ئه‌وا ئه‌ز دبينم، دبيتن تو نه‌بينى..!!ا
ئه‌وا ئه‌ز دبينم، دبيتن تو نه‌بينى
اكرم خالد عبدالكريم/سيد اكرم
ئه‌ڤ سه‌ربابه‌ته، دوو رستيێن ته‌واوكه‌رى ئێكن، يان دوو نيڤ رسته نه و رسته‌يه‌كا ته‌مام دروست دكه‌ن، ئه‌ز راناوه و ئه‌و تاكه يێ دئاخڤيتن، تو ديسان راناوه و تاكه و كه‌سێ دووێيه، يان ئه‌و كه‌سه يێ دگه‌ل دئاخڤيتن، ژيان دبون و ئافراندنێن خوه‌دا( مه‌ره‌م ژيانا گناوه‌رێن مروڤه)، جووت بونا دووتاكايه و ئه‌ڤ جووت، جووته زێده‌دبن و كومه‌لگه‌هێ دروست دكه‌ن و كومه‌لگه‌ه ژى گه‌ل، نه‌ته‌وه، گه‌لستانان دروست دكه‌تن، ئه‌م بره‌نگه‌كێ دى دشێين بێژين ژيانا به‌شه‌ريه‌تێ(گناوه‌رى)، ژجووت بونا جووتان دروست دبيتن، نێر و مێ دگه‌هن ئێك و گوهنێلێ دكه‌ن، واته جووت دبن و توڤێ نێره‌ى، ديوارێ هێكا مێيێ دسميتن و دچيتن ناڤێ و پيتێن دروست دبيتن، واته دوو خانه( نێر- مێ) دگه‌هن ئێك و كورپه‌له‌ى دروست دكه‌ن و دابه‌ش بوون، به‌رده‌وام دبيتن، تاكو كورپه‌لێ گه‌هشتى دروست دبيتن و پاشى كريارا ژدايك بوونێ، دروست دبيتن و زاروكه‌كێ نويهاتى دهێتن دونيايێ، تسته‌كێ زانستيه دناڤا هه‌رئێكێ ژ توڤێ زه‌لامى و هێكا ژنكێ( كو هه‌رئێك، ئێك خانه‌يه)، بوماوه هه‌يه، لناڤا بوندێن ترشێ (دى ئين ئين)، يانى هه‌ر توڤه‌كێ زه‌لامى(٢٣) بيست و سێ كت كروموسوم، دگه‌ل(٢٣) بيست و سێ كت كروموسومێن مێ(هێكا ژنكێ)، جووت بوون دروست دبيتن و هوسان(٢٣)بيست و سێ جووت كروموسوم دروست دبن و دبنه بوماوه، بو بنياتێ مروڤه‌كێ نوى هاتى، چ كور يان كچ بيتن، ره‌گه‌زێ نێر و مێ ل سه‌ر هێزا بوماوه‌ى، واته ل سه‌ر هێزا صيفه‌تا كروموسومان دراوه‌ست دبيتن، ئه‌گه‌ر صيفاتێن توڤى زێده‌تر بوون دێ بيتن كور، ئه‌گه‌ر يێن هێكێ زورتر بوون دێ بيتن كچ، هه‌كه‌ر ژى چه‌نداتى و جوراتيا وان كێماسى تێدا بيتن، واته زارويه‌كێ كێم ئه‌ندام يان نه‌دروست دێ ژێ دروست بيتن، ژ بلى وێ نورمالى و ته‌ندروستيا ره‌گه‌زى ل سه‌ر هنده‌ك صيفه‌تێن دى ژى رادوه‌ستين، وه‌كى ئه‌كتڤێ(هێزا) خوينێ كانێ(+) يان (- )، ديسان ئه‌گه‌ر نڤشتێ ژن و مێرا نێزيكى ئێك بيتن( وه‌كى دوتمام و پسمام يان كچ خال و كور خال..)، ديسان دبيتن زاروكه‌كێ كێم ئه‌ندام ژدايك ببيتن، ژ به‌ر وڤێ، به‌رى هه‌ر ژنئيناكێ گرنگه پشكنينێن نوژدارى بهێن كرن، هه‌رديسانێ هندى قنێتا ژن و مێران يا دويرى ئێك بيتن، روبيشته دێ ياباشترێ بيتن، هه‌تا ل ئاليێ جڤاكى و تێكه‌ليا په‌يوه‌نديێن مروڤى دا، باشتر و سه‌ركه‌ڤتى ترێ پروسێسا ژنئينانێ يا پاقژتر و ببه‌هره‌يى ترێيه و ده‌رگه‌هێن مروڤايه‌تيێن ژى پێترێ ڤه‌دبن..!
