه‌ستنه‌كا زور مه‌زن بويه‌، هه‌رچه‌نده‌ برياره‌ هه‌لبژارتنێن باژێرێ سته‌مبولێ دووباره‌ بكه‌ن، لێ دهێتن چاڤه‌رێ كرن، شكه‌ستنا وان ببيتن دوو قات و سێ قاتى، ئه‌ڤ ئه‌ردوگانێ سه‌رهشك و زالم، ژبلى دانپێدانا شكه‌ستنا خوه‌ ناكه‌تن..رۆژ بو روژێ هێرشێن خوه‌ ل كوردستان و بنه‌خاسمه‌يى ل سه‌ر كوردستانيا( ل باشور و روژئاڤا) زێده‌ و به‌رفرهه‌ترێ دكه‌تن، سنورێن خوه‌ دگه‌ل عێراقێ(نه‌خاسم قه‌نديل و هێلا سنورى ژ بارزان و سوران بو مه‌تين و گاره‌ى و خامتويرى و گوند و ده‌ڤه‌رێن ڤان هه‌رێمان، بره‌نگه‌كێ هوڤ و بكولاتيه‌كا نه‌يارتيا مه‌زن، ئێخستينه‌ ناڤا هێرش، دده‌تن به‌ر هێرشێن توپ و فروكه‌ و تانك و ساروخێن خوه‌، بسه‌دان گوند دڤێ ئه‌گه‌رێ دا هاتينه‌ چول و وێران كرن، رۆژانه‌ شه‌هيد و بريندارێن هاوولاتى و سڤيل هه‌نه‌، مه‌رو و مالات دهێتن كوشتن، خانى و زه‌ڤى و باغ و بيستان دشه‌وتن و وێران دبن، ژيان ل خه‌لكێ مه‌ كريه‌ به‌لا و ده‌رده‌سه‌رى، تاكو ل ڤێ دوماهيكێ بنگه‌هێن قه‌زا و ناحيان ژ دوژمنكاريا ده‌وله‌تا توركى رزگار نابن، ده‌ستهه‌لاتا عێراقێ و هه‌رێمێ، حزب و لايه‌نێن سياسى، بێ ده‌نگن و ل ئاستێ كاره‌ساتا هه‌يى ده‌نگێ خوه‌ بلند ناكه‌ن، ئه‌ڤ به‌رپرسياريه‌كا دێروكى و مروڤاتيه‌، كه‌سانێن مه‌ دهێنه‌ قه‌تل و عام كرن، گازى دكه‌ينه‌ لايه‌نێن به‌رپرس و نه‌خاسم هه‌رسێ سه‌روكاتيێن هه‌رێمێ(په‌رله‌مان، جڤاتا وه‌زيران، سه‌روكاتيا هه‌رێمێ) برولێ خوه‌يێ مروڤايه‌تى و نيشتيمانى و ئه‌خلاقى رابن و ئێدى ده‌رفه‌تێ نه‌ده‌ن ئه‌ڤ هه‌مى زێده‌گاڤى و گونه‌هباريه‌ ل سه‌ر ئاخا هه‌وه‌ بهێنه‌ كرن، هاوولاتيێن وه‌ بلا به‌س ڤان قوربانيێن مه‌زن بو ده‌وله‌ته‌كا داگير كه‌ر و تورانى بده‌ن، ئه‌ردوغانى و حزبا وى شكه‌ستن خاريه‌، دخازيتن شكه‌ستنا خوه‌ ل سه‌ر به‌ده‌نا ئاخا مه‌، بخوين و بهايێن خه‌لكێ مه‌ تيمار بكه‌ن…له‌ومان يافه‌ره‌ و ئه‌ركه‌كێ ئه‌خلاقى و نيشتيمانيه‌، دوماهيكێ بڤێ دوژمنكاريێ بينن و خوژ به‌رپرسياريا داگير كارى و گونه‌ها خوينا خه‌لكێ خوه‌ قورتال بكه‌ن و سنوره‌كى بو دوژمنكاريا ئاكه‌پ و ئه‌ردوگانى بينن.٠

                  اكرم خالد عبدالكريم/سيد اكرم/دهوك