!ئه‌ردوغانيزم سه‌رچاوه‌يێ تيرۆريزمێيه
چه‌مكێ تيرۆريان تيرۆرزم، چه‌مكه‌كێ كه‌ڤنه و هه‌ر ل ده‌ستپێكا په‌يدابونا ژيانى دروست بويه، مروڤ بونه‌وه‌ره‌كێ كه‌ڤنه، سرۆشتێ ژيانێ دده‌ستپێكا خودا، سرۆشته‌كێ تژى هه‌ڤركى و تژى دورندايه‌تى و تژى توندوتيژيه، ل به‌ريا دروست بونا شارستانيه‌تێ، مروڤ وه‌كى هه‌ر گيانداره‌كێ، ديێ كويڤى ل چول و ده‌شت و دول و چيادا دژى، هه‌مى هه‌ول و بزاڤێن وى، ئه‌و بوون خوبخوادن بكه‌تن، ل سه‌ر خارنا كشتووكال و گوشتێ گياندارێن كويڤى و ئاڤى دژيا، واته ل وى ده‌مى مروڤ دبزاڤه‌كا به‌رده‌وام دابوو، تاكو خارنا خويا رۆژانه په‌يدا بكه‌تن، ديسان ژ به‌ر گه‌رم و سه‌رمايێ ژى خو لناڤا شكه‌ڤت و دناڤا كونجاندا دپارست، ل وى ده‌مى ژيان زۆريا گران و بزه‌حمه‌ت بۆ، ژ به‌ر هندێ هه‌رده‌م دهه‌ڤركيێ دا بوو تاكو بژيتن و ئه‌ڤێ هه‌ڤركيێ ژى توندوتيژيه‌كا مه‌زن پێڤه ديار دبۆ، ل وى ده‌مى ياسا ياسايا جه‌نگه‌لستانێ بۆ، ژيان ژى بۆ يێ بهێز بۆ، تاكو مروڤ شيابايه بژيتن، دڤيا ئاماده‌ى توند و تيژى و هه‌ڤركاتيه‌كا، دژوار كربايه تاكو شيابا بژيتن.
ئه‌گه‌ر ئه‌م دێرۆكێ بخوينين و بتايبه‌تى دێرۆكا شارستانيه‌تێن كه‌ڤن، وه‌كى دێرۆكا سومه‌رى، مصرى، بابلى، صين و هندى، هيتى…پاشى دێرۆكا ئه‌وروپا و تاكو دگه‌هيتن، ڤه‌ديتنێن رۆژهه‌لات و رۆژئاڤايى و نه‌خاسم ڤه‌ديتنا كيشوه‌رێ ئه‌مريكا، ئه‌م دێ بسه‌ر توندوتيژى و تيرۆريزما ده‌ستپێكا دروستبونا شارستانيه‌تێ هه‌لبن و دێ خويا بيتن، تيرۆر ديارده‌يه‌كا كه‌ڤنه و دگه‌ل په‌يدابونا مروڤى دا دروست بويه.
ئه‌گه‌ر ئه‌م دێرۆكا عێراقێ بخوينين، وه‌كى نمونه‌يه‌ك، بتايبه‌تى ئه‌وا دپه‌رتوكا نڤێسه‌رێ عه‌رب (ياسين باقر)دا هاتى، بناڤێ(تاريخ العونف الدموى فى العێراق)، نمونه‌يه‌كا ساخا ته‌ندوتيژيا رۆژهه‌لاتا ناڤين، دێ بئاشكرايى كه‌ڤيتن به‌رچاڤێن مروڤى، لێ ئه‌گه‌ر ئه‌م دێرۆكا( كوردوعه‌جه‌م) بخوينين، ئه‌واژلايێ به‌رێز (ناوشێروان مسته‌فا )ڤه هاتيه نڤێسين، يان ژى دێرۆكا جڤاك ناسى بخوينين، ئه‌وا دپه‌رتوكێن نڤێسه‌ر(حسێنێ خه‌ليقى)دا هاتى، نمونه‌يه‌كا ديا ساخا توندوتيژيێ ل كوردستانێ دێ كه‌ڤيتن به‌ر ده‌ستێ مروڤێ كورد و كوردستانى، لێ ئه‌گه‌ر مه بڤێتن وێنه‌كا ساخ و ديارێ ته‌مام ئه‌م وه‌رگرين، ياگرنگه ئه‌م دێرۆكا ئيسلامێ و ڤه‌كرنێن ئيسلامێ بخوينين و نه‌خاسم ل سه‌رده‌مێ ده‌وله‌تا ئه‌مه‌وى و عه‌باسى و پاشى دروست بونا ئيمپرتوريه‌تا عوسمانى و دێرۆكا