كانێ وه‌حشێ ده‌ستهه‌لاتێ حكومه‌تا مه چ ژ كوردينيێ چێنه‌كر و بعه‌ربينيێ ژى دێ بخوڤه‌رين
گوتنێن كالا(مه‌زنا)نه‌خشێن لبه‌رينه
اكرم خالد عبدالكريم/سيد اكرم
كاروانێ كورد و ده‌سته‌برايێ عه‌رب…!
ل سه‌رئه‌ڤێ گوتنێ، دبێژن دوو هه‌ڤال، ئێك عه‌ره‌ب و ئێك كورد، ده‌سته‌برا بوون و پێكڤه دچونه كاروانى، يێ عه‌ره‌ب هه‌ريێ په‌يت و ئاماده و ل پێش بوو، لێ كورد هه‌ر يێ گير و ڤه‌مايى و شر و گيرو بويى بوو…!
روژه‌كێ يێ كورد گوته يێ عه‌رب، ئه‌رێ ده‌سته‌برا بوچى ئه‌ز هه‌ر ده‌م ڤه‌مايى و گيروبويى و شر و په‌لوسه‌مه..لێ تو هه‌رده‌م ئاماده و په‌يت و رێك و پێكى، يێ عه‌رب گوت: ساناهيه ده‌سته‌برا، تو ژى بكه عه‌ره‌بى، بكوردى هه‌رده‌مێ هه‌وجه‌ى خو بويى، گولاڤ و ده‌ر‌سوكان ددانى، شويتكێ ڤه‌دكه‌ى، شه‌لوال و ده‌رپێى دئێخى، كالك و ساقان ددانى… تاكو خلاس دبيى و هه‌وجه‌يا خو دقه‌تينى، جاره‌كا دى، شه‌ل و شه‌پك و ده‌رپيان لپێ خودكه‌ى، شويكێ دشدينى، كالك و ساقان لپێ خودكه‌ى، ده‌رسوك و كولاڤى ل سه‌رێ خو ددانى، دێ هه‌ر يێ گيروبى و ناگه‌هيه كارونى، گوتێ ئه‌رێ ده‌سته‌برا ئه‌ز چاوان بكه‌م عه‌ره‌بى! گووت زور ساناهيه، بتنێ دژداشه‌كى دێ كرى و لبه‌رخو كه‌ى، وان كه‌ل و په‌لێن دى هه‌ميان فرێ بده! ئه‌گه‌ر هه‌وچه‌ى خو بويى بتنێ دێ روينى و كوينێ ته دێ هێتن ڤه‌دان و حاجه‌تا خو دێ قه‌تينى و راست رابى و ده‌يه‌رێ، نه‌گيرودبى و نه‌ماندى و شر و وه‌ستيايى دبى..عه‌ره‌بى و سه‌د جار عه‌ره‌بى، په‌يت دێ چى و په‌يت دێ ڤه‌گه‌رهيه مالێ…!!
ئه‌وى ژى گوهداريا وى كر، وێ جارێ بخو دژداشه‌يه‌ك كرى، ل ده‌مێ بويه گه‌را كاروانى، هه‌ما نه‌كره نه‌مه‌رديى و دژداشێ خو لبه‌ر خو كر، ژ ناكا وى گوتێ ئه‌ڤه چيه جامێرا، گوتێ هه‌ما ژێڤه‌به حورمه‌ت، ئه‌ڤى جلێ كوردى ئه‌ز حه‌يران كرم، هه‌ريێ گير و ڤه‌مايمه ژ كاروانى، بعه‌ره‌بى بتنێ دێ دژداشه‌ى كه‌مێ و گيرونابم و دێ هه‌رده‌م ل پێشيا كاروانى بم، ل هاتن و ل چوونێ..!!
