ل دهمێ قهلهم دپهييڤيتن!!ا
ل دهمێ قهلهم دپهييڤيتن…!!!!ا
اكرم خالد عبدالكريم/سيد اكرم/ دهوك
ها قهلهما بونا پهييڤى، باخڤه و بنڤێسه، ئێشێن دسهرێ خودا دهركه، كولێن دلێ خوه بحهلينه، ئاڤزهها شێل و بێل بكه، بهسه بێ دهنگ نهمينه، گوهڤهچنين و متياته ژى، ب ئاويهكى ئاخفتنه، حنێر و پهندن، ئهز دزانم تژى ناڤا حوبرێ ته سهرپێهاتى و چيروك و پهندن، دێ وهره ههى مالاڤا، بێ دهنگيێ بشكێنه و چيروكهكێ، حيكايهتهكێ ببێژه، ئاڤرێژهيا دلێ خوه بهرده، ئهم دزانين تو دارهكێ رهقى و لناڤهتهژى حوبرهكێ حشك و رهنگا و رهنگه، لێ دلێ ته دهريا وانێيه، تژى ماسى و گياندارێن كويڤى و ئاڤينه، تو باغهكێ ئاڤى و گولستانهكا رهنگا و رهنگى، تژى دهنگ و پێژن، جار دكهنى و جاران ژى دلورينى، وهى فهلهكێ يهمان، بێ بهختێ، فهلهكێ خائينێ تهبوچى واكر، كونێ بابێ مه لملانكر، مالا مهباركر، خێمه و بنياتێ مه تالان و خراب كر، وهى فهلهكێ، بێ بهختێ، خائينێ، غهدارێ…ههلێ وايێ، گوندينا وايێ، دهروجيرانينا ويێ….دهواى وايێ…!!
جار تو چيروكڤانى، جاران ژى هوزانڤانى، نوسهرى و تورهڤانى، سياسهتێ دكهى، بهحسا زانين و زانستێ دكهى، ئايور، كومهلناسى، دهرون ناسى، زانستێ ههستهوهرى…تويێ بويه خوێيا ههمى گراران، ل وێ ژى خوناگرى، تهخويا كريه هوستايێ خارن دروست كرنێ و لمالێ دا بويه كاباى، دێ وهره رههما هێڤ بكێ، سهحبكێ، تو ههمى تشتان دزانى و تشتهكى ژ تشتهكى ژى نوزانى، وهى ههواره بابو، دادێ…پاته هوسان زاروك خودان كرن، بێ كار و بێ كهدى، كهڤتيه پاشالا مالێ و بهحسا مالداريێ ژى دكهى، دێ ههره وهلاهى ته درێژ كر، ئهڤه نهحاله دگهل تهدا، نهبو سالهك، نه دوو و سێ سال، سال يا دبێژيته سالێ جهێ من بكه، بهتالى و عهتالى، نانێ سهرشوريێ دخويى، دێ بابو ئهرێ ما تو نهپێشمهرگهبويى، نهشورهشگێێر بويى، پانێ ل دهمێ خو تو حهمێ مێسێ بوى، عهمێ گوزهلێ بويى، ههردهم هات و ههوارا تهبو، جارهكێ ل مالا خو نهدروينشتى، نهشهڤا ته شهڤ بو، نهروژا ته روژ بو، ته چ حسێب بو مالا خو نهدكرن، باشه مال چنه، دهيك و بابێن ته، مانه محتاجى تهبون، ئهرێ مانه تهدگوت، دهيك وهلاته و باب نهتهوه…ئهرێ بو چى ته قوسيريى كرن، دهرحهقێ دهيك و بابێن خوه، باشه مالڤا شهڤ و روژێن ته شول بون، تهبو كێ شول دكر، چ ل كهدا تههات، يێن كهدا تهخاريى كيبوون و چ ل وێ كهدێ كر، باشه ما حسێبهك بو تهژى نهدكرن، تو چونه! تو مروڤهكێ خراب بويى، ئهرێ زاروكێن ته، ژنكا ته، دهيك و بابێن ته، كهس و كارێن ته! وان چ گونههوگونهكارى ههبوون، باشه ههڤال و دوستێن ته، كار كهر و فهرمانبهرێن ل گهل ته، چ لێهاتن، بو پسيارهكێ ل حالێ تهناكهن، بو چى سهردانا ته ناكهن، بو چى ل مافێ ته پسيار ناكهن، باشه حكومهت خرابه و ملكێ كهسێ نينه! ياكهره و ياكورهيه، نهگوهلێ دبيتن و نهژى دبهيسيتن…باشه ئهوێن دگهل تهدا، تهخوبو ئهزيهتددا، خودانى لماف و ئهركێن