شاهێن ئيرانا ئيسلامى…ل سه‌رده‌مێ دێرۆكا نوى ژى، يا گرنگه ئه‌م دێرۆكا هه‌ردوو شه‌رێن مه‌زنێن جيهانى بخوينين و نه‌خاسم پشتى دروست بونا ده‌وله‌تا عێراقێ ل سالا1921ز و بسه‌ردا و پاشى، ئه‌م دێرۆكا ده‌وله‌تا توركيا و سوريێ و ئيرانى بخوينين، ئێك ل دويڤ ئێكێ و لپاش ڤى سه‌رده‌مى، نه‌خاسم پشتى كه‌مال ئه‌تاتورك و عسمه‌ت ئه‌نوينوى ده‌ستهه‌لات بده‌ستێ خو گرتى و توركيا نوى ئاڤاكرى…پاشى يا گرنگه ئه‌م دێرۆكا بزاڤا ئازاديخوازيا كوردى(ل هه‌ر چار پێنج پارچێن كوردستانێ) بخوينين، ئها ل ڤێره دێ وێنه‌يه‌كا ته‌مام و تژى بويه‌رێن بتوندو تيژى كه‌ڤن به‌رده‌ست و چنه‌ناڤا زێهنيتاا مه‌دا، ئه‌ڤا مه‌گوتى و بكورتى دايه ديار كرن، خاندن و شلوڤه‌كارى و ديراسه‌ت كرنه‌كا تژى و دوير و درێژ پێ دڤێتن و ئه‌م نه‌شێن بچينه ناڤا كويراتيێن ڤى بابه‌تى، چونكى زور ده‌م و شيان پێ دڤێن و هه‌ميش ئه‌م ده‌رحه‌قى بابه‌ته‌كێ هوسان ده‌رناكه‌ڤين و دێ دناڤا بويه‌ر و شروڤه‌كاريان دا ئاسێ بين و توشى شاشى و هه‌زقينێن زور مه‌زن ژى بين…له‌ومانێ دێ ڤى بابه‌تى بۆيێن شاره‌زا و يێن تايبه‌تمه‌ند هێلين، لێ بتنێ مه‌ره‌م مه پێ ئه‌وه، هنده‌كێ ژ ديتنێن خو ل سه‌ر تيرۆرا، نهاد بينين، بده‌يينه ديار و شلوڤه‌كارى كرن.
ئه‌ردوغانيزم سه‌رچاوه‌يێ تيرۆريزمێيه
پشتى ئازاديا عێراقێ و هه‌ڤده‌مى لپاش دێرۆكا2003ز، وه‌سان دهاته پێش بينى كرن، بۆ ده‌مێ نێزيك ژ پێنج سالان عێراق بكه‌ڤيتن ناڤا شه‌رو ناڤا تيرۆره‌كا گران دا، ل پاش ڤى ده‌مى هێدى هێدى ته‌ناهى بكه‌ڤيتن ناڤا عێراقێ و نه‌خاسم پاش عێراق دبيتن ده‌وله‌ته‌كا فيدرالى، هه‌رئێك ژ كورد، شيعه، سونه، كو پێكهاته‌يێن سه‌ره‌كينه و رهوريشالێن توندوتيژيێ لنادا هه‌نه، ل ڤى وه‌لاتى، هه‌رئێك ئيداره‌يه‌كا مه‌ده‌نى و تايبه‌تى بخوڤه، دروست بكه‌تن و ئيدارا خو بكه‌تن و هه‌رسێك ئيداره‌ژى بكه‌ڤن ناڤا چارچوڤه‌يێ، ده‌وله‌ته‌كا رێكخستى و بناڤێ عێراقا فيدرالى…راسته رژێما به‌عسا صه‌دامى زوى هه‌رفت، لێ بۆ سه‌رچاوه‌يه‌كێ تيرۆرێ ل عێراقێ و تاكو نهاژى گروپ و پشكێن ڤێ حزبێ، دبنه بنياتێ تيرۆرا هه‌ى، ل ڤى وه‌لاتى و بنه‌خاسمه‌يى، په‌رجه‌مێ گروپێ نه‌قشه‌به‌ندى، بسه‌روكاتيا(عزت الدورى)، جێگرێ ئێكێ يێ سه‌دام حوسێنێ دكتاتور و تيرۆرزم، ئه‌وا راستى ژى بيتن ئه‌مريكا دگه‌ل وێ ته‌حالفا وان سه‌ركێشى دكر، ل ئازادى يا عێراقێ، نه‌شيان بته‌مى ئه‌رمانجێن خو بده‌ست بێخن، ده‌ستێ ئيرانێ بره‌نگه‌كێ درێژ شور بوو، بۆناڤ وێ عێراقا پتريا وێ شيعه مه‌زهه‌ب و ديسان ئيران بۆ مفادارێ ئێكێ دئازاديا عێراقێ دا، ئه‌مريكا وه‌كى هێزه‌كا شكه‌ستى يان ئارمانج بده‌ست نه‌گرتى ژ عێراقێ هاته ڤه‌كێشان، ل ده‌مه‌كى تيرۆره‌كا دژوار و شه‌ره‌كێ به‌رفرهه دهاته ديتن و برێڤه برن دڤى وه‌لاتى دا، پشتى ئه‌مريكا ڤه‌كشياى و ئارمانجێن خو وه‌رنه‌گرتين، ئێدى توركيا و سعودى يا و هنده‌ك ميرگه‌هێن خه‌ليجى، بزاڤێن خورت كرن، تاكو به‌رژه‌وه‌نديێن خو ل ڤى وه‌لاتى بپارێزن، ل ده‌مێ ديتى به‌رژه‌وه‌نديێن وان بساناهى ناهێن پاراست، بهويرى و بچرى ده‌ست دا، دروست كرنا گرپ و هێزێن ئيسلاميێن نه‌ژاد تيرورزم، ئه‌و ژى راسته مه‌مله‌كه‌تا عه‌ره‌بيا ئيسلاميا سعودى و هنده‌ك ميرگه‌هێن دى يێن خه‌ليخى، رابردويه‌كێ درێژ و تاقيكرنه‌كا زه‌نگين هه‌يه بخودان كرن و خولقاندنا پارت و گروپ و هێزێن تيرۆرزميێن ئيسلام ره‌گه‌ز، وه‌كى دروست كرن و پشته‌ڤانى كرنا بزاڤا تيرۆرزمى يا تايبان، قاعيده و گروپ و هێزێن سه‌ر بقاعيده، جه‌بهه‌ت النسر، ده‌وله‌تا ئيسلامى يا بناڤێ(داعش) ل عێراق و شامێ و گه‌له‌ك گروپ و حزبێن دى يێن تيرورست.
توركيا نوى هه‌ر ل ده‌ستپێكا دروست بونا وێ ل سالا1923ز، وه‌كى ده‌وله‌ته‌كا كه‌مالستيا تورك ره‌گه‌ز، كه‌ڤته ناڤا ده‌ستهه‌لات و ناڤا رێڤه‌به‌رى كرنێ، زولم و زه‌ره‌رێن زور مه‌زن گه‌هاندن گه‌ل و ملله‌تێن توركيا كوردستانى و ئه‌نادولييان، بده‌هان ملله‌ت و گروپێن ئه‌ته‌نى لناڤا جوهنيێ ترك په‌رستيێ دا دانه حه‌لاندن و قه‌لاندن، وه‌كى ملله‌تێ رۆمانى، يونانى، ئيتالى، چه‌ركه‌س، لاز، عه‌ره‌ب، قه‌فقاسى، شيشانى…گه‌له‌كێن دى، ملله‌تێ كورد ژى ئێك بويه ژوان ملله‌تێن بزاڤێن حه‌لاندن و قه‌لاندنا وى بچرى كرين، راگوهاستن، كوشت و كوشتار، گرتن و ئه‌شكه‌نجه‌دان، قه‌دغه‌كرنا زمان و جلێن نه‌ته‌وه‌يى…هه‌وه‌كا ره‌گه‌ز په‌رستى و تورگچيياتيا دژوار كره سه‌ر ملله‌تێ كوردى بره‌نگه‌كێ گشتى، هه‌رچه‌نده تاكو راده‌يه‌كا زور شيان كوردا ژئاخا وان ڤه‌كه‌ن و زمانێ وان لبه‌ر به‌رزه‌كرن و جلێن وان ژبه‌ر كرن، لێ كورد وه‌كى گه‌له‌كێ خودان ماف و خودان ناسنامه و خودان ئه‌رد…وه‌كى شێرا كه‌ڤتنه ناڤا مه‌يدانا خه‌بات و خوراگريێ و بزمان و بجلێت توركى، خه‌باتا خويا كوردايه‌تى به‌رده‌وامى دايێ و بزه‌حمه‌تى دا هاژوتن و دخه‌بات و تێكوشانێن خودا موعجزه‌يێن مه‌زن و تژى ئاسته‌نگى برين و ده‌رباز كرن و هه‌بونا خودا ئيسبات كرن.