بهه‌ر حال دا بڤه‌گه‌رهين سه‌ر بابه‌تى، بابه‌ت دان و ستاندنه‌كه لناڤبه‌را دوو كه‌سان دا، چ نێر يان مێ يان ژى بئاوايه‌كێ دى ببێژين، گناوه‌ر وه‌كى كرياره‌كا زانستى چاوان ژ كريارا جووت بونێ دروست دبيتن، ته‌ماشا بكێ، مروڤى دوو پێ هه‌نه، دوو ده‌ست هه‌نه، دوو گوه و دوو چاڤ هه‌نه…لێ هنده‌ك كت و هنده‌ك ژى ئه‌ندامێن زێده‌يى جووتى ژى هه‌نه، هه‌تا كو ئه‌و گناوه‌رێن دبێژنێ چار پێ ژى، هه‌رچار نه‌پێنه، به‌لكى دوو پێ و دوو ده‌ستن…يانى پروسه‌يا جووت ره‌گه‌زيێ زور توڤى و زور رامانى و زور جورى و زور وێنه‌يى هه‌يه…ئه‌م گوندى شاره‌زاى ژيانا گونده‌واريێينه، هه‌رچه‌نده دهوك گه‌ر بناڤ باژێر بيتن، لێ دناڤه‌روك دا گونده و خه‌لكێ وێ هه‌مى يان گوندينه يان ژى فێرى ژيانا گونده‌واريێنه، مه سوحبه‌ت ل سه‌ر جووتى بو! جوته‌كێ گايان جووت پێ دهێتن كرن، لێ مروڤ دكاريتن جوتى ب جوته‌كێ كه‌ر، هه‌سپ، هێسترا….ژى بكه‌تن، لێ جووته‌كێ جێلا يان بزنان، يان ميهان، يان ديكلان…لگه‌لكدا نه‌يا ره‌هنيه، نه‌يا گونجايه، چونكى ل گوندا، هندى مه ديتى جووت بگا، كه‌را، هه‌سپا، هێستران دهاته كرن، ژبلى ته‌ره‌كتور و ئالاتێن نويى يێن جووتى، ئه‌و ل كه‌ڤن نه‌بوون يان زور دكێم بوون…ل ڤێره پسيار ئه‌وه، ئه‌رێ حكومه‌تا مه، يان جڤاكێ مه د مه‌سه‌لا جووتى دا، يان پروسێسا جووت بونێ دا، يان دمه‌سه‌لا ژن ئيناند و مالداريێ دا، چ پێنگاڤێن نوى هاڤێتنه، دچ واردا پێشداچوون دروست بويه، پروسه پێشڤه چوويه يان پاشڤه‌مايه، لايه‌نێ وێ يێ چاك و خراب چيه، چ دهێتن خاستن بهێتن كرن، ئه‌ركێ تاكى چيه دپروسه‌يا جووت بونێ دا، چ تايبه‌تمه‌ندى هه‌يه و چ پێويسته بهێتن كرن…ئه‌ڤه پروسه‌يه‌كا ئالوزه و تشى مژاره…ئه‌م بنه‌زانينا خو نكارين ببينه مه‌له‌ڤانێن ڤى ده‌ريايى، له‌ومانێ دێ ڤێ پرسێ بو كه‌سانێن شاره‌زا و تايبه‌تمه‌ند بجههێلين، بوێ مه‌ره‌م و هێڤيێ، خودانيێ ل ڤێ پرسێ بكه‌ن و به‌رسڤ و نارونيێن هه‌يى ئاشكرا بكه‌ن، تاكو جڤاكه‌كێ ساخله‌م و ل سه‌ر بنواشه‌يێن زانستى و په‌روه‌رده و پێگه‌هاندنه‌كا باش، ئه‌ڤ پرسه بهێتن چاره‌سه‌ر كرن و سه‌راست كرن، ئه‌و ژى راستيه‌كا حاشا لێنه‌كريه، كه‌سانێن ساخله‌م، مروڤێ ب په‌روه‌رده و زانست، ستون و بنه‌مايكێن جڤاكێ پێشكه‌ڤتينه..!!
ل ڤێره بتنێ مه‌ره‌م ئه‌وه ئه‌ڤ جڤاك و گه‌لێ ساخله‌م و په‌روه‌رده كرى و مشتى زانين و بزاخ و كه‌د مه‌هه‌بيتن، چونكى بێى ڤێ ئيداره‌دان و ده‌وله‌تداريا ساخله‌م و پێشكه‌ڤتى ژى دروست نابن و ئاڤاكرنا كومه‌لێ بێى ڤێ يه‌كێ شاش و هه‌ژهه‌ژوك، ئاڤاد بيتن و زوى كه‌ڤتن و شكه‌ستنێن بكومى ل سه‌رك كه‌له‌كه دبن..!
ديسان ل گوندان گه‌له‌ك جاران ل ده‌مێ فروتنا متايى، وه‌كى هێك و گويزا…جووت جووت دهاتنه فروتن، جووتێ وان بفلسه‌كى يان كێمترێ يان ژى زێده‌ترێ بويه، لێ هنده‌ك متا ژى بجووت و كتان نه‌دهاته فروتن، وه‌كى دانى( گه‌نم، جه‌ه، نوك، نيسك، ماش، مێويژ، كتك، كرزن…ئه‌ڤه ب وه‌قى، كيلو، من و باتمانان…دهاتنه كرين و فروتن يان ژى بفه‌رده و سه‌ڤيان…بازار پێ دهاته كرن..)، هنده‌ك جاران ژى بازار ل سه‌ربارى بو، ئه‌ڤجارێ بارێ كه‌رى، هێستر يان هه‌سپى…گه‌له‌ك تشت ژى بازارێ وان يان بكارئيناندنا وان ژى ل سه‌ر جووتى يه، وه‌كى جووتێ پێلاڤا، جووتێ گوهارا، جووتێ خرخالان، جووتێ نه‌عالا…!