وان دكرن، چ لێهاتن، كيڤهچوون، باشه ما ئهو ژى نهمروڤ بوون، مروڤايهتيا وان بكيڤه هندا بو، دێ وێ پێله و بهس قرهقرێ ل سهر گوهێن مه بكه، ولاهى ته گوهێن مه كهركرن، چاڤ لمه تاريكرن، قيرهقير و حهواريا ته خلاس نابيتن، مانێ ژ دهردێ ته كهر و لال بوم، شێت و هار بوم، دێ بهسه، ل سهرخوه باخڤه، دهرفهتێ بده دا پيچهكێ دتهبگههم، ههما هيچ نهبيتن، دا گوتن و گازندێن ته بگههن، بچن ناڤا گوهێن من، گوتن ههمى يێن بوينه بزامار و ههمى ژى ل ئێك جهدا دهێنه سمتن، مانێ مهزنا گوتيه، دوو بزمار دئێك جهدا ناچن خار، دووسهرێن بهرانان دمهنجهلهكێ دا ناهێنه كهلاندن، ههرچاڤهكى جهێ خوهيێ ههيى، ههرددانهك ژى لجهێ خودا هاتيه كولان…تهدڤێتن ههمى گوتنێن خوه پێكڤه بێژى، ههمى كريارێن خوهژى پێكڤه بچنى و بهرههمێ وانان وهرگرى…
…(( دێ بهسه ههى يارا من، دێ وهره ههى دوستا من، دلێ من نهحهلينه، بێهنا من تو چك نهكه، هيڤيێن خوه نهبرهينه، سهبركه و پاشى وهره، دنيا مه ئێك روژ نينه، رێك و رێبار مشهنه، سالا مه چار وهرزيه، دلێ مه كانيا خهما، سينگێ مه گهميا ژانان، بڤى رهنگى نهژيانه، هزرێن خو باشتر بكه، جهرگێ خو باش رهحهتكه، وارێ مه كوردستانه، زهڤى و لات و زوزانه، چيايێن مه بلند، دول و نههال چ روندن، ل بهربهژنا وان دهشتن، گر و نال و بههشتن، دێ ههره و هێشتا زويه، نهوروز ههربتليليه، جوت و كێل و كولانێ، پهز و ميهوگارانێ، گوهده بانگێ ديكلى، مريشكه ل سهرهێكانێ، كوتر ل ئهسمانى دفرن، مژده و خوشى ڤێ پرن، ياركا من بناڤ لهيله، روند و شوخ، بهژن قهنده، گول نێرگز ل چولان دپرن، دارێن مه دار كهڤوتن، دار مازى و شابهلوتن، شهڤ خوشه لبهارا، ل بهر بهژن و پالا ياران، ناڤێ ياركێ ئهسمينه، يارونده و رويى بخاله، كچا مامێ دوتمامه، سهبروسهكين خوش ياره، رويكێن وێ خومارينه، بهژن تاكێ سپيندارێ، ژوردان دهێتن خارێ، هايى حهپه و حهپ حهپانێ، ناڤێ ياركێ نێرگزه، مامزه و شهڤ ددزه، ل بهر بهژنێ مامزه، تولازه و شهنگه بێرى، ههى ههوار بو ڤى وارى، برهێن وێ خال و خهتن، چاڤێ من پێ دكهتن، ئهو مهرههما برينێ، يا رونده و تێشته روينه، نهوهلاه فراڤينه، هايى ئهسێ لمن ئهسمهرێ، دێ وهره وهكى بهرێ، زور ژ مێژه لبهندا تهمه، سهربهختێ من تو يارى، ياركهكا چ عهياريى، خال و خهت چ همبزن، خوشيان ژ من ددزن، من چ حالێ خو نينه، گرتيمه و زيندانيمه، ژهيڤيا ته ئهز قهتيمه، قهد ببالا من ناهێى، حيزبابێ چ سهر سهرى، ههر دچى و ل دور خوه دنهرى، ل سهربهختێ من درهوى، قه ى مفا دتهنهما، ژێك چويى، خولى سهرى، ههر ههرمايى دهربهدهرى، دهست بهرده ژ فندوفێلا، گوهبده جحێلا، دێ وهره دمالدا روينه، دهستێن خوه دمن بئالينه، ل دهڤ من به و نهههره، ژين دگهل من بههشته، سهيران و سويل و تشته، وهيى بابو دێ ژخو ڤهبه، كهمباخێ وهرهبروينه، دا تشتهك ژ ته چێببيت، هيڤيێن پێكڤه شين بن، دلێ مه دگهلك هين بيت….)).