ل ده‌مه‌كى بزاڤا رزگارىخازى يا كوردى ل سه‌ر ئاخا خو بدژوارى دهاته دوماندنێ، وه‌رگه‌ريانه‌ك هاته دروست كرن، لناڤا توركيا و دوێ وه‌رگه‌ريانێ دا، ئاق پارتى بسه‌روكاتيا سه‌روكێ خويێ ژ به‌ند كرنێ به‌رداى(ره‌جه‌ب ته‌يب ئه‌ردوگان)، ده‌ستهه‌لاتا توركيا بته‌مى وه‌رگرتى و هه‌ر ل سالا2001ز، بناڤێ چاكسازيێن جڤاكى و راستڤه‌كرنێن داريى و په‌ره‌پێدان و ساخ كرنا ژێرخانا ئابورى، شييان زوربه‌يا ده‌نگێن كوردا بده‌ست خوڤه بينن و به‌رده‌وامێ بده‌ن خه‌باتا خويا ئه‌ردوگانى، ل ده‌مه‌كى داخويانى و پشته‌ڤانى دانه مه‌شاندن و راگه‌هاندن و پشته‌ڤانى يا پرۆژێ ئاشتيا كوردێن باكور، ئه‌و پرۆژێ رێبه‌رێ رۆحيێ كوردى(عه‌بدولا ئوجه‌لانى) دناڤ زيندانا خويا ئيمرالى دا، دايه راگه‌هاندن…دياره ئه‌ردوگان و پارتيا خو لوێ باوه‌رێ بوون، گه‌لێن توركيا و ژ وانان ملله‌تێ كوردى، وه‌كى توبه‌كێ حه‌ريرى دێ كه‌ڤيتن ناڤا ده‌ستێ وى و حزبا وى، بكه‌يفا خو دێ گه‌ز و مه‌قه‌س كه‌ن و ل گوره‌ى حه‌زكرنا خو دێ نه‌خشه و پلانان پێ دروست و جێ به‌جێ كه‌ن، لێ ل ده‌مه‌كى ديتى كوردێن باكور نه توبه‌كێ حه‌ريرى نه، وان ژى تايبه‌تمه‌ندى و رێك و رێبارێن خو بخو هه‌نه و ل سه‌ر هاتينه په‌روه‌رده و مه‌زن كرن، ئێدى پێ ل سه‌ر پرۆژێ ئاشتيا باكور دانا و ده‌ست بكوده‌تا و پلانێن خويێن ره‌گه‌زپه‌رست و تيرۆريزمى كرن، نه‌خاسم پشتى ديتى بهارا عه‌ره‌بى ده‌ستپێكر و وه‌لاتێن عه‌ره‌بى(تونس، ليبيا، مصر، سوريا، يه‌مه‌ن، عێراق…)، ئێك ل دويڤ ئێكێ كه‌ڤتين، ئێدى ده‌ست بگروپ و پارتيێن سه‌ربخوه كرن لناڤا ڤان وه‌لاتا و مايتێكرنێن خو دڤان بهارێن عه‌ره‌بى دا كرن، ئه‌ڤ وه‌لاته كرنه بازاره‌كێ ڤه‌كى، بۆ بازرگانێن خو، بۆ ميت و ئوزه‌لتيمێن خو، بۆ له‌شكه‌ر و بۆ دروست كرنا پارتێن سه‌ربوان ڤه، خودا هێلا ناڤا ده‌ستهه‌لاتێن ڤان وه‌لاتا، نه‌خاسم ل مسرێ پشته‌ڤانيا برايێن بسلمان(الاخوان المسلمين) كرن، ئێدى پشتى دى تى رۆژ ل دويڤ رۆژێ رژێمه‌كا