هنده‌ك ژى خودانێن جووتێ ژنان بوون، لێ ل ده‌ڤه‌رامه و لناڤا عه‌شيرا به‌رواريان دوو ژنى زورا كێم بو، ئه‌ڤارێ چ ژ به‌ر ئه‌گه‌رێن ئالوزيێن ژيانێ يان بێ حاليێ، يان ژى ژ ئه‌گه‌رێن تێگه‌هشتنا جڤاكى بيتن، لێ عه‌شيرێن ده‌روجيرانێن مه وه‌كى گولى، سندى، كوچه‌ر، دوستكى، مزويرى…دوو ژنى يا مشه بو، هنده‌كان ژى دكرن سێ و چار ژن، موختارێ مه ژى( عه‌زيز غه‌فور ياسين) ل ده‌مه‌كى جووت ژنێن خوه كرنه سێ، لێ بتنێ دانساله‌كێ ڤه‌كێشا و جاره‌كا دى كرنه دووژن، هه‌رچه‌نده نوكه‌ژى دالغا سێ ژنى و چارژنيێ لێ دده‌تن، هنده‌ك جارا بخو ل دويڤ ژى دگه‌رهيتن…لێ ده‌مه‌كه يێ بێ ده‌نگه، نوزانم دور دايه كورێن خو، خودێ وان بهێليتن، يان ژى پارێ وى نينه، دبيتن ژى هێزا سێ ژن و چار ژنان ژى نه‌بيتنن، بهه‌رحالى، يێ بكارێ مالێ و موختاريا خوڤه مژويله، بلا ڤى بابه‌تى ژى نه‌خوينيتن، ئه‌گه‌رنه‌دويره هه‌ستێن وى بلڤن و جاره‌كا دى بچيتن سه‌ر ده‌هودويا خو، شولێ خوه بێليتن و لدويڤ ژنان بگه‌هيتن..!!
سلاڤ و ره‌حمه‌ت ل سه‌ر هه‌ڤال و برايێ من ره‌حمه‌تى( سه‌لمان سندى)، مه گه‌له‌ك بيرهاتن پێكڤه هه‌بوون، ئه‌وى زور حه‌زكرنا ژنان هه‌بويه، ئه‌و خودانێ چار ژنان بو! ل بيرا منه، ل ده‌مێ ل سالا١٩٨٦ حكومه‌تێ ليژنا ناوچا زاخو و دهوك گرتى، لقێ1 هنده‌ك به‌رپرس و كادر(ته‌جميد)كرن و ئيناندن لقێ، ل زێوه، ره‌حمه‌تى سه‌لمان ژى ئێك بو ژوان، بو خارن و ڤه‌خارن و نڤستنێ ل سه‌رخالێن لقێ دابه‌ش كرن، سه‌لمان و كورێن وى هاتن لايێ مه، ل وى ده‌مى، ئه‌ز، حسن تروانشى و جه‌لال مه‌حه‌مه‌د خابور، ل زالگه‌هێ بوين، ده‌مه‌كێ زور خوش مه پێكڤه بوراند، ل وى ده‌مى خه‌لك زور ژ عێراقێ دره‌ڤين، نه‌خاسم برامه‌سيحى، براستى ژى ژنكێن جوان و عه‌لموده دگه‌ل دا هه‌بوون، ل وى ده‌مى ژى پێشمه‌رگه برسيێن ژنكابوون، هه‌ما هنده‌كا پاته‌كێ سور ديتبايه، خودكێشان نێزيك، سه‌عيد گرگره‌يى هه‌رجار دگوت ئه‌رێ ئه‌ز دێ كه‌نگى نڤم و سه‌ره‌ك ل سه‌رباليفكا من بيتن، هنده‌ك جاران ژى دابێتن خودێ سه‌ره‌كى دانه سه‌ر باليفكا من بلا سه‌رێ بزنێ بيتن..!
دابهێين سه‌رمه‌سه‌لا سه‌لمان سندى، هه‌ڤالێ مه حه‌سه‌ن هه‌م جحێله‌كێ جوان و رێك و پێك بو، هه‌م ژى دئه‌ركى دا زوريێ پێگير بوو! ده‌مێ دچوو سه‌ر ئه‌ركێ خوه، ئێكسه‌ر ره‌حمه‌تى سه‌لمان دا بێژيتێ حه‌سه‌نا توبخودێ كه‌ى پسيار بكه، كانێ كه‌سه‌ك نينه ژنكێن خوه سه‌رگوهورى بكه‌ين، حه‌سه‌نا چاره‌يه‌كێ بكه ئه‌م سوت و حه‌لياين بو ژنكه‌كا دى، هنده‌ك جاران ژى دا بێژيتن ئه‌گه‌ر ژنكه‌كا من ره‌حمه‌تێ بكه‌تن، ئێكسه‌ر ئه‌ز دێ كه‌مه پێنج…لێ پشتى ژنكه‌كا وى مرى، براستى ژى ئێكسه‌ر ئێكا دى ئينا و كرنه پێنج….لێ ل ڤێ دووماهيكێ دوو ژنكێن وى چونه ره‌حمه‌تێ، لێ چ ژنكێن دى نه‌ئيناند، جاره‌كێ من پسيار ژێ كر و گوتێ، ئه‌رێ سه‌لمان ته‌خێره تو چ ژنكێن دى ناينى يان ته هێزا ژنكه‌كا دى نه‌مايه! گووت نه‌ولاهى برا من هێز مايه، لێ ده‌رچوو ل ده‌مێ مه گه‌له‌ك ژنك دئيناندن، ئه‌م دبێ ئه‌قل بوين! نه‌خاسم نوكه پشتى موبايل ده‌ركه‌ڤتين…هه‌ما دێ ته‌له‌فونه‌كێ كه‌ى، ئه‌وا ته دڤێتن دێ هێتن، ئه‌ڤجارێ چ كورت يان درێژ، چ جان يان كرێت، چ پير يان جه‌حێل…دێ شولا خو قه‌تينى، سه‌د دولارێ وێ ده‌ى، نه‌دبه‌يى بازارى، نه دختورى، نه‌جلكا بو دكرى نه‌ژى خارن و ڤه‌خارنێ، نه‌گازنده و نه‌ژى توشى قه‌رقه‌شێ دبى…وه‌يى بابو هه‌ما ڤێ موبايلێ دونيا يا كريه به‌حه‌شت…مه غه‌يبه‌تا سه‌لمانى كر، خودێ ره‌حمه‌تێ لێ بكه‌تن، عه‌يالێ وى ژى مه سلاڤ بو هه‌نه و داخازيا سه‌لامه‌تى و ژيانه‌كا خوش بو دكه‌ين، دخازين هه‌رده‌م دويرى به‌لابن…ل مه‌ژى نه‌گرن، ژ مه توره‌نه‌بن، چونكى ئه‌م حه‌زژێ دكه‌ين و مه قه‌بيل كريه وه‌كى برا، ئه‌و نه‌هه‌ر هه‌ڤال بويه، به‌لكى ئه‌و بو مه كه‌س و خودان بويه، ئه‌و چوو وڤه‌گه‌را وى نينه، لێ دووباره دخازم كوچكا وى هه‌ريا ئاڤا بيتن، مالا وى هه‌ريا خانه‌دان و تژى به‌ره‌كه‌ت بيتن…!!