دێ بهسه ههى هونهرمهندێ هوزان نهزان، مه چ گوت، تو كيڤه چويى، دهست ژ چيرك و چيڤانوكێ خو بهرده، ته دلێ مه حهلان، هزرێن مه شلقاندن، دهرونێ مه پهقاند، دێ ئهم بێژين ئێك، تو ئێكسهر دێ بێژى سهد و دووسهد، دێ تێكهل و پێكهليێ كهى و مهژيێ مه حهلينى، بابو مانێ رهوش و فند و فێلێن ڤى زهمانى پێتڤى ئاخفتن و گهنگهشه و شروڤهكاريێنه، مانه وهيه رحا من، ياتهمبهل نهبه، گوهێن خوژى ڤهكه و مسمت نهكه، دلێ ته بلا يێ فرههبيتن، سينگێ ته وهكى دهشت و لهيلايان بيتن، هزربكه، بيرا خو بينه، بدهرونهكێ مهندن و زهلال، چاڤێن ڤهكرى، ئهقلداريا تهبلا ههبيتن، سهربورا وهرگره، گوهداريا بويهران بكه، چيروك و چيڤانوك دێروك و سهرپێهاتينه، هزرو زهنگينيا ژيانێ و بههرهيهكا مهزنه، مهيدانا ژيان و پێكڤهژيانێ بهرفرهه و زهنگين دكهن، دهرڤهيى وانان، ژيان دێ بيتن چاڤلێكرن، يانى مروڤ و گناوهر دێ تێكهلى ئێك بن و ژێك ناهێن ڤاڤار كرن، براستى ژى ل سهر گويا زهمين، د دونيايێ دا، دوو بونهوهر ههنه، بونهوهرێن بێ گيان، واته گژ و گيا و دار و بار و كشتوكال بگشتى، يا دوێ گناوهر يان خودان روح، ئهڤهژى ههمى رهنگ و جورێن گيانداران بخوڤه دگرن، كومروڤ ژى ئێكه ژوان، لێ مروڤ گيانه وهره و خودان روحه، ئهرێ پا دێ چاوهن ئهڤ مروڤێ دبێژنێ گناوهر(بهشهر) هێتن جودا كرن و ناس كرن ژ گناوهرێن دى، راسته مروڤى هش و بير ههنه و دئاخڤيتن، ئهڤه بنگهههكێ زانستيه بو ناس كرنا مروڤان، لێ درامان و تێگههێن مروڤايهتى دا، مروڤ بونهوهرهكێ ديه، مروڤ ئهو بونهوهره، يێ خوباش ناس بكهتن و دهوروبهرێن خوژى باش ناس بكهتن، سنورێ ماف و ئهركێن خو باش بزانيتن و ديسان سنورێ ماف و ئهركێن يێن دى ژى بزانيتن، ماف و ئهركێن خو لائيق بكار دئينيتن و دهرفهتێ نادهتن يێن دى ژى سنورێن خوه ببهزينن، واته ل دهمێ ئهخلاق، پهروهرده، مهشق و پێگههاندن و تێگههشتنهكا مروڤايهتى و حهق خازى بكهتن شوپ و رێك و ل سهر كار بكهتن وهكى بنهمايكێن مروڤايهتى، كو درێزبهندا مافێ(جاردادا مافێ مروڤ) دا هاتينه خارێ، ئهوا ل سالا ١٩٤٨ز، نهتهوهيێن ئێك گرتى بشوپ و رێبازا مروڤايهتى وهرگرتين، ئها هوسان و بڤان ناڤ و ئهرناڤ و بنهكوكان مروڤێ نورمال(چاك)ديار و ئاشكرا دبيتن.
دێهدێ…خو ل سهر سهرێ مه نهكره زانا و فليڤان، مه پيچهك داخاز كر، تهگهلهك دا بهردهستێ خو، مهپسيارهك كر، ته دهرسهك(محازهرهيهك)دا، ههما كورت و كرمانج دبێژم و توژى بهرسڤا من ل گورهى خاستهكا من بێژه، نهل گورهى چيروك و چيڤانوكێت خو.
دێ باشه، بهلێ نهراسته ژى، چونكى ژيان نهروژهك و دوروژن، بهلكى دهرس و سهرپێهاتى و پهند و عيبرهتن، ئهوا تو دبێژيێ چيروك و چيڤانوك، ههمى سهرپێهاتيێن ژيانێنه، قال و قيل و سهربورێن باب و كالانه، ئهرێ ما دێروك چاوان دروست دبيتن و دهێتن نڤێسين، ڤهگهرێن بهرێ ههمى ئهقلمهندى و زهنگين كرنا هوش و بيرايه، دێ بتنێ دانهكێ خارنێ خويى، دێ چى سويكێ تشتان كريى، دێ پاقژ كهى و هنجنى، ل سهرئاگرى دێ كهلينى و پێگههينى و پاشى سار كهى و رويكه و ل ناڤا سفرهكێ دانى، ئهڤجارێ كهڤچك و چهتهل و كێر و سێنيك و ترا و بهارات و تشتێ دى..ژنويى دێ كهرهمێ كهى، بێژى وهرن خارن ئامادهيه و پاشى دێ خرڤهبين و دهست بخارنێ كهين، ژ بلى كار و بارێن پاش خارنێ، ههما بهحسا وان نهكه…ئهرێ، بوچى ل دهمێ ئهز سهربوران بهحس دكهم، ژيانێ شروڤه دكهم، تو تێك دچى و بهانان و زێده گوتناكان دبێژيه من…دێهدێ، ديسان ته چ مهزن كر، خو كره فهيلهسوف و فلى سوز..ڤێ جارێ نهژمن دهنگ و نهژى ژته دهنگ، دا بێهنا خو بدهين و پيچهك رهحهتيێ ببهين، جر و بر خلاس نابن، ڤى ههڤيرى گهلهك ئاڤ ڤهخار و بلا بهس بيتن.