ده‌ڤه‌رێ يا دكه‌ڤيتن و ئه‌ڤ وه‌لات و ئه‌ڤ ده‌وله‌ته بو وان يا دبيتن بازاره‌كێ ڤه‌كرى و بێ كونترول…ئێدى غروره‌كا مه‌زن بۆ ئه‌ردوغانى و بۆ پارتيا وى دروست بۆ، هزر ل هندێ كر، ئه‌و زه‌لامێ نه‌خوشێ عوسمانى، ژ قه‌برێ راكه‌تن و ده‌رمان بكه‌تن و ل سه‌ر جه‌نه‌كێ وێ ئيمپراتوريه‌تا خويا تورانيا ئه‌ردوغانزمى دروست بكه‌تن، گه‌لێ هشيارێ مصرێ، يه‌كه‌مين گه‌ل بويه هه‌ست بخه‌ته‌را ئه‌ردوغانيزمێ كرى، ئه‌و بۆ ده‌ست بگرتنا سه‌رانێن ئيخوانيان كرن و تاكو گه‌هشتيه وى راده‌ى كوده‌تايه‌كا سپى ل سه‌ر رابه‌رێ ئيخوانان(مرسى)كرى و ژ ده‌ستهه‌لاتێ هاڤێت و كره ناڤا زيندانێ و پاشى بحوكمێ ئيعدامێ حوكم كر، ئه‌ڤه بخو هشياريه‌ك و سه‌رخوييه‌كا گه‌ل و خه‌لكێ مسرێ بويه، ل ده‌مێ هه‌ست بخه‌ته‌را ڤى كه‌سى و ڤێ ده‌ستهه‌لاتێ كرى، ژ ده‌ستهه‌لاتێ هاڤێته ده‌رێ.
ل ده‌مه‌كى ل بيست و حه‌فت ده‌وله‌تێن ئه‌فريقى، ده‌ستهه‌لاتا ئه‌ردوغانى نونه‌ريێن خو ڤه‌كرن، وه‌كى رێبه‌ره‌ك و وه‌كى سه‌ركرده‌كێ ده‌ڤه‌ره‌كا پاوان كرى، سه‌رده‌رى دكرن، خو دديت شاه و سولتانێ دونيايا ئيسلاما سونى، لێ پشتى ديتى ل هه‌رئيكێ ژ يه‌مه‌ن و مصرێ توشى شكه‌ستن و توشى بێ ناڤيێ بووى، دئاليێ دى دا ديت، بزاڤا ئازاديخوازى يا كوردى ل رۆژئاڤا يا پێشدا دچيتن و ده‌ستكه‌ڤتان بسه‌ر فه‌رازى وه‌ردگريتن، نه‌خاسم پشتى كوبان نه‌كه‌ڤتى و هاتيه رزگار كرن، دئاليێ دى ژى دا، بزاڤا ئازاديخازيا كوردى لباكور بسه‌روكاتيا(HDP) و بپشته‌ڤانييا پارتيا كاركه‌رێن كوردستانى و برێبه‌ريا رێبه‌رێ روحيێ كورد(عه‌بدولا ئوجه‌لان)، كورد شيان سه‌ركه‌ڤتنێن مه‌زن تومار بكه‌ن و زێده‌ى(80)هه‌شتێ په‌رله‌مانته‌را ببه‌نه ناڤا په‌رله‌مانێ توركيا و ديسان ل ڤێره‌ژى پارتيا وى توشى شكه‌ستنه‌كا مه‌زن بۆ، ئێدى ئه‌ردوغان وه‌كى دينه‌كێ هار كه‌ڤته ناڤا دروست كرنا ته‌ل و خيچ و تورێن تيرۆرێ دا، چ تيرۆرا هه‌ى لناڤا(40)چل ده‌وله‌تێن ئيسلامى(سونى)دا، پشته‌ڤانى كرن و كێشانه