گه‌له‌ك بيرهاتن و تشتێ وى يێ گرنگ و تژى بها دخه‌زينه‌يا هزرێن من دا تومار بويه، ل سه‌ر هه‌مى تشتێ وى، چ باش چ ژى خراب، هه‌ر مروڤه‌كى تشتێ باش و يێ خراب ژى هه‌يه، لێ ئه‌وا ل ده‌ڤ من دبيتن ل ده‌ڤ كه‌سه‌كێ دى نه‌بيتن، يان ژى ئه‌وا لناڤبه‌را مه دا دبيتن لناڤبه‌ر وى و كه‌سه‌كێ دى دا نه‌بيتن، ل ڤێره من دڤێتن قسه‌ته‌كا خو دگه‌ل وى به‌حس بكه‌م، ئه‌ڤ قسه‌ته گوپيتكا وه‌فادارى و گوپيتكا مێرانيا وى ماندێل دكه‌تن، له‌ومان فه‌ره بێژم و ژبير ژى ناكه‌م..!
ل ده‌مێ ل سالا ٢٠١٢ ئه‌ز ژلا يێ چه‌تێن ده‌ستهه‌لاتێ ڤه هاتيمه ره‌ڤاندن و پاشى هاتيمه زيندان كرن، ئه‌ز ل زيندانا زاخو بوم!
روژه‌كێ پشتى نيڤروبو، پوليسه‌كى گازى من كر و گووت سه‌يد كارێ خو بكه، داخازيێن سه‌ره‌دانا ته هاتينه! من ژى كارێ خو كر و چومه ده‌رڤه، ئه‌ز برمه ژورا ئه‌فسه‌رێ نوبه‌دار، ئه‌فسه‌ر جحێله‌كا زور باش و رێك و پێك بو، من ديت سه‌لمان و كورێ وى هاتينه سه‌ردانا من، براستى ژى ل ده‌مێ مه ئێك و دوو دديتى، هه‌رجار ئێكسه‌ر كه‌نى و كه‌يفا مه ده‌ردكه‌ت و نيشانێن خوشيێ به‌لاڤ دبوون، لێ ل ده‌ما مه ئێك دوو ديتى، راسته مه خوهاڤێته ئێك، لێ چ نيشانێن كه‌يف و خوشيێ نه ل ده‌ڤ من و نه‌ژى ل ده‌ڤ وى په‌يدا نه‌بوون، به‌لكى حه‌سره‌تى و ئاف و ئوفان سينگێ مه دژه‌نى و خه‌ريك بو كرى ژ گه‌وريا مه هه‌ردووكان ده‌ربكه‌ڤيتن، لێ بهه‌ر حالێ هه‌ى مه هه‌ردوكان خو راگرت، گريا خو مه حه‌بس كر، روندكێن خوژى مه هشك كرن، ئه‌م هه‌ردووك ده‌مه‌كى بێ ده‌نگ ماين…پاشى مه ده‌ست بسوحبه‌تێ كر، سوحبه‌ت زور يا بشه‌وق و مه‌ره‌ق بو، ناخازيتن وان سوحبه‌تان بكه‌ين، لێ يا من پێ مه‌ره‌م ئه‌و بويه، ده‌مه‌كى بێهنا خو هه‌لكێشا و بحه‌سره‌تى ڤه گووت، سه‌يد من سوزا برايه‌تيێ دايه ته، ئه‌ز ته‌باش ژى ناس دكه‌م و دزانم تو قوربانيێ مه‌يى، تو يێ راستى و پشته‌ڤانيا راستيێ دگرى…ئه‌ز وێ ژى دزانم، تو گرتيێ كێى و به‌ردانا ته‌ژى بمن وه‌ره دێ يا بزه‌حمه‌ت بيتن، چونكى تو ده‌ست ژ گريا خو به‌رناده‌يى، خو راده‌ستى زولمێ ژى ناكه‌ى، نوكه من دڤێتن بزانم، ئه‌رێ تو ژ خو دترسى يان نه! ئه‌گه‌ر ترسه‌ك ل سه‌ر ته‌هه‌يه، بێژه من گه‌له‌ك مێرێن مێرخاس و چه‌كدار من دگه‌ل خودا ئيناندينه، هه‌ما نوكه ڤه‌به‌رى، بدويڤ من بكه‌ڤه دا ته بره‌ڤينم و خلاس بكه‌م!