سهرێن مهزن هێلينێن تهير و تهوالان يێن تێدا، شهڤێن مه دهمبزن، روژ ژى بهرهڤ درێژبونێ دچن، زستان گهلهك درێژ و مشتى باران و بهفره، سهرما گر و قهرسوكه، سهرما و سولێ مالا مه خراب كر، نهگازه و نه كههرهبه، داربرين ژى قهدغهيه، ئهگهر قهدغهژى نهبيتن، پوليسێن دارستانێ چاڤێن خوه لمه بنقينن، نهمه دار ههنه و نهدشێين ببرين، ههتا ئهگهر مههبن و ببرين ژى ما دێ بچ ئينينه مالێ، نهمه سهيارهيه و نهژى ئهو پاره مهههيه كريا سهيارێ بدهين، بناڤ ئهم باژێرينه و بناڤهروك ئهم گوندينه، گونداتى ژى مههێلاو نهبوين باژێرى ژى، وهى بابو مه چ كر و چ هاته سهرێ مه، ل گوندى پاره نهبون، بهلێ مه كشتوكال دكر، مهرومالات خودان دكر، راڤ و نێچيرڤانى مهدكر، گژ و گيايێ بهاران مه دكر و بخو ههلدگرت، نوكه ژى نهسهره و نهژى ماله، نهحاله و نهژى ئهحواله…هاريكارى و ههڤكارى ههبون، زباره و خێروخێرات هبون، يێن ههيى دهستێ هاريكاريێ بو يێن نهيى درێژ دكر، شهڤبێرى ههبوون، خرڤهبون ههبون، دنهخوشياندا پێكڤهبوين، ل خوشيان ژى ديسان پێكڤهبوين، ل دانێن پهزى و دورين و چنيان و ههمى كاريى، مه ئێك دديتن و دگهلكدا دههڤكار بوين…ل داوهتا، ل شهڤهروكا، جهژن و سهرسالان…پێكڤهبوين و مه خودانى ل ئێك و دوو دكر!
نوكه ژى بناڤ باژێرينه و ههر ئێك لمالا خويه، ل سهر شولێ خوهيه، كهسهكى هاژكهسهكى نينه، داوهت ل هولێن گشتينه و دهمێ بهحس و حهكاتان نينه، جهژن و سهرسال ژى لبهردهرينه و سهردانێن مهژى ههمى رويمهتينه…ههرئێك لمالاخو، ههرئێك ل نهالهكێ، ههرمالهك بويه وارهكێ جودا و ژێك قهتيايى و ڤهقهتيايى…بابى ئاگهه ژ كورى نينه، كور چاڤدێريا باب و دهيكان ناكهتن، برا برايى ناحهبينتن، خويشك بهردلى خويشكێ نادهتن، ههرئێك مالهكه و ههرئێك حالهكه…ژێك دووير و ژێك جودا، بێ حال و بێ سهودايى…ئهنترنێت و فێسبوك و تورێن كومهلايهتى جهێ ديوان و حهكاتان يێ گرتى، لمالا خو، دگهل خێزانا خو، دروينشتينه و كهسهكى هاژ كهسێ دى نينه…ههرئێك بويه مالهك، ههرئێكى دنيا خوههيه، ههرئێك ل جيهانهكێيه، جيهانا كهسێ و دونيايا كهسێ وهكى يا يێ دى نينه، بناڤ ئهم دبهرداينه و دناڤهروك دا ئهم ههمى گرتى و حهبسينه، يا ژ ههميان نهخوشترێ پوپچيه…ههرئێكى ل جهێ خو قيرێن و گال گاله، دێ من كوژن، من توڤێ وان حهلاند…شاتى باتيه، لێ ديسان كهس بكهسێ نينه، و كهس گوهداريا كهسێ ژى ناكهتن..ههرئێكى رێكهك ههيه، ياريهكێ دكهتن، ل سهربهرنامهيهكى كار دكهتن، تهماشايى فلمهكى يان سترانهكێ يان ژى رهقسهكێ و ياريا خويا تايبهتى دكهتن…شهڤێن مه هوسان دچن، روژێن مه ديسان هوسان دهرباز دبن، بروژێ ههمى دنڤستينه و شهڤا مه بويه روژ و روژا مهژى بويه شهڤ…نهدهنگ و پێژهنان و نهژى گوتن و گازيا مه دگههيتن ئێك، نه پێكڤه كار و فهرمانێن خوه برێڤه دبيهن، دناڤا مالێ دا بوينه مال مالكى، چاوان كهشێن مه ژێك جودانه، ههر بوى ئاوايى كار و كريا رێن مه ژى ژێك جودانه، هزر و بير و بهرنامهيێن مه ژى پێك نينن و ژئێك دوو دجودانه..!