ناڤا توركيا و پاشى داقوتانه ناڤا ئه‌ڤان ده‌وله‌تێن عه‌ره‌بێن ئيسلامى و بنه‌خاسمه‌يى دناڤا سوريێ و عێراقێ دا، ئه‌ڤان هه‌مى هه‌ول و بزاڤێن وى كرين و به‌رده‌وامه ل سه‌ر، سه‌خه‌مه‌راتى دوو ئارمانجێن سه‌ره‌كييه، يائێكێ چه‌سپاندنا سسته‌مێ سه‌روكاتيێ، تاكو دناڤا ڤى سسته‌مى دا بكاريتن ئيمپراتوريه‌تا خويا تورانى دروست بكه‌تن، سه‌رومالێ گشتى لناڤا توركيا و ل ده‌ڤه‌رێ بكه‌يف و بهه‌وه‌سێن خو تالان و وێران بكه‌تن و گه‌نده‌ليا خو ژى بڤه‌شێريتن و هه‌مى بريارێن ده‌وله‌تا توركى دناڤا ده‌ستێ خودا حه‌بس بكه‌تن و ببيتن تاكه سه‌رچاوه و تاكه ده‌ستهه‌لات و بريارێن وى ببن خه‌تێ قورئانێ و ببن پيرۆزى و بێى سێ و دوو و بێ دوودلى بێنه بجهكرن…يادووان بتوندى ل بزاڤا ئازاديخوازيا كوردى بده‌تن، چ لباكور يان ل رۆژئاڤا، قه‌نديل و دياربه‌كر و ئيمرالى ژێك جودا بكه‌تن و بكه‌تن نه‌يارێن هه‌ڤدو، ديسان ده‌وله‌ت و ملله‌تێ ده‌ردور و هه‌ڤسنور بێ هه‌يبه‌ت و بێ ئه‌رك بكه‌تن و بكه‌يفا خۆ ده‌ستهه‌لات و ئيمپراتوريه‌تا خو ل سه‌ر سه‌رێ وا بده‌تن هاژوتن و بجهكرن، نه‌خاسم پشتى سه‌روسامانێ كوردستانێ(هه‌رێما باشور) كه‌ڤتيه بن ده‌ست و كه‌ڤتيه ناڤا به‌رژه‌وه‌نديێن وى، ئێدى وه‌كى گورگێ ده‌ڤ بخوين كه‌ڤته ناڤا كورد و كوردستانيان و بكه‌يفا خو، گروپێن تيرۆرزمى دروست دكه‌تن و چه‌كدار دكه‌تن و به‌ردده‌تن سه‌روچاڤێن خه‌لكێ ده‌ڤه‌رێ و نهاژى باشور كه‌ڤتيه بن ده‌ستهه‌لاتا له‌شكه‌ر و ميت و بن چارچوڤێن ئوزه‌لتيمێن دام و ده‌زگه‌هێن وى يێن ئه‌منى و ئابورى…نها ژى بشاحينان عيتاد وسيلاح و هاريكارێن لوجستى دده‌تن داعش، بكاروانێن دوير و درێژ نه‌فتا داعش ڤه‌دگوهێزتن توركيا و ببهايه‌كێ زورێ كێم وه‌ردگريتن، مه‌يدانێن مه‌شق و راهێنانێن له‌شكه‌رى و تيرۆريزمى بۆ ڤه‌دكه‌تن، بكه‌يفا خو له‌شكه‌ركێشيا بو ده‌رڤه‌ى سنورێن خو، بۆ ناڤا باشور دكه‌تن، هوسان و بڤى ره‌نگى، باشور كريه دورگه‌يه‌كا خه‌ندقى و داگير كرى.