به‌رى ئه‌ز به‌رسڤێ بده‌م، وى ئه‌ڤسه‌رى گوتێ، ئه‌رێ مامێ سه‌لمان ئوئه‌م ما توچ حسابێ بو مه ناكه‌ى! ئێكسه‌ر گوتێ بو سه‌يد ئه‌كره‌مى، ئه‌ز حسێبێ بو هيچ كه‌سه‌كى ناكه‌م، ئه‌ز يێ ئاماده‌مه رحاخو دگه‌له(١٠)ده‌ه زه‌لامێن خو بده‌م، بتنێ وى رزگار بكه‌م، ئينا ئه‌فسه‌رى كره كه‌نى و گوتێ ما تو من نابينى و چه‌كدارم و حه‌ره‌س ژى مه‌هه‌نه! ئينا گوتێ سه‌يدا تو ڤێ تبلا من دبينى، (٦)شه‌ش كه‌س بتنێ بده‌بانجێ، بڤێ تبلێ هاتينه كوشتن، ئه‌گه‌ر تو بزاڤێ بكه‌ى، دێ تو بييه يێ حه‌فتێ، دوو سێ پوليسێن هه‌وه ژى دێ كوژم، هوين دێ بستن و په‌لاته بن و ئه‌ز دێ برايێ خو خلاس كه‌م..!!
من ژى ئێك سه‌ر گوتێ نا، نا خازيتن هندێ و ئه‌ز ژ خوناترسم، دزانم دێ ل ڤێره گيروبم، لێ ئه‌نجام هه‌ر دێ هێمه به‌ردانێ و ناخازيتن تو كاره‌كێ هوسان بكه‌ى، براستى ژى ئه‌و بو مه‌ره‌ما ره‌ڤاندنا من هاتبوو! ئامه‌ييا خو ژى كربو!
ئينا گوته من برا، ئه‌ز يێ نه‌خوشم، دبيتن جاره‌كا نه‌هێم ده‌ڤ ته يان ئێك دوو نه‌بينين…ئينا مه خاترا خو ژێك خاست و ئه‌ز مام و ئه‌و چوو مالێ…هزار ره‌حمه‌ت ل سه‌ر بن، مخابن به‌رى ئه‌ز بهێم به‌ردانێ يان جاره‌كا دى ئێك دوو ببينينن، ئه‌و چوو ره‌حمه‌تێ و ئه‌م ماينه لڤێ ژيانێ، لێ جه‌سته‌يێ وى چوو، مه‌ردايه‌تى و جه‌ساره‌ت و وه‌فائا وى مايه و دێ مينيتن و هه‌تا كو بچم ره‌حمه‌تێ ژى يا فه‌ره قنێتا مه ڤێ ژبير نه‌كه‌تن…!!
بيرهاتن زورن، مه ل گوره‌ى سه‌رده‌مێ خوه، هه‌م سه‌ربور هه‌بوينه و هه‌م ژى هه‌ڤال و هوگر هه‌بوينه، ئه‌ڤه ناخازيتن هندێ مه نه‌يار و نه‌ياركاريى و كه‌سانێن خراب، نه‌بوينه و نه‌ديتينه، ژ هه‌مى ره‌نگ و جوران، مه ديتينه و تاكو سه‌رده‌رى و كار ژى مه دگه‌لكدا هه‌بويه و كريه، لێ ئه‌م ناخازين ڤان به‌حس و حه‌كاتێن نه‌يار و نه‌ياتيێ بكه‌ين، بلا ئه‌و بچن و ئه‌م وان لبير نه‌ئينين…لێ خه‌لكێ يار و دوست و برا و براده‌ر ژى زور مه هه‌بوينه و مه نوكه ژى هه‌نه، هيڤيا مه ئه‌وه وان هه‌ڤالێن باش، وان برايێن باش، هه‌ر ئێكى، ل ده‌مه‌كى و ل ده‌ليڤه‌يه‌كێ سه‌ربوره‌كا وان، چاكييه‌كا وان لبيرا خو بينين، ئه‌گه‌ر ژيێ درێژ هه‌بيتن، بئانه‌هيا خودێ، ئه‌ڤ چه‌نده ژى دێ هه‌بيتن و دێ بزاڤا ڤێ چه‌ندێ ژى كه‌ين..!
تشتێ هه‌رى خراب و دل ئێش ئه‌وه، زوربه‌يا بيرهاتنێن مه، نه‌خاسم ئه‌وا ئه‌م دبێژينێ ژيان و ته‌جروبه‌يا شوره‌شێ و خه‌باتێ(ئه‌گه‌ر شوره‌ش و خه‌بات بيتن)، شه‌رێن ناڤخويى، خه‌باتا خو كوژيێ هندا زوره، چ زه‌وق و سه‌ليقه بومه نه‌هێلاينه، شه‌رێن مه يێن خوكوژى، خه‌باتا براكوژيێ، ژ بلى سه‌رده‌مه‌كێ گرنگ و زور حه‌ساس بو، ده‌مه‌كێ درێژ ژى فه‌كێشان، گه‌له‌ك قوربانيێن مه‌زن هاتن دانێ، كه‌سايه‌تيێن زور مه‌زن، پێشمه‌رگێن زور قه‌هره‌مان ژيانا وان هاته هندا كرن،مه دگوتنێ شه‌هيد، براستى ژى ئاستێ مه‌زناهى و خه‌باتا وان دخاسته پلا شه‌هاده‌تێ، هه‌تا ئه‌گه‌ر پله‌يه‌ك ژ شه‌هاده‌تێ مه‌سترێژى هه‌بايه، دڤيا ئه‌و پله و ئه‌و ناڤ لێنيناندنه مه دابانێ، لێ مخابن، هندا بونا، خه‌باتا خو كوژيا وان(هه‌رچه‌نده ئه‌و ژێ نه‌به‌رپرسيارن، يێن به‌رپرسيار به‌رپرسێن وان بوينه)، لێ ل ده‌مێ ئه‌م ره‌نگێ خه‌باتێ، ئاوايێ قوربانيێ، ئه‌رمانج و بويه‌ران ل به‌ر چاڤان دگرين…ره‌وش دبيتن تشته‌كێ دى، قوربانى بئاوايه‌كێ دى په‌سنا خو وه‌ردگريتن، بويه‌ر و به‌رئه‌نجام ژى ديسان بئاوايه‌كێ دى خو دبينن…لێ ناڤلێكرنا شه‌رێ خو كوژيێ، دبيتن ناڤلێنانه‌كا گونجايى بيتن و باشترينێ ده‌ربرينان ژى بيتن…له‌ومانێ ئه‌م جارێ ئه‌م چن اڤێن دى لێ ناكه‌ين! چونكى ئه‌ڤێ چه‌ندێ فه‌لسه‌فه‌يه‌ك و هوشداريه‌ك و شاره‌زايه‌كا مه‌زن پێ دڤێتن، تاكو ده‌ربرينه‌كا لائيق، خاندنه‌كا بنه‌جه، ناڤلێكرنا ببه‌ر و منێن خو، بو وى ده‌مى و وان سه‌ربور و وێ دێروكێ بهێتن ناڤ لێ كرن و ناڤێ خوه‌يێ راستى وه‌ربگرن.