دبێژن (( سێ كوسه ههڤال بوون، ههر سێك ژى شارهزا و عهيار بوون، دگهل هندێ نهيى و نهداربوون، جارهكێ پێكڤه كوم دبن و دبێژن ئهم دێ پێكڤه دهركهڤين و دێ بدويڤ رزقێ خو كهڤين، بهلكى دهليهڤهيهك شانصهك بومه بهێتن، بسهر رزقێ خوه ههلببين…جارهكێ دگهريانێن خودا بونه مێڤانێن مالهكێ، دياره مال ژى ياملبات بويه، خارن و ڤهخارنێن باش دانێ و قهدرێ وان گرت..لێ ديسان دياره شك ژى پێ دبرن و مراقهبا وان ژى دكر، كچهكا كێم ئاقل ژى لوێ مالێ ههبو! ئهو ژى دهليڤهيهكى دبينن و دبێژنێ ئهرێ كچا جوان رزقێ ههوه ل كيڤهيه( يانى پارێ ههوه ل كيڤهيه) كچك ژى دبێژيتنێ يێ دكارێ دا، ئهو ژى ئيتفاقێ دكهن، پشكنينا كارێ بكهن، لناڤبهرا خودا گفتو گويهكێ دكهن و رێك دكهڤن ئێك ئێكه د كولينا كارێ دا بێهنا كارێ بكهن، دا بزانن چ رزق تێدا ههيه دا بخو بدزن، مال خويێ مالێ ژى پێ دزانيتن، كێرا خو باش دهوسيتن و خوش دكهتن، خو تێد(لناڤ كارێ) ڤهدشێريتن و چاڤهرێى وان دكهتن، ئهو ژى دهليڤهيهكى دبينن، ئێك خو ڤهدليسينيتن و دچيتن بهر كارێ و خو درێژ دكهتن و دفنا خو دكهتن ناڤا كارێ دا، ئهو ژى دكهتن نهمهرى و كێرهكێ ددهتنێ و دفنا وى ژ قوپێ دبريتن، بههر حالێ ههى خو قورتال دكهتن و دفنا خو باش دگريتن و ناهێليتن خوين ژێ دهربكهڤيتن تاكو ههڤالێن وى نهزانن، ههڤالێ وى دبێژيتنێ ها برا چ حاله ته چ ژێ سهح كر، ئهو ژى بهرسڤێ ددهتن و دبێژيتنێ وهى بابو، چ خوش بێهنه، چ رزقهكێ مهزن و تێر بهايه، ههما نهبێژه و نهپرسه، بهس ههره توژى دفنا خو ببه ژورێ و بهێن بكێ، وهى بابو بهێنا بههشتێ ژێ دهێتن، ههڤالێ وى ژى بوى ئاوايى چووو، دفنا خو بره ژورێ، ههروهكى وى دفنا وى ژى برى.. ديسان وى ژى دفنا خو گرت و نههێلا ههڤالێ وى، يێ سيێ بزانيتن، ههڤالێ وى دبێژيتنێ هابرا، حال و ئهحوال ته چ ژێ فههم كر، ئهوى ژى ديسان گوت وهى بابو بێهنهكا چهندى خوشه، رزقهكێ چهندى گرانه و تام خوشه، ههما توژى ههرێ و بهێن بكه..ئهوى ژى نهكرن نهمهردى و چوو، دفنا خوبره ژورێ، دفنا وى ژى برى، ئهوى ژى دفنا برى گرت و ڤهشارت و چ نهگووت، دفن برى ڤهگهريا مالێ…بهلێ دفن برى و بێ قويت و رسق، هاتنه مالا خو…برايانا ئها هوسانێ، ئهم يێن بوينه چاڤلێكهر، ئهم كوسهينه، لێ كوسهينه و دكهين و ناخوين، كار دكهين و كهدا مه نهيا دياره، دهێينه كوشتن و خوينا مه بههدهر دچيتن..سهرومالێ مه، كهد و حالێ مه…ل سهر تالانه، ئهم وێران دبين و ئهم بوينه كوسه…بێ دهنگين، عهيبا خو ڤهدشێرين، ههروجارهكێ دفنا مه دهێتن برين، ئهم بێ دهنگين، برينا خو ڤهدشێرين…نهوێرين بێژين، شهرم دكهين بببێژين…لهومانێ دێ حالێ مه ئهڤهبيتن، دفنا مه دێ يابريتن، مالێ مه ديێ دزى و تالان بيتن، وهلاتێ مه دێى داگير كرى بيتن…ئهم ژى ههردٍێ هوسا دامايى و بريندار بين….كهنگى بوين مروڤ، كهنگى مه خودانى ل كهد و مال و شهرهفا خو كر، بوينه خودانێن خو، هينگێ دفنا مه ناهێتن برين، مالێ مه ناهێتن دزى و تلان كرن، وهلاتێ مه ژى دێ رزگار بيتن…ئهم ژى دێ بخودان و ماف و ئهرك و پاستن ژين و ژيارا خو پێكڤه بورينينن )).