بهه‌رحال دا رێكێ و يێ مورتاح بو، هه‌ر وه‌چكى قايمقامێ دهوكێ گوتى، خه‌لكێ دهوك يێ مورتاحه، ب چ حالێ هه‌ى نێزيك نيڤ قوناغێ، رێكا خو برى و دويرى مالا خو بو، جاره‌كێ هه‌وجه‌ى خو بو، گوته ده‌سته‌برايێ عه‌ره‌ب، بێ شه‌رم بيتن ئه‌ز هه‌وجه‌ى ده‌ستنڤێژێمه، چ بكه‌م، يێ عه‌ره‌ب روينشت و رابو ڤه، گوتێ تو ژى وه‌ك من روينه، به‌لێ نه‌رابه تا كو حاجه‌تا خو ته‌مام دكه‌ى، پاشى راست رابه ڤه و بده‌رێ…بهه‌رحال، ئه‌و ژى روينشت، دياره گه‌له‌ك يێ ته‌نگاڤ بوو، حاجه‌تا خو قه‌تاند و راست رابو ڤه و ئێكسه‌ر دا رێ! نه‌بێژه پيساتيا وى، هه‌مى ياكه‌ڤتيه ناڤا ده‌مانگا دژداشه‌ى! ل ده‌مێ چونێ هه‌مى كه‌ڤتيه سه‌ر په‌شكێن وى! ژ په‌شكا بپيان دا هاته خارێ، مرتاحيا وى بو شه‌رمه‌زارى! خو پيس كر و خو هه‌تكاند! ژ نشكه‌كێ بخو حه‌سيا! بهه‌رحالێ هه‌ى خو گه‌هانده سه‌ر ئاڤه‌كێ! خو شويشت، لێ هه‌ر دگوته خو، هه‌ى زه‌لام كوردا، ته چ ژكوردينيێ چێنه‌كر، بكوردينى هه‌ريێ گيروبويى، لێ ل ده‌مێ ته‌كريه عه‌ره‌بى ژى ته بچاچكێن خوڤه‌ريت…!!
لێ ياباش ئه‌و بو! بخو حه‌سيا، بخودا چوو، جلێن عه‌ره‌بى هاڤێتن، يێن كوردى ل خو كرن! لێ حكومه‌تا مه نه‌بخو حه‌سيايه! ئه‌گه‌ر بخو حه‌سيايه‌ژى! ل خونازڤريتن! قه‌دا و به‌لايێن خو ژى، دئێخيتن ستويێ كه‌سانێن كوردپه‌روه‌ر و ئازاديخوازان دگريتن و زيندانان تژى مروڤ دكه‌تن…!!
حوكمه‌تا مه، ئه‌ڤه(28)بيست و هه‌شت سال ده‌رباز بوون، هه‌ر چ كار و كوكێ كورديه، گورى، ژ به‌رخو كر، جلێن كوردى هاڤێتن، وژدان هاڤێت، ئه‌خلاق و په‌روه‌رده هاڤێتن، دين و نه‌ته‌وه و نيشتيمان هاڤێتن، مروڤاتيا خو هاڤێت و به‌رزه‌كر، خودانى ل خو، ل كه‌س و كارێن خو نه‌كر، ئه‌وا مه دگوتنێ، خه‌بات، شوره‌ش، به‌رخودان، زه‌حمه‌تكێشى، وه‌فاء و سوز و په‌يمان…هه‌مى هاڤێتن و خو شه‌لاند، ل جهێ وان… گه‌نده‌لى، دزين و تالان، دره و دوروياتى، هه‌ر تشتێ خراب و وێرانكارى…ل به‌ر خو كرن، كه‌د و كه‌سابه‌تا خو كرنه پاره، ده‌همه‌ن پيسى، بونه فروشيارێن هه‌رتشتێ سه‌ربلندى و سه‌رفرازى تێدا…ئينا ژبلى پاره‌ى و ماديه‌تێ، هه‌مى تشته‌ك لێ هندا بوو! ژ ده‌ست چوو، بونه شه‌رمه‌زارێن ئاخێ و دينى و نه‌ته‌وێ و مروڤايه‌تيێ….