بويه‌رێن خو كوژى ژى زورن چ لناڤبه‌را پارت و لايه‌نێن كوردى و كوردستانى، يان لناڤخويا حزب و بنه‌مال و عه‌شيره‌تاندا، هه‌ر ل ده‌ستپێكا شوره‌شا ئه‌يلولێ سالا١٩٦١ و بسىه‌ردا تاكو روژا ئه‌ڤروكه، بگره ژ سالا ١٩٦٤ -١٩٦٦ پشتى ره‌وتێ خوكوژيێ مه‌لالى و جه‌لالى دروست بوين، كورسيك و ده‌ستهه‌لات بو ئه‌گه‌رێ هندێ خوينه‌كا زور برژيتن و گه‌نج و مێرخاسێن مه‌زن ژى ببن قوربانى، ئه‌ڤجارێ بگره ژكوشتنا سه‌ركرده و زه‌لامێ مه‌زن و كوردپه‌روه‌ر و خودان رول و خودان خه‌باته‌كا زورا مه‌زن، سه‌يدايێ مه‌زن(عه‌لى حه‌مدى بێدوهى)، كوشتنا به‌گێن به‌روارى يا ل ده‌ستپێكا سالێن شێستێ، كوشتنا خانه‌ميرێ تروانشى، كوشتنا موختارێ تروانشيان، كوشتن و قه‌تل و عاما بنه‌مالا( حه‌مه‌د ئاغايێ مێرگه‌سورى)، بغه‌دره‌كا مه‌زن و بزولمه‌كا بێ هه‌ڤپار، كوشتنا پوله‌كا فه‌له‌يێن به‌روارى يێن كو مه‌زترين په‌هله‌وانى و چالاكيا دێروكى كرى، كو رزگار كرنا قه‌زايا ئامێديێ بو، ژ بلى وێ جه‌كێ مه‌زن و ده‌ستكه‌ڤتێن وان بو بنياتێ خه‌باتا شوره‌شا ملله‌تێ كوردى بده‌ست خوڤه ئيناندين، قه‌زا ئامێديێ كو بنگه‌هێ ميرگه‌ها به‌هدينان بويه، لێ ئه‌و قه‌هره‌مان و ئه‌ڤ خه‌باتگێره، براستى توشى غه‌دره‌ك و توشى زولمه‌كا زور مه‌زن ژى بوينه، تاكو گه‌هشتيه وێ ئێكێ پشكا هه‌رى مه‌زنا مه‌سيحيێن ده‌ڤه‌را به‌رواريا دئه‌گه‌را وێ زولمێ دا به‌ره‌يێ دوژمنى، به‌ره‌يێ حكومه‌تێ هه‌لبژێرن و به‌ره‌يێ گه‌ل و وه‌لاتى بجهبهێلن، له‌ومانێ ئه‌ڤێ چه‌ندێ ژى ل سه‌راوه‌ستيانه زور و بشاره‌زايى پێ دڤێتن..!!
ل وى ده‌مى(محسن به‌گ) مه‌زنێ هه‌مى به‌رواريان بو، ئه‌و بنگه‌هێ شوره‌شێ يێ هاتيه‌د دروست كرن ژى، بێ شكه وى بهار تێ دا هه‌بويه، ئه‌م به‌حسا لايه‌نێ وى يێ باش و خراب ناكه‌ين، چونكى ئه‌ڤه نه‌بابه‌تێ مه‌نينه، لێ محسن به‌گ ئێك بويه ژ وان ئه‌گه‌رێن بنگه‌هێ شوره‌شێ لناڤ ده‌ڤه‌را به‌رواريان ئاڤاكرى و ئامێدى گرتى، لێ كوشتنا خانه‌مير، كوشتنا موختارێ تروانشيان، كو مروڤه‌كێ هه‌رى باش و مێرخاز و كورد په‌روه‌ر بويه، ئه‌ڤ رويدانا نه‌باش بويه ئه‌گه‌رێ هندێ، هه‌م ناكوكى بكه‌ڤيتنه ناڤا عه‌شيره‌تا به‌رواريان، هه‌م ژى بنه‌مايك و برێداچونێن خه‌بات و شوره‌شێ لێك بهێنه وه‌رگه‌رهان و ره‌هه‌ندێن جودا و به‌روڤاژى بو ببنه جهگرێن شوره‌ش و خه‌باتا وى سه‌رده‌مى، تاكو گه‌هه‌شتيه وى راده‌يى، محسن به‌گ و پشكه‌كا زورا به‌رواريا، پشتێ بده‌نه شوره‌ش و ملله‌تێ خوه، ژ مه‌جبوريا خو چه‌كێ دوژمنێ خوه، هێلا نه‌يارێ خوه، بخو هه‌لبژات و بونه پالێن دوژمنى، دژى گه‌ل و ولاتێ خوه و ئه‌ڤه ژى هه‌م جهێ مخابنيێه و هه‌م ژى جهێ ل سه‌رراوه‌ستيانێيه و ديراسه‌ت كرنه‌كا زانستيه!