بو دهمێ خارنێ، من وهكى جاران خارنهك ل لێناگههێ دروست كر، بوێ مهرهمێ بخوم و ئهندامێن دى ژى يێن مالا مه، ل دهمێ ژ سهر كارێ خوه( دهواما خو) ڤهدگهرهن، دبرسى و وهستياينه، دا ئهو ژى بخون…من پهلاڤ ماش دروست كر، پهلاڤ ماشێ، ماش، برنج و دئاڤێ دا دهێنه كهلاندن، من هندهك بهارات و خوێ كرنێ، دروينى دا پيڤازهك و هندهك پيژكێن سيرێ سور كرن و بسهردا كرن، بو من يا خوش بو، يێن دى ل دهمێ ژ دهواما خو دهاتن هندا دخار و هندا ژى تشتهكێ دى بخو ئاماده دكر، وژدانێ كوكابانيا مالێيه، ريجيم دكر، ئهوێ وهكى دكتورێ وێ، بهرنامه بو داناندى ئاڤكهكا تێكهك ژ زهرهواتان و هندهك ماسى بخو بهرههڤ كرن و خارن، كچكاژى هندهكا خار و بو خو ئهندومى دروست كرن، ئهو حهز ژ ئهندوميان دكهن و بێ ئهندومى ناژين، هندى ئهم دبێژينێ گوهداريا مهناكهن و ئهو ب خو ب خو ههردێ دروست دكهن، ئاڤهندى ژى لهفهكا پهنيرى بوخو دروست كر، ههجهتا وى ئهو بو، بهارات زور تێدانه و ياتيژه و نهشيا بخوتن…بههرحال ئهڤ روژه ژى مه هوسان بوراند… تاك بتاك چوينه خارنگههێ و ههرئێكى وهكى خوه خارنا خو خار….!!
بهاره و لههى يێن رابوين، كانى يێن دهربووين، شيڤ يێن رابوين و يا بويه لههى و توفان، توفانێ ل هندهك جهان سهياره دبرن، ل هندهك جهان پهز و حهيوان فهتسينه، ل هندهك جهێن دى خانى برينه، پر و جهێن دهرباز بونێ برينه، ژيان بتهڤايى كهڤتيه ناڤا بڤهتى و خهتهرێ، روژهكێ بو بهێنڤهدانا گشتى و دهوام بگشتى راوهستاندن، ل هندهك دهڤهران ژى دوو روژ كرنه بهێن ڤهدان، نهخاسم ل پارێزگهها سلێمانى و ههلهبچه…بههر حال دهوك و ههولێرێ ژى لههى و توفان راببوون، لێ ديسان نهوهكى جهێن دى بوينه، خهلكى ههست ب بێ خودانيێ دكر، نهخاسم رۆژا ئێكێ، تورێن كومهلايهتى هاتبونه شارياندن و دهنگێ بێ خودانێ دهنگ ڤهددا، هندا گازى سهروكێ وهزيران دكر، هندا گازى وهزيرێ پهرهردێ دكر، هندا ژى گازى پارزگهه و رێڤهبرهرێن تهربيێ و قوتابخانهيان دكر، هندا ژى خو ل چ نهگرت و بهێنڤهدان راگههاند و كره بهێن ڤهدانهكا گشتى…مانێ بێ خودانى وهسايه، يێ ئاقل ل دهليڤهيا پێويست بريارێ ددهتن و يێ مێرخاس ژى خودكهتن بهراهى و قوربانيێ ددهتن…!
…(( هايى ماله ماله، مالخوێ مالێ نهلماله، كابانى گهوره و ماله، خودانا عهرز و عياله، هايى هينه و هينه و هينه، راستى چهندا شرينه، بهرزهيه و لناڤ مه نينه، بهرزهيه و لناڤمه نينه، راستيێن مه درهون، گوتنێن مه پهلا و پينه، گوتنێن مه پهلا و پينه، هايى شينه و شينه و شينه، سهرێن مه بههڤسارن، ههڤسارێن مه لناڤدهستينه، سهركێشێن مه نهيارن، نهيارن پارى خارن، خارن پاره و دولارن، دولارن شهده و بلوك، هايى ههمه و ههمه و ههمه، بهسم تێرا خو ههمه، بهرپرسێن مه ديوارن، بهريكێن وان خرارن، تێر نابن صهيێن هارن، بومه شێر، بو خهلكى رويڤى، رويڤينه و دزێن ترسايى..تێرنابن ژ رهشوێ و قومار، بێ بابن خوناس ناكهن، دهيوزن تهرهسێن پارن، شوپا وان ههريا پێرا، نهچێدبن، نهدبن ههڤپار، دزێن مه خر كوندزن، پاران ژ ژنێن خو دزن، بابێ خويێ ژ بيركريى، مالا وى تالان كريى، چ ناڤ بو نههێلايه، بصهگبابيێ نازڤرن، وهك كهرى دچن دزن، سهركێشێن بزن و ميهان، سهركێشێن رێكا وندا، وهى بابو ئهڤ صهبابه، تێرنابن، دائيم دخون، دچن و ل خونازڤرن، دكهڤن توبهناكهن، شهرم و عهيبێ ژ خوهناكهن، ئهو گهوادێن قهحبانه، قهحبه ژوان شهريف ترن، بتنێ ئهو خوددهن، لێ ڤانان وهلات فروت، ناموس و شهرهف فروت، ناڤ و دهنگ لمه وندا كرن، لناڤا وهلاتێ خو، غوربهتى و كوچبهر كرين، لناڤا وهلاتێ دا بێ ناڤ و ئهرناڤ كرين..)).