ژنوى رويت و رويس يێن به‌ره‌ڤ به‌غدا دچن، بسه‌رێ چه‌مايى و بقه‌ده‌مێن شكه‌ستى…رويت و رويس، دژداژه لبه‌ر خو كريه، لێ دژداشێ خو ژى نه‌دزانن بكه‌نێ و نه‌ژى دزانن ژ به‌رخو بكه‌ن، له‌ومانێ ئه‌و ژى هه‌رمانديه، ڤه‌مايى نه، گويى كريێ، گويێ وان بچاچكێن واندا دهێتنه خار! لێ سه‌ير ئه‌وه نه‌لمنێ و نه‌لته‌يێ! هه‌مى عه‌يب و عارو عله‌تێن خو نابينن! دسه‌ر هندێ دا عه‌يب و عله‌تێن خو دكه‌نه ستوكورا خه‌لكى دى! خو وه‌كى مويێ ژ ماستى كێشايى، پاك و ته‌ميز دبينن…نوزانن كاميرێن مه‌دڤه‌كرينه، فوكسا شاشا وێ ل سه‌ر چاچك و ل سه‌ر عه‌يب و عله‌تێن واندايه! تومار دكه‌ن و وێنێن وان دهه‌لينن و ئه‌و وێنه چ دوير چ نێزيك، دێ هێنه به‌لاڤ كرن و دێ گه‌هنه حه‌قێ خو…بلا سه‌دام و معه‌مه‌ر القه‌زافى ل بيرا خو بينن، دا وێنێن خو دناڤا زهێهنا خودا ببينن و تومار بكه‌ن! به‌لكى ستوپ ببن! راوه‌ستن! ده‌ست ژ كارێن خويێن خه‌له‌ت وهه‌تكبه‌رى به‌ربده‌ن! ئه‌گه‌ر به‌ربده‌ن!! لێ من نه‌باوه‌ره ده‌ستبه‌ردار بن…!!
دێ باشه حكومه‌ت بو وان، كوردينى بو وان، وه‌لات بو وان، سه‌روسامان بو وان، ئاڤ و هه‌وا بو وان، ئه‌ردوئه‌سمان بو وان، هه‌يى و نه‌يى بو وان…ئه‌م كورێن ژنبابێ، نه‌ولاهيى بابو ئه‌م زربه‌هرين! مه قه‌بيله، ئه‌م دا وه‌بێژين….به‌لێ نێزيك پێنج هه‌يڤايه دێ حكومه‌ته‌كا گه‌نده‌ل! گويفانكێ بيست و هه‌شت سالێن ده‌ستهه‌لاتا خودامه‌زرينن! باشه بوچى نادانن، ئه‌ڤ هه‌مى گيروبونه ژبو چ! هه‌ما ئه‌م دێ بێژين حكومه‌تى، خارنه‌كا شاهانه‌يه و بتنێ بو وايه! ئه‌رێ گيروكرنا وێ بو ڤى ده‌مێ درێژ! ما خراب نابيتن! بهێن ناكه‌ڤيتێ! گه‌نار ناگريتن! ئێكسپايه نابيتن! ميكروب و ڤايروس جهدناڤ دا ناگرن! كوردا ژمێژدا گوتيه، سه‌قا لدويڤ حه‌قا، ئێ براستى ژ سه‌قا كه‌ڤت و ئێدى بێ بهابوو! بهايێ وێ نه‌ما! مانه‌به‌سه! دێ جفتا خو بته‌قينن! فيشه‌كا خو باڤێژن….براستى هه‌وه بێ تام كر! گه‌ل لهيڤيا هه‌وه ماندى بو! ئاخ لبن پێن هه‌وه بێ نڤێژ بوو! دێ به‌سه و ناڤێ خودێ بينن! ڤێ جارێ ژى بانگێ خو بده‌ن…يان دێ بيتن سم يان ژى دێ بيتن سماييل..!!
اكرم خالد عبدالكريم/ سيد اكرم/ دهوك