مه بابه‌تێ خوه، پيچه‌كێ هشك كر، خه‌ريكه روندك بهێنه خار و هزرێن مه ژى بئالزن، دا هنده‌ك بهارات پێ وه‌ربكه‌ين و ره‌وشێ بڤه‌گه‌رهينين بو ئاليه‌كێ دى ترێ…گه‌لا بكه‌نه دا گه‌نج بژى..!!
…( يارا منێ روندێ جانێ…ئه‌م چ بكه‌ين.. چ ژى نه‌كه‌ينى .. بمه دكه‌ن چت چتانێ…هه‌روش ئه‌مێ ل به‌رده‌رگه‌ها…ياريا بمه‌دكه‌ن…پلا ل مه‌ده‌ن، تبلا ل مه‌ده‌ن…بوينه رادانك، وه‌ك چيكانێ…بوينه ياريك…بوين پێترانك…هه‌ر روژ به‌رێ مه، دئێخن رێكه‌كێ…بمه دكه‌ن پليپتانێ…بوينه ياريك..بوين عنتيكه…بمه‌دكه‌ن كوتيكانێ…ئه‌م نه‌مێرين، نه‌جامێرين…هه‌ر روژ ئه‌مێن ده‌ربه‌ده‌رين…سه‌رێ رييان ل مه‌به‌رزه‌بو…شه‌ره‌ف نامويس ل مه هندابو…دێ وه‌ر يارێ، يارامنێ…تو ئێغبال و شانصێ منێ… تو بويى به‌لا سه‌رێ منێ…يارا من چه‌ندا فهێته…هه‌ر روژ ياركا زه‌لامه‌كى…هه‌ر روژ دگه‌ل دوژمنه‌كى…يێ وێ دبه‌ن، وێ كرێت دكه‌ن…خر دوژمن، خر نه‌يارن…فسق و فه‌ساده كارێ وان…دزى و تالانه شولا وان…خرنه‌مێرن، نه‌جامێرن…دوو رويى، دره‌وين ، نه‌يارن…نه‌يار ئه‌ڤرو هاتن سه‌رمه…ب دوژمنكارى، گرت وارێ مه…ئه‌ڤ نه‌ياره نه چ مێرێن…سه‌يێن هارن، گورگێن پارن…نه‌شه‌ره‌فه و نه‌ره‌حمه‌ته…خولى سه‌رن، پاته‌خوه‌رن…ده‌مێن مه گه‌له‌ك درێژ بوون…دوژمن و هوڤ ده‌ست نابه‌رده‌ن…هوين وه‌رن گه‌لى گوندييان…خوبده‌ن ئێك باژێريان…ده‌ست ژ دوزا خوه به‌رنه‌ده‌ن…وه‌لاتێ خوه رزاگار بكه‌ن…شه‌ره‌فا خوه خلاس بكه‌ن…شوره‌ش، خه‌بات نه‌وه‌هايه….كوردايه‌تى نه هوه‌سايه….كورێن وه‌لات، هوين هه‌ركار كه‌ن….كچێن وه‌لات باش بخوينن…هێڤێنه‌كێ باش په‌يدا كه‌ن…نڤشه‌كێ باش، هوين په‌روه‌رده‌كه‌ن…زانست، خه‌بات رێكا مه‌يه…گه‌له‌ك قوربانى پێ دڤێن…خوين و خوهه‌ك مشه دڤێت….هاى كوردينا، هوين وه‌نه‌كه‌ن…وه‌لاتێ خوه خراب نه‌كه‌ن…وه‌لات دايكه، وه‌لات بابه…بێى وه‌لاتى ئاواره‌ينه…ره‌به‌ن و ژار، ئه‌م گه‌روكين…روينشتيێن بێ جهوكوكين…وه‌رن هه‌مى خه‌لكێ وه‌لات…خوبكه‌نه ئێك…ببنه ئێك رێز، خوبكه‌ن كه‌لات….ده‌مێ ئه‌م هه‌مى ئێك دگرين….دوژمن دره‌ڤن، خوناگرن….دڤێت ئاخا خو رزاگار كه‌ين…ملله‌ت و گه‌لى سه‌ر رست بكه‌ين…بخودانى و چاره‌سه‌رى…دێ گه‌هين ئێك هه‌رو هه‌رى…وه‌ى وه‌لاتا بابێ من، دايكا منى…تو روح و ژيانا منى…بێى ته نينم ئه‌ز چ نه‌مه…ئه‌ز فيدا و قوربانێ ته‌مه…)).
پيچه‌كێ بنێ گومێ هاته شلقاندن و گريانه‌كا دزكدا مه‌كر، ما كه‌نگى ئه‌م دكه‌نين، ولاهى كه‌نيا مه ژى دناڤا مه دا گريه، حه‌سره‌تى وقه‌هرن…لێ گرى ژى روندك باراندنه و قه‌هر و حه‌سره‌تى رشتنه، ب به‌رئه‌نجامى ته‌ناهى، دلفرهه‌يى، بيرێن زه‌لال، هزرێن مه‌تال دزێن و دئافرن و شين دبن، دبنه بنوايه‌شێ باغ و بيستانێ ژيانێ، گول و گولزار، چيچه‌ك و نێرگزان شين دكه‌ن و ده‌رونێ مه، ده‌ربرينێن مه، مه‌ند و سه‌رراست و ساخله‌م دكه‌ن، هوسانێ دێ ساخله‌م بين و دێ بساخله‌مى هێڤێنێ ژينێ كه‌ينه خودان، بو روبيشتێ، بو مالباتێ، بو كورد و كوردستانێ.