باران دباريتن تو دنڤێسى، دبيتن چريقێنا بروسيا تودنڤێسى، لههى رادبن ههر تو دنڤێسى، ماندى نابى، دهستێن ته شل نابن، چاڤێن تهنائێشن، دا ژ هندێ ڤهبن، قسهتهكا راست و مفاداربينينه زمان: (( كهلها ميرێ گرێ سور، دكهڤيتن بنێ گامنێركێ باتيفا سهيدا، لناڤبهرا چيايى و رويبارێ نهنێكى، ل روژههلاتا دهستا گرێ سور، دبێژ ميرێ ڤێ كهلهێ، زێدهى(30)سيه گوندێن دهڤهرا بهرواريان لبن دهستههلاتا وى دا بون، ل ههر گوندهكى وهكيلهك ههبو، ههرسال ژى ل دهستپێكا مها رهمهزانێ سهردانێن خو دهستپێ دكرن، مشارا وان گوندا دگوتنێ مشاره گونێن بهر نهنێكى، وهكى خانكێ، ئاسهێ، مهگلانا، شێلازانا خراب…تاكو دگههشته گوندێن خرابهيى و هێسێ…دبێژن گوندهك ژ وان دگوتنێ گوندێ مروڤ خوران(نوكه كاڤله گونده)، جارهكێ ژ گوندێن دهردورێ وى ژنكهك ژمالا خو زيز دبيتن، دچيتن ڤى گوندى لمالهكێ دبيتن مێهڤان، ل دهمێ شيڤ خارنێ شيڤێ بو ددانن، ژنك ژى برسى بويه و كهڤچكهكى لئاڤكێ ددهتن و دبينيتن، دهستهكێ بچيكهكى بسهر ئاڤكێ دكهڤيتن، ئهو ژى بلهز وى دهستى دناڤا لهونديێ خودا دڤهشێريتن، جا چ تشتهك خارى يان ژى نهخارى، ل خودكهتن بهرێ سپێدێ ل وێ مالێ، ل دهمهكى ژوێ مالێ دهردكهڤيتن و بغاردان دگههيتن كهلهێ، داخاز دكهتن بچيتنه دهڤ ميرى، بههر حالێ ههى، دچيتن كوچكا ميرى و وى دهستى لبهر سينگێ ميرى ددانيتن و ڤێ قسهتێ بو ڤهدگێريتن، ديار بو ژى ئهو سهرێ چهندين سالان بو ههردهم بو دهمى زاروكهك يان چهند زاروكهك هندا دبون…مير ژى بلهز دهست بڤهكولينێن خو دكهتن و بو ديار دبيتن ئهو زاروكێن بهرزه دبن، لڤێ مالێ دهێنه سهرژێ كرن و گوشتێ وان دخون، ئهو ژى حوكمێ مرنێ ل سهر ڤێ خێزانێ بجهدكهتن و ڤى گوندى بئێكجارهكى خراب دكهتن و وهكى كاڤلهيهكى دمينيتن(( دبيتن چ راستى ژ بو ڤێ قسهتێ نهبن و نهيا بهرئاقله، لێ ئهڤ قسهته بزارهكى من گوهلێ بويه و ل سهر بنياتێ وێ گوهلێ بونێ، من نڤێسيه..))، ژيان وهسايه هندهك دكهن و هندهك دخون، هند ژى ئهگهرێن بوير و رويدانه و دناڤێ دا مهزن دبن، چ دژيانێ دا بمينن، يان دوێ رويدانێ دا ببنه قوربانى يان ژى پههلهوان، لێ هندهكێن وهكى مه ژى دنڤێسن و ڤهدگێرن، جا چ وهبيتن يان ژى راستيا وێ نهبيتن، گهلهك چيروك و چيڤانوكا راستيا وان نينه، لێ ڤهگێرانا وان، ديمهنێن وانان دبنه جهێ سهرنجێ و دهێنه گوتن و ڤهگێران و پاشى دبنه پشكهكا نهمر و ساخ ژ توره و كولتور و بهرمايكێ گهل و مللهتان، ئهڤ گوتن و ڤهگێرانه بهرخورهكه يان بهرههم و داهێنانانهكه گهل و مللهت ل سهر دهێنه هايدار كرن و پهرهرده و فێركرنێ بخو ژێ وهردگرن، ديسان ژى دبنه ناڤ و ناسنامه بو خهلكێ وى وهلاتى، ئهڤ سهرپێهاتيه ژى هندهك تايبهتينه بئێك مللهت و هندهك ژى ههڤپشكن و لناڤا زور مللهتان دهێنه گوتن و ڤهگێران، جا چ بئێك رهنگ و سهليقه بيتن يان ژى بئاوا و جور و رهنگێن ژێك جودا، لێ ههر ڤهگێرانهكێ ژى تايبهتمهندى و دهربرينا خو و گهلێ خو ههيه، رهوش و تيتال و توره و كولتورێ مللهتێ خو، رامانا وى دگههينن.