ژبلى وێ ژى دبێژيتن (په‌كه‌كه) و (په‌يه‌ده) تيرۆرستن و ئێخستنه ناڤا ليستا تيرۆرا ته‌حالفا تيرۆريزمييا ئيسلامى دا، ئه‌و بخو تيرۆرستن، خه‌لكێ مافپه‌روه‌ر و خودان حه‌ق ل سه‌رئاخا باب و كالێن وان دكه‌نه تيرۆرست…ئه‌ڤه بخو نه‌هه‌ر شاشييه‌كه ده‌رحه‌قێ(په‌كه‌كه) و(په‌يه‌دێ) دهێتن كرن، به‌لكى ئه‌ڤه بێ ناڤى و بێ رێزيه‌كا مه‌زنه هه‌مبه‌رى گه‌ل و ملله‌تێ كورد و هه‌مى خه‌لكێ كوردستانێ و ده‌ڤه‌رێ، په‌كه‌كه و په‌يه‌ده دوو پارتيێن شوره‌شگێر و ئازاديخواز و ئاشتى پارێزن، ئه‌و ل سه‌ر ئاخا خو داخازيا ماف و ئازاديێن خو بره‌واتى و ل گوره‌ى پره‌نسپ و ياسايێن ناڤنه‌ته‌وه‌يى دكه‌ن، دوو بزاڤێن نيشتيمانى و نه‌ته‌وه‌يى و مللى و ديموكراتى و ئاشتى و ئازادى پارێزن، ئه‌و مافێن خو ل سه‌ر ئاخا خو داخاز دكه‌ن، براتيا گه‌ل و ملله‌ت و مافێن مروڤاتى داخاز و مماره‌سه دكه‌ن، بهيچ ره‌نگه‌كى و بهيچ پێوه‌ره‌ك و بهيچ ياسايه‌كێ ناكه‌ڤن ناڤا خانا تيرورێ، ئه‌وێن بدرێژاهييا سالا ئاخا وان داگير كرى، خه‌لكێ وان قه‌تل و عام كرى، ژ سه‌ر جهوژسه‌ر وارێ وان ده‌ركرين و ل سه‌رئاخا وان كرينه غه‌ريبه و بێ ماف و بێ ئازادى و لبن زولم و زورداريێ توشى نه‌هامه‌تى و توشى جه‌ڤروجه‌ڤايه‌كا مه‌زن كرين، ئه‌و تيرۆستن، ئه‌ردوغان و پارتيا وى تيرۆرستن، ده‌وله‌تا تورك نه‌ژاد تيرۆرسته، ئه‌و چ ياسا و چ عورف و عاداتن، غازيان و ئه‌وێن ل سه‌رپشتا هه‌سپى هاتين ژ مه‌نگولستانێ و وه‌لات داگير كرين و بكولاتى و بدرێژاهيا سالان زولم و زوريێ دكه‌ن..چاوان دبيتن ئه‌ڤ زالمه و ئه‌ڤ تيرۆرسته خودان ماف بن و خودانێن ئاخێ و ل سه‌ر ئاخا خو، داخازييا ماف و ئازاديێن خو دكه‌ن و دخازن ئه‌و ژى وه‌ك مروڤ وه‌كى كورد ل سه‌ر ئاخا خو مافێن خو بكار بينن و بئازادى كار بكه‌ن و بئازادى بخوينن و بزمانێ خو يێ دايكێ باخڤن…ئه‌ڤ مه‌زلومه تيرۆرست بن و بكوم ل سه‌ر ئاخا خو بێنه كوشتن، بپيرۆ شير، ژن و زاروك…لناڤا مال و لناڤا لاندكێن خودا بره‌نگه‌كێ هوڤاتى بێنه كوشتن…كه‌چى كورد(په‌يه‌ده و په‌كه‌كه) تيرۆرست بن و ئه‌ردوغان بدرونده‌يى و بقه‌تلازيێن خو، به‌هشتى بيتن و ببيتن خودانێ(70)حه‌فتێ حوريكێن به‌هشتى، برويبارێن شيرى خوبشوتن و ژرۆيبارێن عه‌ره‌ق و مه‌يسه‌ر و وێسكيێ ڤه‌خوتن، ئه‌رێ گه‌لا ئه‌ڤه چ ئه‌قل و چ ره‌نگێ دادى و چ مروڤاتيه..ل سه‌ر كوردان و لناڤا وه‌لاتێ كوردا دا دهێتن برێڤه‌برن و بريار ل سه‌ر دهێتن وه‌رگرتن…له‌ومان ل ڤێره ڤه‌كرى دبێژم و بلا هه‌ر كه‌س و هه‌ر مروڤ و هه‌ر كورد و كوردستانى بزانن و ژێ پشت راست ژى بن، ئه‌ردوغان و پارتيا وى نه‌هه‌ر تيرۆرستن، به‌لكى پارتيا وى ده‌يكا تيرۆريزمێيه، ئه‌و بخو بابێ تيرۆرزمێ يه، وه‌لاتێ وى ژى هێلينا تيروريزمێيه…. واته ئه‌ردوگانيزم تاكه سه‌رچاوه‌يێ تيرۆريزما ده‌ڤه‌رێ يه و نه‌خاسم ل سه‌ر كوردا و لناڤا كوردستانێ دا!! “