ل ڤى وه‌لاتى دين هشيارن و هشيار دينن، ل بيرا منه ل ده‌مێ(تاهر سياسى) دگوت، ل ده‌مێ ئه‌م ببينه ده‌وله‌ت، دڤێتن وێنێ ل سه‌ر دراڤێ مه يێ نيشتيمانى، وێنێ كه‌ره‌كى ل سه‌ربيتن، كه‌رى خورچه‌زينكه‌ك ل سه‌ر پشتێ بيتن، خورچه زينكى ده‌ستێ كادره‌كى تێدابيتن…پاشى دما و وه‌كى ئاخێنكه‌كێ رادهێلا و دگوت…ل سنورێن ده‌وله‌تا ترێل ببار بێ گومرك ده‌رباز دبن، لێ ل وه‌لاتێ مه، كه‌سه‌ك نه‌شێتن كه‌ره‌كى بخو ببه‌تن كاروانى، هه‌رده‌مێ كادرێ مه كه‌رك بخورچه‌كه‌كێ ڤه ديت، هه‌ما ئێكسه‌ر دێ غارده‌تن و ده‌ستێ خو دێ كه‌تن دخورچكێ دا و دێ گومركه‌كا مه‌زن ژێ وه‌رگيتن…به‌لێ دێ گومركا ترێله‌كا باركرى ژ بارێ كه‌رى وه‌رگريتن…هه‌ى كوردا، دێ هوسان بيه ده‌وله‌ت..ته ده‌وله‌ت دڤێتن…!!
يوسڤێ جه‌نداع ژى هه‌رده‌م دگوت، من گوته بارزانى، كوردينى هوسان ناهێتن كرن، ئه‌گه‌ر كوردينى هوسابيتن، نه‌هوين چ دكه‌ن و نه‌ژى چ ژى چێدكه‌ن، ئه‌گه‌ر هوسا بيتن…هه‌ما تو لڤێره كوردينيێ بكه و هه‌مى ده‌ڤه‌را به‌هدينان ژى خه‌ما من، پارێزگه‌ها دهوك – ميسل ئه‌ز دێ برێڤه‌به‌م! نه چ بو دكه‌م و نه‌ژى چ تشته‌كى ژێ وه‌ردگرن…پاشى دابێژيتن مه‌لا مسته‌فا ل سه‌ر سنورێ ئيرانێ بو، هه‌مى به‌هدينان دده‌ستێ ئه‌سعده‌دێ خوشه‌ڤى دا بو، ئه‌وى ژى به‌س بوخو دكر…ئينا ئه‌و چێبو! يا چێبوى، ملله‌ت ده‌ربه‌ده‌ر بو! وه‌لات ژى وێران بو!
گوندێ مه هه‌رچه‌نده گونده‌كێ دبنيات دا زوركه‌ڤناره، لێ ل ده‌مه‌كى وێران و كاڤل دبيتن و دبيتن گونده‌كێ بچيك، ژ به‌ركو نێزيكى گوندێ راڤينايه و دياره هه‌م ژى خارزايێن راڤينيانه، وه‌كى تاخه‌كێ گوندێ راڤينا، راڤينيا سه‌رده‌رى و هاريكارى دگه‌ل دا دكر، ژ به‌ر هندێ زور تێكه‌لى و پێكه‌ليا مه دگه‌لكدا هه‌بويه، روژه‌كێ وه‌ختێ باهيڤ چنێ بو! ئه‌حمه‌دێ زيڤێ ل سه‌ر دارا باهيڤێ، باهيڤ دچنين، جاره‌كێ پێ خو ددانيتن سه‌ر تاكه‌كێ باهيڤێ يێ هشك، تاكێ باهيڤێ ژى لبن پێ وى دشكێتن و ئه‌حمه‌د د دارا باهيڤێد ا دكه‌ڤيتن و به‌ردبيتن خارێ، دياره پێ وى ژقولقولێ هاته ده‌ر، خه‌لكێ گوندى هه‌مى لێ خرڤه دبن، ئه‌حمه‌دا چ ل ته‌هات، تويى سه‌لامه‌تى، ئه‌حمه‌دى ژى دياره وان روژان حه‌سويێ برايێ وى، پێلاڤه‌كا جزم يا نوى بو ژ ئامێديێ ئينابو! ئه‌حمه‌دى ژى ئاگه‌ه ژ ئێشا خو نه‌بو! هه‌ر هه‌وار دكر، كانێ جوزما من، كانێ پێلاڤا من يا جوزمه، كانێ سه‌حكه‌نێ، كانێ نه‌دوريايه، خه‌ما ئه‌حمه‌دى به‌س جوزما وى بو…پێ چو بلا بچيتن ئه‌و بو وى نه‌خه‌م بو!
دبيتن ئه‌حمه‌د يێ هه‌ق بيتن، چونكى ل وى ده‌مى ژيان زور يابزه‌حمه‌ت بو! جلك و پێلاڤ نه‌بون، زور دكێم بون، ئه‌گه‌ر هه‌بانه ژى دگران بون، هه‌ركه‌سه‌كى پێ چێنه‌دبو بكريتن…ژيان يا زحمه‌ت بو، لێ كار و كوك، هاريكارى و هه‌ڤكارى زور يا مشه‌بو، هه‌مى خه‌لكێ گوندى هاريكاريا ئێك دوو دكر، خه‌مێن ئێك و سڤك دكر، بو ئێك و دوو پشت و په‌نا بون، لێ نوكه ئه‌ڤ ره‌نگێ هاريكاريێ نه‌مايه، هه‌رچه‌نده تشتێ مشه‌يه، لێ ره‌حم و شه‌فه‌قه زور دكێمن!