(( بێل بێلاڤا… دهست ل چاڤا…بونههاتى…درهنگ هاتى…چاڤێ سهرى…لبهردهرى…مه سهمايه…خهم ئاڤايه…بويك دوتمامه…ياب كهماله…روند رويخاله…خوش بهرماله…بهژن زراڤ…روى سور گولاڤ…نوى گههايه…بخفش و خاله…دێ زوى وهره…عهلى كهمال…تو زاڤايى…زور ژ مێژه.. تو پێ دبێژى…وێ دخازى…چهند سال بورين… ل هيڤيا ئێك مان…ئهڤيندار بوون… دل كهدار بوون…نهو دهمهات…شانصێ وههات…گههشتن ئێك…بون رزقێ ئێك…خو تێك وهركهن…بويك و زاڤا…ها نێزيكه… داوهتا وه..شههيانهكا خوش و شهيدا…بخو بكهن…روژێن چويى .. ژبير خو ببهن…دونيا وايه…هات و باته…فهلهك دوره…ههرجار ناهێت…مهيدانا ژينێ فرههكهن…مالباتهكێ ئاڤابكهن…خودانيێ لمالا خو بكهن…زاروان چێكهن…قنێتا خو هوين زێدهكهن…وهلات دايهكه…وهلات بابه…باغهكێ ژينێ هوين ڤهكهن..مالباتهكێ ل شوين پێ خوه بكهن… مالباتهكێ ل شوينا خوبكهن)).
ئهڤه ڤههاندنهكا سهرپێه و بئاوايێ فلكلورهكێ كلاسيك هاتيه نڤێسين، لێ دراستيدا، نهفلكلوره و نهژى كلاسيكه، بتنێ ڤههاندنهكا هات و باته، دبيتن رامان و دهربرين ژى ههبن، مه بوێ مهرهمێ نڤێسيه، لێ ئهڤه بريارا خهلكيه، كانێ ئهو چ بو دبێژن، تورهڤان و رهخهنهڤان دبيتن تشتهكى ژێ بهيان بكهن، چ باش يان ژى خراب، دبيتن ژى يارى و حهنهكا خو بمهبكهن، بههرحال مه تشتهك نڤێسا و بهرهك ل سهر بهرهكى ئاڤاكر، بلا وهكى وان نهكهين يێن دزى و حيلا دكهن، ل سهر كهدا خهلكى دژين و بنوايهشێ خو لسهر بهرێ كهدا يێن دى ئاڤا دكهن، ل ڤى وهلاتى، نهههر بهرپرس و فهرمانبهر و زهنگين دزيان دكهن، بهلكى خهلكێ دى ژى ههيه دزيان دكهتن، يان بهرێ خوها خهلكێ دى بخو دچنيتن، ههتا ئهوێن دبێژنێ روشمبير لڤى وهلاتى دبنه دوو جوين، يێن پێگوتانان بو دهستههلاتێ دبێژن و دبنه دههول قوتێن دهستههلاتێ، گهلهك جاران دزيا و چاڤلێكرنێ ژى ناكهن، لێ كهد و ڤهرێژا وان مهلاقى و ديڤهلانكى و جوان كرنا رويێن كرێتن…لهومانێ ئهگهر دز ژى نهبن، دچنه دخانهيا دزيكهران دا…جوينا دى، يان روبيشتا دوێ يا روشمبيران، كودبێژنێ روشمبيرێن ئازاد يان قهلهمێن ئازاد، ئهڤه ههم دهربرينا خو دكهن و ههم ژى دهربرينا گهلێ خو ژى دكهن و دبنه ناسنامه بو مللهتێ خو، ئێش و ژانێن وان دگههينن و دهربرينا وانان دكهن، لێ جار جاران، يان مهگوهلهندهكان ژ وان ژى دبيتن، ژێر بهژێر يان بنهپهنى دێ هندهك ژ ڤانان ژى بنه كرێ گرتيێن هندهك كهس و لايهنان، دێ بو خهلكێ خراب لويرن و بيتن حهف حهفا وان، دبيتن ئهزێ يێ شارهزا نهبم، لێ ل گورهى من و ئهو پێوهرێن ل دهڤ من كێشان و پيڤان پێ دهێتن كرن، ئهڤ روشمبيره، ئهڤ قهلهم شكهستيه، نهههر دويڤهلان و خو فروشن…بهلكى ئهڤه گهل فروش و وهلات فروشن، گهل فروش و وهلات فروشان ژى نهدين ههيه نه وژدان، نهناڤ ههيه نهژى ئهرناڤ، نهژى ئهخلاق ههيه و بتنێ چينهكا بێ شهرهف و بێ پهروهرده و جاش قوروجيێن سهردهمێ خونه، بازرگان، بێ وژدان، دهلالن بێ ناڤ و بێ ئهرناڤ…خرابيا وان، نهباشيا وان تا كو دگههيتن خهيانهتێ و تفا دێروكێ وهردگرن، وهكى خهلاتهكێ دێروكێ و وهكى بێ ناڤيهكا ههر و ههرى.
اكرم خالد عبدالكريم/سيد اكرم/ دهوك
